စောင့်ကြည့်ဖို့လိုတဲ့ အစိုးရသစ်ရဲ့ပြုပြင်ပြောင်းလဲမှုများ

ရှေ့နေဦးမင်းလွင်ဦး

စောင့်ကြည့်ဖို့လိုတဲ့ အစိုးရသစ်ရဲ့ပြုပြင်ပြောင်းလဲမှုများ

၅ လသားသာရှိသေးတဲ့အစိုးရသစ်ရဲ့ အပြောင်းအလဲတွေပြုလုပ်မဲ့အစီအစဉ်တွေကို ၁/၂၀၁၁ သတင်းစာရှင်းလင်းပွဲနောက်ပိုင်းမှာ ဆက်တိုက်ကြားသိနေရပါတယ်။ တကယ်အပြောင်းအလဲ တွေလုပ်ဆောင်တော့မဲ့သဘော နဲ့ဟန်ရေးပြဆောင်ရွက်နေတာတွေကို သတိထားကြဖို့လိုပါ တယ်။ လွှတ်တော်အစည်းအဝေးမှာ ပြင်ဆင်သင့်တဲ့ဥပဒေ ၅ ခု မူကြမ်းတွေကိုတင်သွင်းထား ထားပါတယ်။ အခြားဥပဒေတွေလဲ ဒီလိုပြင်ဆင်မှာလားဆိုတာကိုတော့စောင့်ကြည့်ရမှာပါ။ ယခုပြင်ဆင် ဖို့ လွှတ်တော်ကိုတင်သွင်းထားတဲ့ ဥပဒေတွေကိုလေ့လာကြည့်ရင် အမြတ်ခွန် ဥပဒေ၊ တံဆိပ် ခေါင်းခွန်ဥပဒေ၊ ကုန်သွယ်လုပ်ငန်းခွန်ဥပဒေ၊၀င်ငွေခွန်ဥပဒေ နဲ့ ရုံးခွန်ဥပဒေ တွေ ကို ပြင်ဆင် ဖို့မူကြမ်းတင်သွင်းထားတာဖြစ်တယ်။ နိုင်ငံတော်ရဲ့ဝင်ငွေရလမ်းဖြစ်တဲ့ အခွန်နဲ့ပတ်သက်တဲ့ ဥပဒေတွေကို ပထမဆုံးပြင်ဆင်တာဖြစ်တယ်။ လက်ရှိမြန်မာငွေရဲ့တန်ဖိုးနဲ့ ထမ်းဆောင်တဲ့အခွန်ငွေအဆမတန်ကွာခြားနေတာဖြစ်တဲ့ အတွက် လက်ရှိထမ်းဆောင်နေတဲ့ ငွေပမာဏ ထက်များတဲ့ငွေကို ပြင်ဆင်သတ်မှတ် မှာဖြစ်တယ်။ သေချာတာတခုကတော့ ပြည်သူတွေ ယခုထမ်းဆောင်နေရတဲ့အခွန်ငွေထက်ပိုမိုထမ်းဆောင်ကြရမှာဖြစ်တယ်။မြင့်မားလာတဲ့ ကုန်ဈေးနှုန်းတွေနဲ့ အညီအခွန်ထမ်းဆောင်ရမဲ့ငွေကိုလဲတိုးမြှုင့်ကောက်ခံမဲ့သဘောပါပဲ။ န၀တ လက်ထက်ကလဲ အခွန်ငွေတွေတိုးမြှင့်ကောက်ခံဖို့ဥပဒေတွေပြင်ဆင်ခဲ့ဖူးပါတယ်။ အစိုးရရဲ့အုပ်ချုပ်ရေးယန္တရားလည်ပတ်နိုင်ဖို့လုံလောက်တဲ့ အခွန်ဝင်ငွေတွေရမှလည်ပတ်နိုင် မှာဖြစ် တဲ့ အတွက် အစိုးရအတွက်အဓိကအရေးပါတဲ့ ဥပဒေတွေဖြစ်တယ်။ ရေနံနဲ့ သဘာဝ ဓါတ်ငွေ့ရောင်းချလို့ရ တဲ့ငွေတွေ၊ သယံဇာတပစ္စည်းတွေဖြစ်တဲ့ ကျောက်မျက် ရတနာ နဲ့ သစ်လုပ်ငန်းကရတဲ့ငွေတွေ ကိုဘယ်လိုအသုံးချတယ်ဆိုတာကိုပြည်သူတွေ မသိရပါဘူး။  ပိုမိုပြီးအခွန်ထမ်းရမှာဖြစ်တဲ့အတွက် ပြည်သူတွေအတွက်အကျိုးများစေမဲ့ဥပဒေ လို့ မပြော နိုင်ပါဘူး။ အထူးစီးပွားရေဇုံတွေမှာ ရင်းနှီးမြှုပ်နှံမဲ့သူများကိုတော့ နှစ်တိုနှစ်ရှည်ကာလတွေ သတ်မှတ်ပြီးအခွန်လွတ်ငြိမ်းခွင့်ပြုထားပါတယ်။ ထိုနည်းတူစွာမြေလွတ်မြေလတ်မြေရိုင်း ပြန်လည်နေရာချထားရေးအစီအစဉ်အရ စက်မှုဇုံတွေ၊ စိုက်ပျိုးရေးနဲ့မွေးမြူရေးလုပ်ငန်း တွေအတွက်လည်းထိုနည်းတူစွာအခွန်ကင်းလွတ်ခွင့်ပြုထားတာကိုတွေ့ရပါတယ်။ အဲဒီလို လုပ်ငန်းတွေကိုရင်းနှီးမြှုပ်နှံလုပ်ကိုင်နိုင်တဲ့သူတွေဟာ စစ်တပ်ပိုင် ဦးပိုင်ကုမ္ပဏီလီမိတက်၊ စစ်တပ်က အာဏာရှိသူများနဲ့နီးစပ်တဲ့စီးပွားရေးလုပ်ငန်းရှင်တွေ၊ သားသမီးမြေးမြစ်စတာ တွေပါဝင်ပါတယ်။ ဒီလိုငွေအရင်းအနှီးများစွာမြှုပ်နှံလုပ်ကိုင်နေသူတွေက အခွန်ကင်းလွတ်ခွင့် ကိုဥပဒေလက်တလုံးခြားရနေပြီး၊ သာမန်ပြည်သူများက တနင့်တပိုးထမ်းဆောင်ရမယ်ဆို တာက ဥပဒေအရာမှာမျှတမှုမရှိဘူးလို့ပြောရမှာပါ။

