Friday, May 18, 2012

Filled Under: , ,

VOA တိုက်ရိုက်လေလှိုင်း ... 18 May 2012

 
VOA တိုက်ရိုက်လေလှိုင်း 

12 May 2012 (Evening Broadcast)

ဒီနေ့ဆွေးနွေးမဲ့အကြောင်းအရာကတော့ မြန်မာနိုင်ငံမှာ အခုလက်ရှိတရားစီရင်ရေးစနစ် ဟာ ဒီမိုကရေစီ ဖော်ဆောင်နေတဲ့လမ်းကြောင်းနဲ့ကိုက်ညီနေရဲ့လား ဆိုတာကိုပထမ မေးထား ပါတယ်။ ဆိုတော့ ဒီခေါင်းစဉ်ရဲ့ ပထမပိုင်းကို ဘယ်သောတရှင်ကမှ ကိုက်ညီ တယ်လို့မပြောကြပါဘူး။ ဆိုတော့ ကိုက်ညီမညီဆွေးနွေးနေရင် အချိန်ဖြုန်းတဲ့ ဟာဘဲ ဖြစ်ပါလိမ့်မယ်။ ဆိုတော့ ဒုတိယ ပိုင်းဖြစ်တဲ့ မညီရင်ညီအောင်ဘယ်လို လုပ်ရမလဲ ဆိုတာ၊ ဘာတွေယို့ယွင်းနေသလဲ၊ ဘာကြောင့်မညီတာလဲဆိုတာ ကိုအဓိက ထားဆွေးနွေးမှာဖြစ်ပါတယ်ခင်ဗျာ။ 

ဒီကနေ့သောတရှင်တွေမေးမြန်းဆွေးနွေးကြမဲ့အထဲမှာကျတော့ တရားစီရင်ရေးနဲ့ ပက်သက်လို့ ကျွန်တော်တို့ရွေးထားတဲ့ ပင်တိုင်ဆွေးနွေးမဲ့ ပုဂိုလ်ကလည်း ဥပဒေပညာရှင်တွေဖြစ်ပါတယ်။ ကိုဇော်ဝင်းလှိုင် စာရင်းပြုစု ထားတဲ့ ပါဝင်ဆွေးနွေးမဲ့ သောတရှင်တွေကလည်း တော်တော်များရှေ့နေကြီးတွေဘဲဖြစ်နေတော့ ကျွန်တော် ထင်တယ် ကျွန်တော်တောင်လိုရဲ့လားလို့ ရှေ့နေကြီးတွေကို တင်ပေးလိုက်ပြီး ဆွေးနွေးသွားရင်တောင်တော်တော်ပြည့်စုံနေပြီလို့ ထင်ပါတယ်။ ကျွန်တော်တို့ရွေးထားတဲ့ ပုဂိုလ်နှစ်ဦးကတော့ ဦးမင်းလွင်ဦး အာရှလူ့အခွင့်အရေး ကောင်စီက လူ့အခွင့်အရေးရှေ့နေတဦးဖြစ်ပါတယ်။ အမျိုးသားဒီမိုကရေစီအဖွဲ့ချုပ်ရဲ့ ဥပဒေ အကြံပေးအဖွဲ့ဝင်တဦးဖြစ်တဲ့ ရှေ့နေကြီးဦးအောင်သိန်း ဖြစ်ပါတယ်။ နောက် ပါဝင်ဆွေးနွေးမဲ့သူတွေလည်းရှေ့နေတွေဖြစ်ပါတယ်။ 

