အာဆီယံနိုင်ငံတွေဟာ လူ့အခွင့်အရေးနဲ့ ပတ်သက်လို့ မြန်မာနိုင်ငံက အခြေအနေတွေ အပါအ၀င် ဒေသအတွင်း ပြည်သူတွေ မျှော်မှန်းထားသလောက် တိုးတက်အောင် မလုပ်ဆောင်နိုင်ဘူးလို့ ဒေသအတွင်း လူ့အခွင့်အရေး လှုပ်ရှားသူတွေက ဝေဖန် ပြောဆိုနေကြပါတယ်။ လာမဲ့ သီတင်းပတ်ကုန် ထိုင်းနိုင်ငံမှာ ကျင်းပမည့် ၁၅ ကြိမ်မြောက် အာဆီယံ ထိပ်သီး အစည်းအဝေးမှာ အာဆီယံနိုင်ငံ အစိုးရ တွေအကြား လူ့အခွင့်အရေး ကော်မရှင် AICHR ကို ဖွဲ့စည်းမှာ ဖြစ်ပါတယ်။ ဒီကော်မရှင်ရဲ့ အခန်းကဏ္ဍနဲ့ အာဆီယံ နိုင်ငံတွေအကြား လူ့အခွင့်ရေး အခြေအနေတွေကို ကိုသိန်းထိုက်ဦးက ဆက်ပြီးပြောပြသွားမှာ ဖြစ်ပါတယ်ရှင်။ လာမဲ့ သောကြာနေ့ကနေ တနင်္ဂနွေနေ့အထိ ထိုင်းနိုင်ငံ ၀ါဟင်ကမ်းခြေ အပန်းဖြေ မြို့မှာ ကျင်းပမဲ့ အာဆီယံ ထိပ်သီးဆွေးနွေးပွဲမှာ ဖွဲ့စည်းမဲ့ အာဆီယံနိုင်ငံ အစိုးရ တွေအကြား လူ့အခွင့်အရေး ကော်မရှင် AICHR က ဒေသတွင်း နိုင်ငံတွေအတွင်း သမိုင်းမှာ လူ့အခွင့်အရေးနဲ့ ပတ်သက်လို့ ပထမဆုံး ပေါ်ပေါက်လာမဲ့ အဖွဲ့အစည်း တခုပါ။ ဒီကော်မရှင်မှာ ပါဝင်မဲ့ သူတွေကို အာဆီယံ အဖွဲ့ဝင် နိုင်ငံအများစုက အစိုးရကဘဲ တိုက်ရိုက် ရွေးချယ်နေတဲ့ အတွက်လည်း ဝေဖန်မှုတွေ ရှိနေပါတယ်။
AHRC အာရှ လူ့အခွင့်အရေး ကော်မရှင်ရဲ့ အမှုဆောင် ဒါရိုက်တာ Mr Basil Fernando ကတော့--- “ဒေသအတွင်း နိုင်ငံတွေအကြား ပြည်သူတွေရဲ့ လူ့အခွင့် အရေးနဲ့ ပတ်သက်တဲ့ မျှော်လင့်ချက်တွေ တိုးလာနေတယ်လို့ ပြောပါတယ်။ ဒီနိုင်ငံတွေ အားလုံးလိုလိုဟာ ဒီမိုကရေစီ တည်ဆောက်ရေးနဲ့ ဥပဒေစိုးမိုးရေးကို လူတွေရ ယခင်ကထက် ပိုမိုတောင်းဆို လာနေကြပါတယ်။ ဒီလို ဒီမိုကရေစီရေး၊ ဥပဒေစိုးမိုးရေး ဆိုတာက လူ့အခွင့်အရေးကို မလေးစားဘဲ မရယူနိုင်ပါဘူး။ လူ့အခွင့်အရေး အတွက်က အာဆီယံနိုင်ငံ တခုချင်းဆီသာ အရေးကြီးတာ မဟုတ်ဘဲ အာဆီယံနှင့် နိုင်ငံတကာ ဆက်ဆံရေးမှာလည်း အရေးကြီးတဲ့ အကြောင်း အာရှ လူ့အခွင့်အရေး ကော်မရှင်ရဲ့ ဒါရိုက်တာ Mr Basil Fernando က ပြောသွားတာပါ။”