စက်မှုဇုံတွေ၊ အထူးစီးပွားရေးဇုံတွေတည်ထောင်တာကလဲ မြေရိုင်းတွေကိုခုတ်ထွင်ရှင်းလင်း ပြီးမြို့သစ်တွေပေါ်ပေါက်လာအောင်ဆောင်ရွက်တာမဟုတ်ပဲ တောင်သူလယ်သမားတွေ ချွေးမြေကျအောင် ခုတ်ထွင်ရှင်းလင်းပြီးသားနေရာတွေကို အဓမ္မသိမ်းယူပြီးဆောင်ရွက်နေ တာဖြစ်တယ်။

လယ်ယာမြေတွေနဲ့ပတ်သက်လို့ နိုင်ငံတော်က လိုအပ်ရင်လိုအပ်သလိုအသုံးချနိုင်မဲ့ ဥပဒေကိုပြင်ဆင် ပြဌာန်းဖို့ လုပ်ကိုင်ဆောင်ရွက်နေတာကိုလဲကြားသိရပါတယ်။

ကုလသမဂ္ဂလူ့အခွင့်အရေးကောင်စီရဲ့ မြန်မာနိုင်ငံဆိုင်ရာ အထူးကိုယ်စားလှယ်ကို မြန်မာနိုင်ငံလာရောက်ခွင့်ပြုတာ ကတော့ကောင်းမွန်တဲ့ဆုံးဖြတ်ချက်ဖြစ်ပါတယ်။

ကင်တားနားရောက်လာပြီး နိုင်ငံခြားရေးဝန်ကြီးဦးဝဏမောင်လွင်၊ ပြည်ထဲ ရေးဝန်ကြီးဌာနက ဦးကိုကို၊ ရဲချုပ်ကိုယ်စား ဒုရဲချုပ်ဖြစ်တဲ့ရဲမှူးချုပ်ဇော်ဝင်း၊ တရားသူကြီး ချုပ် ဦးထွန်းထွန်းဦး၊ ရှေ့နေချုပ်ဒေါက်တာထွန်းရှင်၊အလုပ်သမားဝန်ကြီးဌာန၀န်ကြီး ဦးအောင်ကြည်နဲ့ ကာကွယ်ရေးဝန်ကြီးဌာန၀န်ကြီး ဗိုလ်ချုပ်လှမင်းတို့နဲ့တွေ့ဆုံခဲ့တယ်လို့သတင်းထုတ်ပြန်ပါ တယ်။မြန်မာနိုင်ငံအတွင်းမှာဖြစ်ပျက်နေတဲ့ကလေးစစ်သားကိစ္စ၊ အလုပ်သမားအဖွဲ့အစည်း တွေပေါ်ပေါက်ရေးကိစ္စနဲ့ မှုခင်းတွေမစစ်ဆေးမီရန်ကုန်တိုင်းရဲ အထူးသတင်းတပ်ဖွဲ့ရဲ့ နှိပ်စက်ညှင်းပန်းမှုတွေ၊ တရားရုံးတွေမှာ ပြဌာန်းဥပဒေများနဲ့ညီညွတ်ခြင်းမရှိတဲ့ကိစ္စရပ် တွေကိုဆွေးနွေးကြလိမ့်မယ်လို့ယူဆရပါတယ်။

ဒီလိုဆွေးနွေးတဲ့အခါ အစိုးရသစ်ရဲ့ဝန်ကြီး များနဲ့တာဝန်ရှိသူများက လုပ်ငန်းကော်မတီတွေ ဖွဲ့ပြီးပြည်သူတွေရဲ့နစ်နာမှုတွေကို ဆောင်ရွက်ကုစားပေးမှာပါလို့ ပြန်လည် ဖြေကြားမှာပါ။ တကယ်တန်းပြည်သူတွေရဲ့နစ်နာချက်တွေကိုကုစားပေးတာမဟုတ်ပဲနိုင်ငံတကာကို မျက်လှည့်ပြဖို့လုပ်ဆောင်နေတာလားဆိုတာကိုလဲအောက်ပါအချက်တွေကို ကြည့်ရင်စဉ်းစား စရာတွေဖြစ်နေပါတယ်။

ဥပမာအားဖြင့်- နိုင်ငံသားများရဲ့မူလအခွင့်အရေး၊ဒီမိုကရေစီအရေးနဲ့လူ့အခွင့်အရေးဆိုင်ရာ ဥက္ကဌအဖြစ် ယခင်ကြံ့ဖွံ့အတွင်းရေးမှူးလုပ်ခဲ့တဲ့ ဦးဌေးဦးက ဥက္ကဌအဖြစ်ဆောင်ရွက်မှာဖြစ် ပြီး ပြည်သူတွေရဲ့တိုင်ကြားစာနဲ့အသနားခံစာဆိုင်ရာကော်မတီဥက္ကဌအဖြစ် မကွေးတိုင်း

