အမိန့်အမှတ် ၂၈/၂၀၁၁ ဟာ လွတ်ငြိမ်းချမ်းသာခွင့်မဟုတ်ပါ

မင်းမြတ်ကျော်

ပြစ်မှုဆိုင်ရာ အမှုတွေနဲ့ သေဒဏ်ကျခံနေရသူတွေကို ထောင်ဒဏ် တသက်တကျွန်းအဖြစ် ပြစ်ဒဏ်ပြောင်းလဲ သတ်မှတ်တယ်။ ပြစ်ဒဏ် တနှစ်အောက် ကျခံနေတဲ့ သူတွေကိုလွှတ်ပေးပြီး၊ ကျန်သူများကို ထောင်ဒဏ်တနှစ် လျော့ပေါ့ ပေးတာဟာ လူသားချင်း စာနာစိတ်နဲ့ လွတ်ငြိမ်းချမ်းသာခွင့် ပေးတယ်လို့ မဆိုနိုင်ပါဘူး။
 

သေဒဏ်ပေးနိုင်တဲ့  ပြစ်မှုတွေကို ကြည့်မယ်ဆိုရင် အောက်ပါအတိုင်း တွေ့ရမှာဖြစ်တယ်။ ပြစ်မှုဆိုင်ရာ ဥပဒေပုဒ်မ ၁၂၂ အရ နိုင်ငံတော် သစ္စာဖေါက်ဖျက် ပုန်ကန်မှုကို ကျူးလွန်တဲ့ သူတွေ နောက်တခါ ပြစ်မှုဆိုင်ရာ ဥပဒေပုဒ်မ ၃၀၂ (ဂ)အရ ထောင်ဒဏ် ၇ နှစ်ထိ ပြစ်ဒဏ် ထိုက်သင့်တဲ့ ပြစ်မှုကို ကျူးလွန် နေတဲ့အချိန်မှာ လူသတ်မှု ကိုကျူးလွန်မှသာ သေဒဏ်ကို အပြစ်ပေးလို့ရတာပါ။ ဒီလိုမှ မဟုတ်ရင် တသက်တကျွန်းဒဏ် ဒါမှမဟုတ် ၁၀ နှစ်ထိ အလုပ်ကြမ်းနဲ့ ထောင်ဒဏ်နဲ့ ငွေဒဏ်တွေပဲ အပြစ်ပေးနိုင်တာ ဖြစ်တယ်။ ပြစ်မှုဆိုင်ရာအမှု တွေနဲ့ ပြစ်ဒဏ်ပေးခံရတဲ့ သူတွေကို လူ့လောက အသိုင်းအ၀န်းမှာ ပြန်လည်ဝင်ဆန့် လာဖို့ ပြစ်ဒဏ်ပေးတဲ့အခါမှာ ဘယ်လိုပြစ်ဒဏ်မျိုးကိုသာ ပေးရမယ်ဆိုတာကိုလဲ ဖွဲ့စည်းပုံ အခြေခံ ဥပဒေ၊ ပြစ်မှုဆိုင်ရာ ကျင့်ထုံးဥပဒေ၊ တရားရုံးများလက်စွဲ၊ ပြည်ထောင်စု တရားစီရင်ရေးဥပဒေ တွေမှာ အတိအလင်း ဖေါ်ပြထားပါတယ်။