ကျွန်တော်ဒီနေ့ပထမဦးဆုံးသောတရှင်တွေမေးတဲ့ အကြောင်းအရာထဲက စာနဲ့ စတင်  ဆွေးနွေးချင်ပါတယ်။ တခါတခါအရေးကြီးတဲ့ စာတွေကျန်ခဲ့တာရှိတော့။ ကျွန်တော်သောတရှင်တွေရဲ့စာတွေကိုလေ့လာကြည့်တဲ့အခါ တချို့ က မြန်မာနိုင်ငံမှာ တရားစီရင်ရေး ယိုယွင်းပျက်ပျားနေတဲ့အကြောင်းအရင်းဟာ အဓိကအားဖြင့် ဆန်းစစ် တဲ့ သောတရှင်နှစ်ဦးကို တွေ့ရပါတယ်။ တဦးကတော့ အထက်အာဏာ ပိုင်တွေ ရဲ့အလိုကျ အတိုင်း တရားသူကြီးတွေ၊ တရားရုံးတွေကဆောင်ရွက်နေတယ် ဥပဒေကို မကြည့်ကြဘူး။ သောတရှင်ဒေါ်နွဲ့စန္ဒီသန်းဆိုတဲ့ အမျိုးသမီးတဦး မြန်မာပြည်က လက်ရေးနဲ့ ရေးပို့တဲ့ စာထဲမှာတော့ မြန်မာနိုင်ငံရဲ့တရားစီရင်ရေးဟာ စစ်အစိုးရ လက်ထက် ကနဲ့ အရပ်သားအစိုးရဆိုတဲ့လက်ထက်နဲ့အတူတူပါဘဲတဲ့။ ဘာကြောင့်လဲဆိုတော့ နိုင်ငံတော်အကြီးအကဲများရဲ့အလိုကျ သက်ဆိုင်တဲ့လူတွေက လူတွေကို ညှင်းပန်းခြိမ်းခြောက်ပြီးတော့ အဓမ္မနည်းနဲ့ဖြောင့်ချက်တွေရယူတယ်။ အဓမ္မဖြောင့်ချက်မှာ အခြေခံပြီးတော့ ပြစ်ဒဏ်ချမှတ်တယ် ဆိုပြီးတော့ ပေးထား ပါတယ်။ နမူနာအားဖြင့် မကြာသေးခင်က သေဒဏ်ချမှတ်ခြင်းခံရတဲ့ ဖြိုးဝေအောင် ကိစ္စကို သူဖော်ပြထားပါတယ်။ တရားစီရင်ရေးမှာပါတဲ့ အမြင့်ဆုံးပုဂိုလ်တွေဆိုတာလဲ စစ်တပ်ဘက်က အသွင်ကူးပြောင်းထားတဲ့လူတွေဖြစ်လို့ ဘာမှမပြောင်းလဲဘူးလို့ ဆိုထားတာဖြစ်ပါတယ်။ နောက်တယောက် မောင် ဥပဒေ ဆိုတာ ဆွေးနွေးထားတာက အာဏာရှင်စနစ်ဟာအမြစ်မပျက်သေးဘူးဆိုတာက အဓိကပါဘဲ။ ဆိုတော့ အာဏာရှင် စနစ်ကို ပြည်သူ့ အာဏာတော်လှန်ရေးနဲ့မဖယ်ရှားပြစ်နိုင်ရင် တော်တော်နဲ့ဖြစ်မှာ မဟုတ်ဘူး ဆိုတာကိုဆွေးနွေးထားတာတွေ့ရပါတယ်။ ဆိုတော့အကြောင်းအရင်တွေကိုဆန်းစစ်တာဖြစ်ပါတယ်။  Panel ဆွေးနွေးမဲ့ လူနှစ်ဦးအနေနဲ့ ဘယ်လိုသဘောရပါသလဲ။ 

ဦးအောင်သိန်းခင်ဗျာ။ စောစောက သောတရှင်တွေရေးထားတာ မြန်မာနိုင်ငံမှာတရားစီရင်ရေးဟာ အံဝင်ခွင်ကျဖြစ်နေတယ်။ ပျက်စီးယို့ယွင်းဖြစ်နေတဲ့ ဆိုတာပြောတဲ့သောတရှင်နှစ်ဦးဆွေးနွေးတာ ဘယ်လိုမြင်ပါသလဲခင်ဗျာ။

