ရှေ့နေဦးမင်းလွင်ဦး
ဥပဒေရဲ့အထက်မှာ စစ်တပ်နဲ့ဦးပိုင်ရှိတယ်။
ဥပဒေရဲ့အထက်မှာ စစ်တပ်နဲ့ဦးပိုင်ရှိတယ်။
အစိုးရသစ်အနေနဲ့ နိုင်ငံတကာကြားကောင်းအောင်၊ နိုင်ငံတကာချေးငွေများ ရအောင်၊ ကုလသမဂ္ဂကိုအကြောင်းပြကောင်းအောင် ဆင်းရဲမွဲတေမှုတိုက်ဖျက် ရေးအတွက် ဦးဆောင်ကြိုးပမ်းနေတယ်လို့ဟန်ပြပြောဆိုနေပါတယ်။
အဓိကကျတဲ့ တောင်သူလယ်သမားများအေးချမ်းစွာလယ်ယာမြေစိုက်ပျိုး စားသောက် နိုင်ရေးကိုတော့ ဆောင်ရွက်ပေးခြင်းမရှိသေးပဲ အာဏာပိုင်များ ပါဝင်တဲ့စစ်တပ်နဲ့ စစ်တပ်က ဖွဲ့စည်းတည်ထောင်ထားတဲ့ ဦးပိုင်လီမိတက်က လယ်ယာမြေတွေကို သိမ်းယူနေဆဲ၊ဖိနှိပ်မှု
တွေကျူးလွန်နေဆဲ ဖြစ်တာကိုတွေ့ရမှာဖြစ်တယ်။
၁၉၉၇ ခုနှစ်မှာ အောင်မြေကုန်းရွာ အနီးမှာ ကာကွယ်ရေးပစ္စည်းစက်ရုံ တည်ဆောက်မယ် လို့အကြောင်းပြပြီး လယ်သမားတွေထံကနေ မြေဧက ၂၅၀ ကျော်ကိုသိမ်းခဲ့ပါတယ်။ ရွာသူရွာသားတွေ ကိုစစ်တပ်က သူတို့  ခိုင်းစေတာ တွေကိုမလုပ်တဲ့အတွက်ဆိုပြီး မိသားစု ၁၇ စုကို အိမ်တွေ ပေါ် ကနှင်ချပီး ရွာကိုလည်း ဖျက်ဆီးပစ်ခဲ့ပါတယ်။
နောက်ပိုင်းမှာ ရွာပေါင်း ၁၃ ရွာက လယ်သမားတွေပိုင်တဲ့ လယ်မြေဧက ၂၃၇၀၀ ကိုသိမ်း ယူခဲ့ ပါတယ်။ အဲဒိလိုသိမ်းယူခဲ့တဲ့လယ်ယာမြေတွေ အနက်ကပစ က၁၅ ဧကသိမ်းယူခဲ့ပြီး ဒီမြေတွေ ပေါ်မှာ တောင်သူလယ်သမားတွေကို ထွန်ယက် စိုက်ပျိုးစေပြီးထွက်လာတဲ့သီးနှံ တွေ ကို တပ်ရံပုံငွေဆိုကာ သီးစားခအဖြစ် သိမ်းယူပါတယ်။
တပ်စခန်းစတင်ဆောက်လုပ်တဲ့ အချိန်စပြီး ယနေ့ အထိရွာသားတွေအခမဲ့ အဓမ္မအလုပ် ခိုင်းစေခဲ့တာကိုခံခဲ့ရပါတယ်။
နောက်တခါ ၂၀၁၀ ခုနှစ် ဒီဇင်ဘာလမှာ ကံမမြို့နယ်စစ္စရံကျေးရွာက တောင်သူလယ်သမား များရဲ့ လယ်ယာမြေတွေကို ဦးပိုင်လီမိတက် ကသိမ်းယူဖို့ကြံစည်လုပ်ဆောင်တာကို တွေ့ရ ပါတယ်။
ဒီလိုတောင်သူလယ်သမားများရဲ့လယ်ယာမြေတွေကို အဓမ္မသိမ်းယူတဲ့ကိစ္စဟာ ၂၀၀၈ ခုနှစ် ဖွဲ့စည်းပုံအခြေခံဥပဒေပါ နိုင်ငံသားများရဲ့အသက်အိုးအိမ်စည်းစိမ်လုံခြုံစိတ်ချရမှုကို နိုင်ငံတော်ကစောင့်ရှောက်ထိန်းသိမ်းပေးရမှာပါ။
လယ်ယာမြေနိုင်ငံပိုင်ပြုလုပ်ရေးဥပဒေအရ လယ်ယာမြေတွေကိုသိမ်းယူမယ်ဆိုရင် လက်ရှိ လုပ်ကိုင်စားသောက်နေတဲ့ တောင်သူလယ်သမားများကို အသက်မွေးဝမ်းကျောင်းပြု နိုင်ဖို့ မိသားစုဦးရေနဲ့ညီမျှတဲ့လယ်ယာမြေကိုအစားပြန်လည်ပေးရမှာဖြစ်တယ်။ဒီလိုလုပ်ဆောင်ခြင်း မပြုပဲ လက်လွတ်စပယ်သိမ်းယူနေတာဟာ ပြဌာန်းထားတဲ့ဥပဒေတွေကို အာဏာပိုင်တွေ ကိုယ်တိုင်မျက်ကွယ်ပြုဆောင်ရွက်နေတာဖြစ်တယ်။