ဥပမာအားဖြင့် ၂၀၁၀ ခုနှစ် ပြည်ထောင်စု တရားစီရင်ရေးဥပဒေ ရဲ့ အခန်း (၂) တရားစီရင်ရေး ဆိုင်ရာမူများရဲ့ နောက်ဆုံး အချက်မှာ ပြစ်မှုကျူးလွန်သူကို အရေးယူ အပြစ်ပေးရာမှာ အကျင့်စာရိတ္တ ပြုပြင်ရေး ကိုဦးတည်ရေး ဆိုတဲ့မူကို ချမှတ်ထားတာ တွေ့ရမှာဖြစ်တယ်။ ဒီလိုပဲ ပြစ်မှုဆိုင်ရာ ကျင့်ထုံးဥပဒေပုဒ်မ ၂၃၄ (၁) မှာ လူတဦးတယောက်ဟာ တမှုထက်ပိုပြီး မျိုးတူဖြစ်တဲ့ ပြစ်မှုတွေကို ကျူးလွန်တဲ့အခါ ပထမကျူးလွန်တဲ့ ပြစ်မှု ကနေ နောက်ဆုံး ကျုးလွန်တဲ့ပြစ်မှုအထိ ၁၂ လအတွင်း ကျူးလွန်ခဲ့ကြောင်း စွပ်စွဲခံရတဲ့အခါ ကျူးလွန်ခဲ့တဲ့ ပြစ်မှုတွေအနက် သုံးမှုထက် မပိုတဲ့ ပြစ်မှုတွေအတွက် စွဲချက်တင်၍ အမှုတခုတည်းမှာပဲ စစ်ဆေးစီရင်နိုင်တယ် လို့ပြဌာန်းထားတာကို တွေ့ရမှာဖြစ်တယ်။ ဒါ့အပြင် ပြစ်မှုတရပ်တည်း အတွက် ပြစ်ဒဏ် တကြိမ်ထက်ပိုပြီး မခံစေရ လို့ ၁၉၇၃ ခုနှစ် စကားရပ်များအနက် အဓိပ္ပါယ် ဖွင့်ဆိုရေးဥပဒေပုဒ်မ၂၂ မှာ အတိအလင်း ပြဌာန်းထားတာကို တွေ့ရပါတယ်။

ပြုလုပ်မှု ဒါမဟုတ် ပျက်ကွက်မှုတခုဟာ ဥပဒေ ၂ ရပ်၊ ဒါမှမဟုတ် ဥပဒေ ၂ရပ်ထက်ပိုတဲ့ ဥပဒေအရ ပြစ်မှုမြောက်လျှင် ပြစ်မှုကျူးလွန်တဲ့သူကို ယင်းဥပဒေအရ ဥပဒေတရပ်ရပ် ဖြင့်သာ တရားစွဲဆို အပြစ်ပေးရမယ် စသဖြင့် တရားရုံး တရားသူကြီးတွေ လိုက်နာရမဲ့ ညွှန်ကြားချက်တွေ၊ နည်းဥပဒေတွေ ရှိပါတယ်။  ဒီလိုဥပဒေက အတိအလင်း ခွင့်ပြုထားတဲ့ ခွင့်ပြုချက်တွေကို နိုင်ငံရေး ယုံကြည်ချက်ကြောင့် အကျဉ်းကျ ခံနေရသူတွေ၊ ဒီမိုကရေစီအရေး တက်ကြွလှုပ်ရှားတဲ့ ကျောင်းသားလူငယ် မျိုးဆက်တွေ၊ လူ့အခွင့်အရေးအတွက် လှုပ်ရှားကြတဲ့သူတွေ၊ တောင်သူ လယ်သမားနဲ့ အလုပ်သမား အရေးကိစ္စတွေကို တက်ကြွစွာ ကူညီဆောင်ရွက်သူတွေ ဥပဒေနဲ့အညီ ခံစားခွင့် မရခဲ့ကြပါဘူး။
 

ယုံကြည်ချက်ကြောင့် အကျဉ်းကျခံနေရသူတွေကို စတင်ဖမ်းဆီးပြီး စစ်ကြောရေး စခန်းတွေမှာ တရားစွဲအဖွဲ့ အစည်းက လိုချင်တဲ့ သက်သေထွက်ချက်၊ သက်သေခံ အထောက်အထားတွေ မရမချင်း နည်းမျိုးစုံနဲ့ နှိပ်စက် ညှင်းပန်းခြင်း ခံရတယ်။ မိသားစု အဖွဲ့ဝင်တွေ ခြိမ်းခြောက်ခြင်း ခံရတယ်။ စွပ်စွဲခံရသူတွေဖက်က သက်သေအဖြစ် လိုက်ပါသက်သေ ထွက်ဆိုမဲ့သူတွေ အလွယ်တကူ တရားရုံး မလာရောက်နိုင်အောင် အကျဉ်းထောင် အတွင်းက အထူးတရားရုံးတွေမှာ စစ်ဆေးစီရင်ခဲ့တာကိုလည်း တွေ့ရမှာပါ။