အာဆီယံ နိုင်ငံတွေအကြား နိုင်ငံအချို့မှာ အစိုးရကို ကာကွယ်ပေးမဲ့ အဖွဲ့အစည်း သာရှိပြီး လူထုကို အကာအကွယ်ပေးမဲ့ အဖွဲ့အစည်းတွေ ထူထောင်ခွင့် မရှိတဲ့ အကြောင်း မြန်မာနိုင်ငံ အခြေအနေကို ဥပမာ ပေးပြီးတော့ ပြောသွားပါတယ်။ ဒေသတွင်း အခြားနိုင်ငံတွေမှာ မြန်မာနိုင်ငံနဲ့ နှိုင်းစာရင် လူ့အခွင့်အရေး အခြေအနေတွေ ပိုကောင်းတယ်လို့ ဆိုပေမဲ့လည်း ဒေသအတွင်း ပြည်သူတွေ မျှော်မှန်းသလောက်တော့ လူ့အခွင့်အရေးကို တိုးတက်အောင် မလုပ်ဆောင် နိုင်ဘူးလို့ ဆိုပါတယ်။
မြန်မာနိုင်ငံရဲ့ အခြေအနေ ကတော့ လုံးဝ ဥပဒမဲ့တဲ့ နိုင်ငံတခုလို ဖြစ်နေပါတယ်။ ဥပဒေ စိုးမိုးမှု လုံးဝမရှိပါဘူး။ စီးပွားရေး လုပ်ငန်းရှင်တွေ အပါအ၀င် ပြည်သူတွေ ဘယ်သူ့ဘယ်သူ့ကိုမှ အာမခံမယ်ဆိုတဲ့ အာမခံချက်မျိုး မရှိပါဘူး။ ဥပဒေကို လေးစားမှုမရှိရင် လူ့အခွင့်အရေးကိုလည်း လေးစားမှာ မဟုတ်ပါဘူး။ လူတွေကို မတရား ဖမ်းဆီးနေတာတွေ၊ အတိုက်အခံတွေကို မတရား ဖိနှိပ်နေတာတွေ ရပ်ဆိုင်းဖို့ လိုတယ်လို့ အာရှ လူ့အခွင့်ရေး ကော်မရှင်ရဲ့ ဒါရိုက်တာ Mr Basil Fernando ပြောသွားတာပါ။
အာဆီယံ နိုင်ငံတွေကတော့ လူ့အခွင့်အရေးကို ကာကွယဖို့်ဆိုတာ နောက်မှ ဆောင်ရွက်ရမဲ့ ကိစ္စဖြစ်ပြီး။ လောလောဆယ် လူ့အခွင့်အရေးကို တိုးတက်အောင် လုပ်ဖို့ မြန်မာနိုင်ငံအတွင်းက လူ့အခွင့်အရေး လှုပ်ရှားနေသူတွေကရော အာဆီယံ လူ့အခွင့်အရေး ဖွဲ့စည်းမဲ့ သတင်းအပေါ် ဘယ်လို သုံးသပ်ကြပါသလဲ။ ပဲခူးမြို့က ဒေသခံတွေရဲ့ လူ့အခွင့်အရေးကို ဆောင်ရွက်ပေးနေတဲ့ လမ်းပြကြယ်အဖွဲ့မှ ဦးအေးမြင့်က အခုလို ပြောပါတယ်။
“န အ ဖ အစိုးရက အပြည်ပြည်ဆိုင်ရာ ဥပဒေကိုလည်း ဂရုမစိုက်သလို ပြည်တွင်းက ပြဌာန်းတဲ့ ဥပဒေကိုလည်း ဂရုမစိုက်ဘူး။ ပြည်သူလူထုဆိုတာ သူတို့ခေါင်းထဲမှာ မရှိဘူး။ အဲဒီအာဆီယံ လူ့အခွင့်အရေး အဖွဲ့မှာ ပါမဲ့သူ ဆိုတာလည်း ပြည်သူလူထုက ရွေးချယ်ပေးလို့ ရမဲ့ သူတွေမဟုတ်ဘူး။ စစ်တပ်လို အမိန့်ပေးပြီးတော့ သူတို့ကြိုက်တဲ့ သူကို သူတို့ ခအပ်မှာ ဖြစ်တဲ့အတွက် အာဆီယံ နိုင်ငံမှာ လူ့အခွင့်အရေး အဖွဲ့အစည်း ရှိပေမဲ့လည်း ကျနော်တို့ မြန်မာနိုင်ငံ အတွက် မျှော်လင့်ချက်မရှိပါဘူး။ စစ်အစိုးရ အလိုကျ လူ့အခွင့်အရေး အဖွဲ့သာ ဖြစ်မှာပါ။”
လမ်းပြကြယ်အဖွဲ့မှ ဦးအေးမြင့်ရဲ့ သုံးသပ်ချက် ဖြစ်ပါတယ်။
0 comments:
Post a Comment