ဒါ့အပြင် တောင်သူလယ်သမားများစိုက်ပျိုးဖို့လိုအပ်တဲ့ အမတော်ကြေးငွေကို နိုင်ငံတော်က အတိုးနှုန်းသက်သာစွာနဲ့ ထုတ်ချေးပေးရမှာဖြစ်တယ်။ ဆင်းရဲမွဲတေမှုတိုက်ဖျက်ရေးကို အလုပ်ရုံဆွေးနွေးပွဲဆောင်ရွက်ပြယုံနဲ့ မဖြေရှင်းနိုင်ပါဘူး။ တောင်သူလယ်သမား အခြေခံလူ တန်းစားတွေ လိုအပ်တဲ့နေတဓူဝစားဝတ်နေရေး အဆင်ပြေဖို့ အပူအပင်ကင်းစွာနဲ့ လုပ်ကိုင် ဆောင်ရွက်နိုင်ဖို့ကို နိုင်ငံတော်အစိုးရကစီမံဖန်တီးဆောင်ရွက်ပေးရမှာပါ။
ခုတော့ အစိုးရသစ်ကဆင်းရဲ မွဲတေမှုတိုက်ဖျက်မယ်လို့ပြောနေတဲ့အချိန်မှာ စစ်တပ်ပိုင် ဦးပိုင်ကုမ္ပဏီလိမိတက်ကပဲ တောင်သူလယ်သမားတွေကိုပြန်ပေးဆွဲပြီး ခြောက်လှန့်ငွေ တောင်းယူနေတာဟာလက်ရှိအစိုးရသစ်ကိုအလေးထားစရာမလိုတဲ့သဘောတွေ့ရပါတယ်။
နိုင်ငံသားများအေးချမ်းသာယာရေးအတွက်တရားဥပဒေစိုးမိုးဖို့ရာဇ၀တ်မှုတွေကို တားဆီးဖို့ ပြည်သူ့ရဲတပ်ဖွဲ့ရဲ့တာဝန်ဖြစ်ပါတယ်။ နိုင်ငံသားတဦးကျူးလွန်တဲ့ရာဇ၀တ်မှုတွေကို တရား ဥပဒေနဲ့အညီဖမ်းဆီးနိုင်ခွင့်ဟာရဲတပ်ဖွဲ့မှာပဲ အခွင့်အာဏာရှိပါတယ်။ ဥပဒေနဲ့ဆန့်ကျင်နေတယ်ချိုးဖေါက်နေတယ်ဆိုရင် ရဲတပ်ဖွဲ့မှာ အမှုဖွင့်ပြီး ဥပဒေနဲ့အရေးယူ နိုင်ပါတယ်။ ဒါကတရားဥပဒေစိုးမိုးရေးအတွက် ဥပဒေပြဌာန်းချက်တွေဖြစ်တယ်။ နိုင်ငံသား တဦးကို အကြောင်းမဲ့ ၂၄ နာရီထက် ကျော်လွန်ပြီးဖမ်းဆီးချုပ်နှောင်ထားလို့မရဘူး၊ထိန်းသိမ်း ထားလို့မရဘူးလို့ ၂၀၀၈ ခုနှစ်ဖွဲ့စည်းပုံအခြေခံဥပဒေပါ နိုင်ငံသားများရဲ့ တရားဥပဒေဆိုင်ရာ အခွင့်အရေးမှာ ပြဌာန်း ထားပါတယ်။
ခုတော့ တရားဝင်ဖမ်းဆီးအရေးယူနိုင်တဲ့ ရဲတပ်ဖွဲ့ကဥပဒေနဲ့အညီဖမ်းဆီးတာမဟုတ်ပဲ ဦးပိုင် ကုမ္ပဏီလီမိတက်တာဝန်ရှိသူ ရဲ့အမိန့်နဲ့ သြဂုတ်လ ၁ ရက်နေ့က ဧရာဝတီတိုင်း ဖျာပုံ ခရိုင်၊ ဒေးဒရဲမြို့နယ်အတွင်းရှိ ကျေးရွာ ဥက္ကဋ္ဌများက အစည်းအဝေးလုပ် မယ်လို့ပြောဆိုပြီး အင်းဒူး၊ ကုန်းတန်း၊ မှော်ဘီစု၊ မှော်အိုင်၊ နောက်ပြန်ဒိုး၊ ကဒါကျေးရွာများနှင့် ကျိုက်လတ် မြို့နယ် ကျေးရွာများက အကြွေးပြန် မဆပ်နိုင်ကြတဲ့ လယ်သမားတွေကိုခေါ်ယူ ခဲ့ပါတယ်၊ အစည်းအဝေးတက်ဖို့လာရောက်တဲ့တောင်သူလယ်သမားတွေကို