ဦးအောင်သိန်း ။    ။ မှန်ပါတယ်ခင်ဗျာ။ ဘာဖြစ်လို့လဲဆိုတော့ ကျွန်တော်တို့နိုင်ငံက ၆၂ ခုနှစ်တုန်းက စစ်တပ်က အာဏာသိမ်းပြီးနောက်မှာ ကျွန်တော်တို့တွေက စစ်ကျွန် ဘ၀ ရောက်သွားတဲ့အချိန်ကစပြီးတော့ ဒီမိုကရေစီအုပ်ချုပ်ရေးနဲ့ တရားစီရင်ရေးဟာ လုံးဝပျက်စီးသွားတယ်ဆိုတာ ယခုဆိုရင်နှစ် ၅၀ ကျော်ခဲ့ပြီပေါ့ခင်ဗျာ။ ဆိုတော့ စစ်တပ်က ကျွန်တော်တို့ကို မြန်မာနိုင်ငံမှာ နှစ်ခါ အာဏာပြန်သိမ်းခံရတာလဲရှိတယ်။ အဲဒီတော့ မြန်မာနိုင်ငံမှာ ကျွန်တော်တို့ အုပ်ချုပ်ရေးစနစ်ဟာ အလွန်မှ ပျက်စီးယို့ယွင်း သွားပြီဖြစ်ပါတယ်။ ဒီတော့ ရှင်းရှင်းပြောရရင် အဆင်းရဲဆုံး  ဘ၀ရောက်သွားခဲ့ တယ် ဆိုတဲ့ သာဓကတွေလည်းရှိတာဘဲလေ။ အဲဒီတော့ ကျွန်တော်တို့က စစ်အာဏာရှင် ရဲ့တရားစီရင်ရေးစနစ်တွေနဲ့ သွားနေရတယ်ဆိုတဲ့ သဘောပြနေရတဲ့အတွက်လည်း အဲဒါမှန်တယ်လို့ဘဲ ကျွန်တော်ပြောချင်ပါတယ်။

မေး ။         ။ဟုတ်ကဲ့ ဦးမင်းလွင်ဦးကော ဘယ်လိုဖြည့်စွက်ပြောချင်ပါသလဲခင်ဗျာ။ ဒီလိုတရားစီရင်ရေးစနစ်ယို့ယွင်းနေရတာ။ ဦးမင်းလွင်ဦးကို ကျွန်တော်မမေးခင်မှာ သောတရှင်၂ ဦးအပြင်နောက်သောတရှင်ရေးတာတွေလည်းရှိနေသေးတယ်။ သံတာဝတီ သုတေတီ ဆိုတာရေးတဲ့ဟာရှိသေးတယ် ။ သံတာဝတီဆိုတာ ချင်းတွင်း ဘက်က သူရေးထားတဲ့ အထိကစာက တရားစီရင်ရေးပျက်စီးခြင်းရဲ့ အဓိက အကြောင်းအရင်းကတော့ အမှုသည်တွေဘဲဖြစ်တယ်။ အခွင့်အရေး မတရား ယူချင်တဲ့ အမှုသည်တွေက တရားသူကြီးတွေကို လဒ်ထိုးတယ်။ ယှင်ပြိုင်ဘက် အမှုသည် ကလည်း မနေသာတော့ဘဲနဲ့ လဒ်ထိုးရပြန်တယ်။ နောက်ဆုံးတော့ များများပေးတဲ့ သူနိုင်တာဘဲဆိုတော့ ကျွန်တော်တို့ဒီမှာ စဉ်းစားကြည့်တယ်။ လာဘ်ယူတဲ့လူကအပြစ်လား။ လာဘ်ထိုးတဲ့လူက အပြစ်လား။ ကြက်နဲ့ ကြက်ဥ ဘယ်ဟာအရင်ဖြစ်သလဲဆိုတာ မျိုးဖြစ်နေပါတယ်။ ဆိုတော့ ဦးမင်းလွင်ဦး ဘယ်လိုထင်သလဲဆိုတာ ပြောပါအုန်းခင်ဗျာ။