ဖြစ်ရပ်တခုတည်းအပေါ်မှာ အမှုတွေအမျိုးမျိုး ခွဲတရားစွဲဆိုပြီး၊ ပြစ်မှုတမှုချင်းအလိုက် တရားလိုဖက်က သက်သေခံ အထောက် အထား ခိုင်ခိုင်လုံလုံ မတင်ပြနိုင်ပေမဲ့ အမြင့်ဆုံး ချမှတ်ရမဲ့ပြစ်ဒဏ်တွေကို တရားရုံး တရားသူကြီး တွေက အမိန့်ချမှတ် အပြစ်ပေးခဲ့တာပါ။ ပြစ်ဒဏ်ပေးတဲ့အခါမှာ ပြစ်မှုများကို သီးခြားစီကျခံစေရ မယ်လို့အမိန့် ချမှတ်ထား တာကြောင့် ကျောင်းသားခေါင်းဆောင် ကိုမင်းကိုနိုင် အပါအ၀င် ကျောင်းသားခေါင်း ဆောင်အချို့ အီလက်ထရောနစ် ဆက်သွယ်ဆောင်ရွက်ရေး ဥပဒေပုဒ်မ ၃၃ (က)နဲ့ တမှုကို ၁၅ နှစ်နဲ့ ၄ မှုအတွက် ထောင်ဒဏ် နှစ် ၆၀၊ အသင်းအဖွဲ့ ဖွဲ့စည်းခြင်း ဥပဒေအရ ထောင်ဒဏ် ၆ နှစ်၊ တရားရုံး မထေမဲ့မြင်ပြုမှု အတွက် ၆လ စသဖြင့် သီးခြားစီ ကျခံဖို့ ချမှတ်ထားတဲ့ အမိန့်ကြောင့် ထောင်ဒဏ် ၆၅ နှစ်နဲ့ ၆လကျခံနေရ ပါတယ်။

ရှမ်းတိုင်းရင်းသား ခေါင်းဆောင်တွေဖြစ်တဲ့ ဦးခွန်ထွန်းဦး၊ စိုင်းညွန့်လွင်နဲ့ ဦးဆေထင်တို့ ဆိုရင်လဲ ထိုနည်းတူစွာပဲ အမှုတွေခွဲပြီး တရားစွဲဆို ပြစ်ဒဏ်တွေ သီးခြားချမှတ်ခြင်း ခံရတာဖြစ်တဲ့အတွက် ထောင်ဒဏ် ၈၀ နှစ် နဲ့ နှစ် ၁၀၀ ကျော်ပြစ်ဒဏ် တွေ ကျခံရမဲ့သူ တွေဖြစ်တယ်။

ယနေ့မြန်မာနိုင်ငံမှာ သေဒဏ်ကျခံနေရတဲ့ သူ ၃၄၈ ဦးရှိတယ်လို့ သတင်းမီဒီယာတွေရဲ့ ဖေါ်ပြချက်တွေ ကြောင့် သိရပါတယ်။ အများစုကတော့ လက်နက်ကိုင် အဖွဲ့အစည်းတွေနဲ့ မူးယစ်ဆေးဝါးမှုတွေနဲ့ ကျခံနေရတဲ့ သူတွေ၊ ပြစ်မှုဆိုင်ရာ မှုခင်းတွေနဲ့ သေဒဏ်ကျခံနေရတဲ့ သူများပါတယ်။ နိုင်ငံရေး ယုံကြည်ချက်ကြောင့် သေဒဏ်ပေးခံရတဲ့ နိုင်ငံရေး အကျဉ်းသားက အနည်းစုဖြစ်ပါတယ်။

မြန်မာနိုင်ငံအတွင်းမှာ သေဒဏ်အပြစ်ပေးတာကို မပယ်ဖျက်သေးပေမဲ့ နိုင်ငံတော် သစ္စာဖေါက်ဖျက် ပုန်ကန်မှုနဲ့ သေဒဏ်ပေးခြင်း ခံရတဲ့ ဗိုလ်ကြီး အုန်းကျော်မြင့်ကလွဲပြီး သေဒဏ်အဖြစ် အပြစ်ပေးခံရတဲ့သူ မရှိတော့ပါဘူး။ သေဒဏ်ကျခံနေရတဲ့ သူတွေထဲမှာ ယုံကြည်ချက်ကြောင့် အကျဉ်းကျခံနေရသူတွေ မပါဝင်ပါဘူး။ မူလရုံးက သေဒဏ်ချမှတ်ခဲ့ပေမဲ့ အယူခံ၊အထူးအယူခံ စတဲ့ အထက်တရားရုံး အဆင့်ဆင့်က ပြစ်ဒဏ်တွေ ပြင်ဆင်ပေးလို့ပဲ ဖြစ်ပါစေ။ နိုင်ငံရေး အပြောင်းအလဲ တွေကြောင့် ပြစ်ဒဏ် အထူးလျော့ပေါ့ ပေးလို့ပဲဖြစ်ပါစေ တနည်းနည်းနဲ့ သေဒဏ်က လွတ်မြောက်ပြီး တသက်တကျွန်း ပြစ်ဒဏ်ကျခံရတာက များပါတယ်။