ဒေသဆိုင်ရာ အာဏာပိုင် အချို့နဲ့ ဦးပိုင်အမှုထမ်း များက နောက်ပြန်ဒိုး တန်တရာဆန်စက် ဂိုဒေါင်မှာ ဖမ်းဆီးထိန်းသိမ်း ပြီး ချေးငွေကိုအဓမ္မပြန်ဆပ်ခိုင်းခြင်းတာ ဖြစ်တယ်။ ဒီလို ဥပဒေမဲ့ ဖမ်းဆီးပြီး အဓမ္မငွေတောင်း ခံတဲ့ကိစ္စကိုသက်ဆိုင်ရာအာဏာပိုင်များကအရေးမယူပဲ လက်ပိုက်ကြည့် နေတာဟာဖွဲ့စည်းပုံ အခြေခံဥပဒေပါ နိုင်ငံသားများရဲ့အခွင့်အရေး ပြဌာန်းချက်တွေကိုအာဏာပိုင်များကိုယ်တိုင်က ကျူးလွန် ဖေါက်ဖျက်လိုက်တာဖြစ်ကြောင်း သိသာထင်ရှား စေပါတယ်။
တောင်သူလယ်သမားများကိုချေးထားတဲ့ငွေပြန်ရလိုရင် တရားမကြောင်းအရ ချေးငွေပြန်လည် ရလိုမှုနဲ့တရားစွဲဆိုပြီးတောင်းယူရမှာဖြစ်ပါတယ်။ ယခုလိုဖမ်းဆီးချုပ်နှောင်ပြီးကျန်ရစ်တဲ့ မိသားစုကို ငွေနဲ့ရွေးခိုင်းတာဟာ ပြန်ပေးမှုဖြစ်တယ်။ရာဇ၀တ်မှုကို ဦးပိုင်ကုမ္ပဏီတာဝန်ရှိသူ နဲ့ ၀န်ထမ်းတွေ ကျေးရွာဥက္ကဌ တွေပူးပေါင်းကျူးလွန်တာဖြစ်တယ်။ ဒီလိုကျူးလွန်တာကို ပြန် လည်လွတ်မြောက်လာတဲ့တောင်သူလယ်သမားများက အရေးယူဖို့ တိုင်တန်းအမှုဖွင့်ဖို့လို တယ်။ ရပ်ရွာအေးချမ်းရေးနဲ့ငြိမ်ဝပ်ပိပြားရေးကိုတာဝန်ယူထားတဲ့ ရဲတပ်ဖွဲ့အနေနဲ့ ထိုက်သင့် တဲ့ စုံစမ်းမှုတွေကို ပြုလုပ်ပြီးအရေးယူရမှာဖြစ်တယ်။
ရဲလက်စွဲအပိုဒ် ၆၉ အပိုဒ်ခွဲ(ဈ)မှာစခန်းမှူးရဲ့လုပ်ငန်းတာဝန်များနှင့်ပတ်သက်ပြီးဖေါ်ပြထား ရာမှာ ဖြစ်ပွားသောပြစ်မှုများကို ပေါ်ပေါက်အောင်စုံစမ်းစစ်ဆေး ခြင်း၊ပြစ်မှုကျူးလွန်သူများ ကိုဖေါ်ထုတ်ဖမ်းဆီး၍သက်သေအထောက်အထားများစုဆောင်းကာ တရားရုံးသို့တရားစွဲဆို တင်ပို့ခြင်းစသည်တို့ကိုလုပ်ဆောင်ရမှာဖြစ်ပေမဲ့ ရဲတပ်ဖွဲ့က စစ်တပ် ပိုင်ဦးပိုင်ကုမ္ပဏီက တရားဥပဒေမဲ့ လုပ်ဆောင်ခြင်းကို အရေးယူဆောင်ရွက်ခြင်းမရှိပဲ အကာအကွယ်ပေးထား သလိုဖြစ်နေပါတယ်။
စစ်တပ်နဲ့ဦးပိုင်ကုမ္ပဏီကလူပေါင်း ၁၀၀ နီးပါး ပြန်ပေးဆွဲသလိုဖမ်းဆီးထားပြီးခြိမ်းခြောက် ချေးငွေတောင်း တဲ့ကိစ္စဟာအာဏာပိုင်များကိုယ် တိုင်ကျူးလွန်တဲ့ လူ့အခွင့်အရေး ချိုးဖေါက် မှု နဲ့ ရာဇ၀တ်မှု ဖြစ်တဲ့အပြင် ၂၀၀၈ ခုနှစ် ဖွဲ့စည်းပုံအခြေခံဥပဒေအရ နိုင်ငံသား တိုင်း ဟာ ဥပဒေဆိုင်ရာ အခွင့်အရေးတွေမှာ တန်းတူညီမျှဖြစ်တယ်လို့ဖေါ်ပြထား တဲ့ပြဌာန်းချက်နဲ့ ဆန့်ကျင်နေ ကြောင်းတင်ပြလိုက်ရပါတယ် ခင်ဗျား။
0 comments:
Post a Comment