ဦးမင်းလွင်ဦး ။      ။ ဟုတ်ကဲ့ပါ ကျွန်တော်တို့မြန်မာနိုင်ငံ ရဲ့တရားစီရေးရေးစနစ်က စောစောက ဆရာဦးအောင်သိန်းပြောသွားသလိုဘဲပေါ့နော်၊ ၁၉၆၂ ကနေစပြီးတော့ ယို့ယွင်းလာခဲ့တာ ကျွန်တော်တို့ ယနေ့အချိန်အထိ ဆိုရင်တော်တော် ကြောက်စရာ ကောင်းတဲ့ အခြေအနေတစ်ခုဖြစ်တယ်ဆိုတာ ကျွန်တော် ပထမဆုံးပြောချင်ပါတယ်။ အဲဒါဘာလဲဆိုတော့ ကျွန်တော်တို့ တရားစီရင်ရေးနဲ့ ဥပဒေရေးရာ ကော်မတီ ဥက္ကဌ  သူရဦးအောင်ကိုက ဒီဇင်ဘာ၂၉ ရက်နေ့မီဒီယာတွေနဲ့တွေ့ဆုံပွဲမှာ တည်ဆဲဥပဒေတွေ မှာ ဥပဒေတွေနဲ့မညီညွတ်ဘဲနဲ့ အဂတိလိုက်စားပြီး စီရင်ချက်တွေချမှတ်တဲ့ တရားသူကြီး တွေ ကို အရေးယူနိုင်မယ့် ဥပဒေတွေမျိုးသတ်သတ်မှတ်မှတ် ပြဌန်းထား ခြင်း မရှိသေးဘူး။ ဒါကြောင့်မို့လို့ ပြည်သူ့လွတ်တော်ကို တင်ပြပြဌာန်း နိုင်ရန်စီစဉ် လျှက်ရှိတယ်ဆိုတယ်ဆိုပြီးတော့ ထုတ်ဖော်ပြောလိုက်တာဟာ တော်တော်လေးကို စိတ်ပျက်စရာကောင်းတဲ့ဟာမျိုးဖြစ်သွားတယ်။ ကျွန်တော်တို့မြန်မာနိုင်ငံမှာယခင်ကတည်းက တရားစီရင်ရေးစနစ် ကို တရားရုံးချုပ်က နေပြီးတော့ လက်အောက်ခံ ရုံးအဖွဲ့အစည်းအသီးသီးကို အုပ်ချုပ်တဲ့ စည်းမျဉ်း စည်းကမ်း တွေရှိတယ်။ ကျွန်တော်တို့ဌာနဆိုင်ရာ စုံစမ်းစစ်ဆေး မှုတွေလုပ်တယ်။ နောက်ပြီးလို့ရှင်ရင် အပြစ်ရှိကြောင်းထင်ရှားရင် ပြစ်မှုဆိုင်ရာ ဥပဒေနဲ့ အရေးယူတယ်။ အပြစ်ပေးတယ်။ ဒါတွေရှိနေရဲ့သားနဲ့ အခုလိုမျိုးတရားစီရင်ရေးနဲ့ ဥပဒေရေးဆိုင်ရာ ဥက္ကဌကိုယ်တိုင်ကထုတ်ပြောတယ်ဆိုတဲ့အခါ သူကဘဲမသိလို့လားပေါ့။ ဒါက ကျွန်တော်တို့ကြောက်စရာကောင်းတဲ့အခြေအနေတခုဖြစ်တယ်။ အဲဒီလိုမျိုးပြောလိုက်တဲ့အခါမှာကျွန်တော်တို့ပြီးခဲ့တဲ့ ပြည်သူ့လွတ်တော်အစည်း အဝေးမှာ ၀ိုင်း ပြီးတော့ ဆွေးနွေးကျတယ်ပေါ့ခင်ဗျာ။ ဆွေးနွေးကြတဲ့အခါမှာ တရားရုံးချုပ်တရားသူကြီးတယောက်ကလည်း ၀င်ပြီးတော့ပြောတယ်။ ဒါဟာအပြု သဘောဆောင်တဲ့အတွက် ကြိုသွားမှာဖြစ်တယ်ဆိုတော့ ရိသဲ့သဲ့နဲ့ ပြောလိုက်တဲ့ ပုံတော့ရှိတယ်ခင်ဗျာ။ မသိတာတော့မဟုတ်ဘူး။ ပြည်ထောင်စုလွတ်တော်ချုပ်တရားသူကြီး ဦးစိုးညွန့်ကနေပြီးတော့ ဒါက ဖြစ်နေတယ်။ သို့သော်လည်းဘဲ စစ်တပ်က အုပ်ချုပ်နေတဲ့သူတွေကို လက်ရှိတရားသူကြီးတွေကိုယ် တိုင်ကိုက မကျော်နိုင်ဘူးဆိုတာကိုရှင်းရှင်းလင်းလင်းကို ဖော်ပြလိုက်တယ် ဆိုတာ မျိုးဖြစ်တယ်လို့ ကျွန်တော်ကတော့ ထင်မြင်ယူဆပါတယ်။ ဒါကြောင့် လဒ်ပေးလဒ်ယူမှုကိုတိုက်ဖျက်မယ်ဆိုလို့ရှင်ရင် ဒီတရားစီရင်ရေးနဲ့ဆိုင်တဲ့ ကိစ္စရပ်တွေမှာ ဘာမှတရားစီရင်ရေးနဲ့မဆိုင်တဲ့ စစ်တပ်ကလူတွေကို ဘေးဖယ်ပြီးတော့ ဥပဒေပညာ ကျွမ်းကျွမ်းကျင်ကျင်တက်ကျွမ်းတဲ့လူတွေနဲ့ စီမံဆောင်ရွက်မှဖြစ်လိမ့်မယ် လို့ ကျွန်တော်က အကြံပြုချင်ပါတယ်။