တသက်တကျွန်း ပြစ်ဒဏ်ပေးတဲ့အတွက် သေတဲ့အထိ ထောင်ထဲမှာပဲ နေရတော့မယ်လို့ ထင်ရင် မှားပါလိမ့်မယ်။ ပြစ်မှုဆိုင်ရာ ဥပဒေရဲ့ ပြဌာန်းချက်တွေထဲမှာ တသက်တကျွန်း ပြစ်ဒဏ်ဆိုတာ ထောင်ဒဏ် နှစ် ၂၀ ကိုဆိုလိုတာ ဖြစ်ပါတယ်။ ဒါပေမဲ့လည်း ပုဒ်မ ၅၅ အရ တသက်တကျွန်း ပြစ်ဒဏ်ချမှတ်တဲ့ အမှုတိုင်းမှာ နိုင်ငံတော်သမတက ၁၄ နှစ်ထက် မပိုတဲ့ ပြစ်ဒဏ် တမျိုးမျိုးကို ပြောင်းလဲပေးနိုင်ပါတယ်။ ဒါကြောင့် သာမန်အားဖြင့် ပြစ်မှုဆိုင်ရာ ပြစ်မှုကြီးတွေကို ကျူးလွန်လို့ သေဒဏ်ကျခံရတဲ့ သူတွေဟာ အများဆုံး ထောင်ထဲမှာ နှစ် ၂၀ လောက် နေပြီးရင် လွတ်မြောက်လာတာကို တွေ့ရမှာဖြစ်တယ်။ 

ယုံကြည်ချက်ကြောင့် ပြစ်ဒဏ်ကျခံရတဲ့ နိုင်ငံရေး အကျဉ်းသားတွေသာ လွတ်မြောက်ရက် စေ့တာတောင်မှ နိုင်ငံတော်အား နှောက်ယှက် ဖျက်ဆီးသူများရဲ့ ဘေးအန္တရာယ်မှ ကာကွယ်တဲ့ဥပဒေ ပုဒ်မ ၁၀ (က)အရ ကြိုတင်ကာကွယ်တဲ့ အနေနဲ့ ဆက်လက်ဖမ်းဆီး ထိန်းသိမ်းခြင်း ခံရတဲ့ဥပမာတွေ ရှိပါတယ်။ ပြစ်ဒဏ်ကို သီးခြားကျခံစေဆိုတဲ့အတွက် တမှုပြီးမှ နောက်တမှုအတွက် ဆက်လက် ပြစ်ဒဏ်ကျခံရမှာ ဖြစ်တဲ့အတွက် လူညွန့်တုံးအောင် ပြစ်ဒဏ်ပေးထားတာကို တွေ့ရမှာဖြစ်တယ်။