ဒေသကြီးမဲဆန္ဒနယ်အမှတ် ၂ ကဦးအောင်ငြိမ်းက ဥက္ကဌအဖြစ်ဆောင်ရွက်မှာဖြစ်တဲ့အတွက် ကြံ့ဖွံ့ပါတီကယူနီဖေါင်းချွတ်တွေပဲ ဦးဆောင်မှာဖြစ်ပါတယ်။နောက်တခါ တရားစီရင်ရေးနဲ့ ဥပဒေရေးဆိုင်ရာကော်မတီဥက္ကဌအဖြစ် ကန်ပက်လက်မဲဆန္ဒနယ်မှ သူရဦးအောင်ကိုကဥက္ကဌ အဖြစ်ဆောင်ရွက်မှာဖြစ်တယ်။ အမှန်တကယ်ဖြစ်သင့်တာက ဥပဒေကိုကျွမ်းကျင်နားလည်တဲ့ အငြ်ိမ်းစား တရားသူကြီးချုပ်တဦးဦးဒါမှမဟုတ် ရှေ့နေချုပ်ရုံးက ဥပဒေနဲ့နီးစပ်သူတဦးဦးဖြစ် သင့်တာပါ။

လွှတ်တော်ရေးရာလုပ်ငန်းကော်မင်္တီ တွေဖွဲ့ပြီး လူ့အခွင့်အရေးချိုးဖေါက်မှုတွေကို တကယ် အရေးယူတော့မလို လုပ်ပြလိုက်တာကို နိုင်ငံတကာအစိုးရများနဲ့ အစိုးရမဟုတ်တဲ့ အဖွဲ့ အစည်းများက အရင်း အမြစ် ကို မသိပဲကြိုဆိုလိုက်ရင်ဖြင့် အမှားကြီးမှားမှာပါ။ လယ်ယာမြေတွေကိုသိမ်းယူတဲ့ကိစ္စ တော်တော်များများမှာ ကြံ့ဖွံ့အဖွဲ့ဝင်တွေနဲ့ အာဏာပိုင် တွေပူးပေါင်းပြီးလုပ်ဆောင်ကြ တာဖြစ်တယ်။ဧရာဝတီတိုင်းမှာ သူရဦးရွှေမန်းရဲ့သား အောင်သက်မန်းပိုင်တဲ့ဧရာရွှေဝါ ကုမ္ပဏီ၊ ရန်ကုန်တိုင်းအတွင်းမှာ ဇေကမ္ဘာဦးခင်ရွှေက မြို့ပြစီမံကိန်းတွေအတွက်သိမ်းယူတဲ့ လယ်ယာမြေ၊ယုဇနဦးဌေးမြင့်ရဲ့ကုမ္ပဏီနဲ့ထူးကုမ္ပဏီက ကချင်ပြည်နယ်မြစ်ဆုံနဲ့ဟူးကောင်း တောင် ကြားမှာ မြေယာတွေသိမ်းယူတဲ့ကိစ္စတွေဟာ ကြံ့ဖွံ့ပါတီနဲ့တနည်းမဟုတ်တနည်း ဆက်စပ် နေတဲ့သူတွေဖြစ်တာကိုတွေ့ရမှာပါ။ အစိုးရသစ်အနေနဲ့လုပ်ငန်းကော်မတီတွေဖွဲ့ စည်းပြီး၊ ဥပဒေအသစ်တွေပြဌာန်းယုံနဲ့ ပြုပြင် ပြောင်းလဲရေးတွေဆောင်ရွက် လို့မရ ပါဘူး၊ ဥပဒေပြဌာန်း ချက်တွေကို မျက်နှာကြီး ငယ်မ လိုက်ပဲလက်တွေ့လိုက်နာ အကောင် အထည် ဖေါ်မဲ့ သူများ လိုအပ်သလိုပြည်သူတွေ ယုံကြည်လောက်တဲ့ လုပ်ဆောင် မှုတွေပြသဖို့အထူး လိုအပ်ပါကြောင်းတင်ပြလိုက် ရပါတယ် ခင်ဗျား။