မေး ။         ။ ဟုတ်ကဲ့။ အဲဒီတော့ လဒ်ပေးလဒ်ယူမှုရယ် နိုင်ငံရေးအာဏာအရ အုပ်ချုပ်ရေးပိုင်းက တရားစီရင်ရေးကိုလွမ်းမိုးနေတာပေါ့ခင်ဗျာ။ separation of power မပျက်ဘူး။ Judiciary ကိုလည်း executive   branch ပိုင်းကလွမ်းမိုးထားတာ ကိုလည်း တွေ့ရတယ်ဆိုတော့ အခုလိုတရားစီရင်ရေးအာဏာဟာသီးခြား လွတ်လပ်စွာ ရပ်တည်မှုမရှိတာတပိုင်း၊ လဒ်ပေးလဒ်ယူမှုရှိတာတပိုင်း၊ လို့ကျွန်တော်ပြန်ပြီး စဉ်းစားမိပါတယ်။ ဆိုတော့ကျွန်တော်တို့ သုံးသပ်တဲ့အပိုင်းမှာပြန်ပြီးဆွေးနွေးကြပါစို့။
အခုပါဝင်ဆွေးနွေးဖို့ စာရင်းပေးထားတဲ့ရှေ့နေကြီးတွေကို ဖိတ်ခေါ်ရအောင် ခင်ဗျာ။
ပထမဦးဆုံး သူကတော့ ဦးအောင်ရိန်ထွန်းဖြစ်ပါတယ်။ ဦးအောင်သူရိန်ထွန်းရဲ့သဘောထားကို ကြားပြရစေ။