ကုလသမဂ္ဂ အထွေထွေအတွင်းရေးမှူး ဘန်ကီမွန်းရဲ့ အထူးကိုယ်စားလှယ် မစ္စတာ ဘီဂျေးနမ်ဘီးယား လာရောက် ပြီးတဲ့နောက်ပိုင်း ယခုလို ပြစ်ဒဏ်လျော့ပေါ့ပေးတဲ့ အမိန့်ကြော်ငြာစာ ထွက်လာခဲ့တာပါ။ လာမဲ့ဂျွန်လထဲမှာ ကျင်းပမဲ့ ကုလသမဂ္ဂ လူ့အခွင့်အရေး ကော်မရှင်ရဲ့ အစည်းအဝေးမှာ နိုင်ငံတကာက တက်ရောက်လာတဲ့ ကိုယ်စားလှယ်တွေကို လူသားချင်း စာနာစိတ်နဲ့ နိုင်ငံရေးအကျဉ်းသားတွေ လွှတ်ပေးလိုက်ပါပြီလို့ အကြောင်းပြချင်တာနဲ့ ခုလို လွတ်ငြိမ်းချမ်းသာခွင့်ကို ထုတ်ပြန်တယ်ဆိုရင် အတော်ဖြစ်ကတတ်ဆန်း လုပ်တဲ့အစိုးရ၊ တနည်းပြောရရင် နိုင်ငံတကာရဲ့ သဘောထားကို အလေးမထားတဲ့အစိုးရ အဖြစ်အသိအမှတ် ပြုရမှာဖြစ်တယ်။ ယုံကြည်ချက်ကြောင့် အကျဉ်းကျခံနေရ သူတွေကို ပြန်ပေးဆွဲသလို ဖမ်းဆီးထားပြီး ဓါးစာခံအဖြစ် အစိုးရသစ်က လိုချင်တဲ့အခွင့်အရေး တွေရမှ တဖွဲ့ပြီးတဖွဲ့ လွှတ်ဖို့ လုပ်ဆောင်နေတာဟာ တရားမျှတတဲ့ လုပ်ရပ်၊ ကောင်းမွန်တဲ့ အစိုးရတရပ်ရဲ့ အင်္ဂါရပ်နဲ့ညီတဲ့ လုပ်ရပ်တွေ မဟုတ်ပါဘူး။

ယခုပြစ်ဒဏ်တွေ လျော့ပေါ့ပေးလို့ ပြန်လည်လွတ်မြောက်လာတဲ့ ယုံကြည်ချက်ကြောင့် အကျဉ်းကျခံနေရ တဲ့သူတွေဟာ မတရားဥပဒေမဲ့ ဖမ်းဆီးချုပ်နှောင် ခံထားရတဲ့ သူတွေဖြစ်ပြီး ပြစ်မှုဆိုင်ရာ ဥပဒေတွေနဲ့ တရားစွဲဆို အပြစ်ပေးခံရတဲ့ သူတွေဖြစ်ပါ တယ်။ သာမန် အကျဉ်းသားတွေ ခံစားရတဲ့ လျော့ရက်တွေကိုသာ ခံစားခွင့်ရမယ် ဆိုရင် ပြန်လည်လွတ်မြောက်လာ တာကြာပြီဖြစ်တယ်။ 

ယခုလို အမိန့်ကြေငြာချက်ကို စောင့်နေစရာတောင် မလိုပါဘူး။ ဒါကြောင့် ယခုအကြိမ်ပေးတဲ့ လွတ်ငြိမ်းချမ်းသာခွင့်ဟာ ယုံကြည်ချက်ကြောင့် အကျဉ်းကျခံနေရသူများအတွက် ဘာမှ ထူးခြားမှုမရှိ၊ အကျိုးသက် ရောက်မှုလဲ မရှိဘူးလို့ ပြောရမှာဖြစ်တယ်။ ယုံကြည်ချက်ကြောင့် အကျဉ်းကျ ခံနေရသူတွေကို နည်းမျိုးစုံနဲ့ နှိပ်စက်ညှင်းပန်း တာတွေအပြင် ပြစ်ဒဏ် ချမှတ်ပြီးတဲ့နောက်ပိုင်းမှာလဲ မိသားစု နဲ့ ဝေးကွာတဲ့ ဒေသတွေကို ပို့ဆောင်ပြီး ထပ်ဆင့်ပြစ်ဒဏ်တွေကို မိသားစုတွေကိုပါ ခံစားစေဖို့အတွက် ဆက်လက် ဒုက္ခပေးနေတာကို တွေ့ရမှာဖြစ်တယ်။ 

လွတ်ငြိမ်းချမ်းသာခွင့် ကြေငြာပြီးရင် အကျဉ်းကျခံ နေရသူတွေကို မိသားစုထံ အရောက်ပြန်ပို့ပေးဖို့ သက်ဆိုင်ရာမှာ တာဝန်အပြည့်အ၀ရှိတာဖြစ်တယ်။ အခုတော့ ဒီလိုမဟုတ်ပဲ လက်လွတ်စပယ် ဆောင်ရွက်တာဟာ အစိုးရရဲ့ တာဝန်ယူမှု အခိုင်အမာမရှိဘူး ဆိုတာကို သက်သေပြသလို ဖြစ်နေ တယ်ဆိုတာကို တင်ပြလိုက်ရပါတယ် ခင်ဗျား။