ဦးအောင်သူရိန်ထွန်း ။     ။စောနတုန်းကဆွေးနွေးသွားတဲ့ အချက်ထဲမှာဘဲပါသွားတယ် အမှုသည်တွေလည်း အဓိကကျတယ်လို့ ပါတယ်။ နောက်တချက်က လိုအပ်တဲ့ ဥပဒေတွေ၊ လိုအပ်တာထက်များနေတာတွေပါတယ်။ ရှုတ်ထွေးလှတဲ့ တရားစီရင်ရေးစနစ်မှာ အမှုကိစ္စတစ်ခုထဲမှာတောင်မှာ ဥပဒေ ၂မျိုး၊၃ မျိုးရှိတာကိုတွေ့ရတယ်။ ဥပဒေတခုက အပြစ်မရှိဘူးဆိုရင်အခြားဥပဒေတခုက အပြစ်ရှိအောင် လုပ်ထားတာမျိုးတွေတွေ့နေရတယ်။ အဲဒီလိုဖြစ်နေရင် ဥပဒေထိန်းသိမ်း ရေးမှာတာဝန်ယူတဲ့ ရဲတွေ၊တရားရုံးတွေက သူတို့ သဘောအတိုင်း ကြိုက်သလို ဆုံးဖြတ် နေမှာဖြစ်တယ်။ သူတို့ဟာတကယ်တန်းအပြစ်ရှိသူကိုတောင် ဥပဒေကနေ လက်တလုံးခြားလွတ်အောင် လုပ်ပေးနိုင်သလို ၊အပြစ်မကျူးလွန်သူကိုလည်း ဥပဒေနဲ့ မငြိငြိအောင် အရေးယူနိုင်တဲ့သဘော မျိုးတွေရှိနေတယ်။ တရားစီရင်ရေးစနစ်မှာ အခုလိုအားနည်းနေတာကို အခွင့်ကောင်းယူပြီးတော့ ငွေကြေးတတ်နိုင်တဲ့ ရာဇ၀တ် သားတွေက လဒ်ထိုးကြတယ်။ ဒီဟာက တရားစီရင်ရေး မိုင် ချစားမှု တွေဖြစ်လာတယ်။ ဒါကိုကြည့်ရင်တရားစီရင်ရေိးုင် ချစားလာတဲ့ အဓိကကြောင်းအရင်းက ဥပဒေကိုလိုအပ်တာထက်ပိုများစေတဲ့အကြောင်းအရင်းလည်းဖြစ်လာပါတယ်။ နောက်တခုက ကျွန်တော်တို့ အမှုသည်တွေ၊လူထုကိုတိုင် အရိုးစွဲနေတဲ့ ကိစ္စကတော့ ပိုက်ဆံမပေးရင် ငါတို့ဒီအမှုက လွတ်မြောက်ပါ့မလား၊ ငါတို့ဒီအမှုကို နိုင်ပါ့မလားလို့ ဒီလိုခံယူနေတယ်။ ဒီ့ထက်ပိုဆိုးတဲ့အချက်က တချို့တရားရုံးတွေမှာဆိုရင် ပေါက်ဈေး ဆိုတာတောင်ပေါ်နေတယ်။ ဘယ်လိုပေါက်ဈေးမျိုးလဲဆိုရင် အမှူလက်ခံဖို့ ကိစ္စဆိုရင် ဈေးတမျိုး၊ ဒါဟာအမိန့် ချဖို့မပါသေးဘူးလို့တရားခွင်စာရေးတွေကိုတိုင်က ညှိနိူင်းပြီး တော့ ဆောင်ရွက်တဲ့ကိစ္စမျိုးတွေကိုတိုင်ရှိတာ နောက်ဆုံးမှာ တရားသူကြီးကိုတိုင်က သူ့ရှေ့မှာ ပြောင်ပြောင်တင်းတင်းပြောနေတာ ။ အမှုသည်နဲ့ ရှေ့နေကိုပြောတယ် စာရေးနဲ့ ဘဲ ညိုလိုက်ပါဆိုတဲ့ ကိစ္စမျိုးတွေတောင်ဖြစ်လာတယ်။
ဒါတွေဟာ အမြစ်တွယ်လာတာ။ ဘယ်ကတည်းက အမြစ်တွယ်လာသလဲဆိုတာ လွန်ခဲ့တဲ့ နှစ် ၆၀ လောက်ကတည်းက အမြစ်တွယ်လာတာဖြစ်တဲ့အတွက် တော်တော်နဲ့ တော့ လွယ်မဲ့ ကိစ္စမျိုးမဟုတ်ဘူးလို့ ကျွန်တော့အနေနဲ့ ဒီလိုထင်ပါတယ်ခင်ဗျာ။
မေး။  ။ဟုတ်ကဲ့ ဦးအောင်ရိန်ထွန်းကို ကျေး ဇူးတင်ပါတယ်။ ရှေ့နေကြီးများကို ခဏရပ်ပြီးတော့ အမျိုးသမီးတဦးကို ကျွန်တော်ဖိတ်ခေါ်လိုပါတယ်။
ယခုနောက်တခါ ဆွေးနွေးမဲ့ ပုဂိုလ်ကတော့ မထွေးဖြစ်ပါတယ်ခင်ဗျာ။ မထွေးကြားပါသလား။ ဟုတ်ကဲ့ဆွေးနွေးပါခင်ဗျာ။

မထွေး ။      ။ ခုနကပြောသွားတဲ့အထဲမှာဆိုရင် စစ်အစိုးရ၊မြန်မာအစိုးရ ပြောင်းလဲထားတဲ့ စနစ်မှာ အတူတူဘဲဆိုတာ ကျွန်မထောက်ခံပါတယ်ရှင့်။ ဘာဖြစ်လို့လဲဆိုရင် ကျွန်မနားလည်သလောက်ပြောရမယ်ဆိုရင် ဒီမိုကရေစီစနစ်ဟာ လူ့အခွင့်အရေးကို အခြေခံတဲ့ စနစ်ပါရှင့်။ အခု စစ်အစိုးရပြောနေတဲ့ ဒီမိုကရေစီစနစ်ဆိုရင်တော့ တရားစီရင်တဲ့ တရားရုံးဟာ ဥပဒေ ဘောင် ထဲမှာနေပြီး လူ့အခွင့်အရေး အလွန်ချိုးဖောက်နေပါတယ်ရှင့်။ ဘာကြောင့်လဲဆိုတော့ ဥပဒေအရ သက်သေခိုင်လုံမှုရှိဖို့ လူသက်သေနဲ့ စာသက်သေတွေကို တရားခံဘက်က တင်ပြထား တာတွေကိုလည်း လူသက်သေတွေ တရားရုံးမှာမလာရအောင် ဖိအားအမျိုးမျိုး ပေးနေ ပါတယ်ရှင့်။ နောက်ပြီးတော့ စာသက်သေတွေဆိုရင်လည်း တရားပြိုင်ဘက်က တင်ပြ ထားတာတွေကိုလည်း အမှန်တွေကို အမှားပြုလုပ်ပြီးတော့ တင်ပြထားပါတယ်ရှင့်။ ဒီတော့ တရားပြိုင်ဘက်က ရှုံးပြီးရင်းရှုံးနေတာ သူတို့ ဥပဒေတွေကိုလည်း လိုသလို ဆွဲပြီးတော့အမျိုးမျိုးလည်းလုပ်နေပါတယ်ရှင့်။

မေး ။         ။ဟုတ်ကဲ့မထွေး။ ဒီကိစ္စမှာ မထွေးပြောတဲ့အထဲမှာ ခုနကပြောတာက လဒ်ပေးတာအပြင် သက်သေတွေကို ချိန်းခြောက်ပြီးတော့မလာနဲ့ ဒါမျိုးတွေကို ကျွန်တော်လည်းမကြာခဏကြားရပါတယ်။ ပရိတ်သတ်တွေစီက သတင်းတွေထဲမှာ။ အထူးသဖြင့် နိုင်ငံရေးအငြိုးအတင်းရှိတဲ့ ကိစ္စတွေ ။ တချိန်တုန်းကဆိုလို့ရှင်ရင် အတိုက်အခံနိုင်ငံရေးဘက်က လုပ်ရှားမှုတွေနဲ့ ပက်သက်ပြီးတော့ ဒါမျိုးတွေလုပ်ခဲ့တာ အများကြီးရှိပါတယ်။ ဒါက ဘယ်လောက်တောင် ကျယ်ကျယ်ပြန့်ပြန့်ရှိပါသလဲခင်ဗျာ။ ဒါနဲ့ပက်သက်ပြီးတော့ ဦးအောင်သိန်းဆွေးနွေးပါခင်ဗျာ။

ဦးအောင်သိန်း ။    ။ နိုင်ငံရေးအငြိုးအတေးမှုတွေနဲ့ ပက်သက်တာကတော့ ကျွန်တော်တို့ ၂၀၀၈ မှာ အင်မတန်ကို တော်တော်များများကြုံခဲ့ရတဲ့ ကိစ္စတွေပါ။ ဘာဖြစ်လို့လဲဆိုတော့ ဒီသက်သေတွေက ဘာမှလည်းမသိ။ မသိတဲ့သက်သေတွေကို တရားရုံးတင်တယ်။ ရဲစက္ကူတွေအရ တရားခံရဲ့ဖြောင့်ချက်တွေနဲ့ သက်သေထွက်ဆိုပြီး ရဲအရာရှိကိုတိုင် တရားရုံးမှာထွက်တယ်။ ကျွန်တော်တို့က ကန့်ကွက်တယ်။ တရားသူကြီးကခွင့်ပြုတယ်။ နောက်ပြီးတော့ အဲဒီဖြောင့်ချက်တွေနဲ့ဘဲတရားခံကို ပြစ်ဒဏ်ပေးတယ်။ ဒီတော့ကျွန်တော်တို့က ပြစ်မှုနဲ့ပက်သက်ပြီးတော့ တရားစီရင်တဲ့အခါမှာ ကျွန်တော်တို့လွတ်လပ်တဲ့ တရားစီရင်ရေးစနစ် တခုပေါ်မှာ သွားတာမဟုတ်ဘူး။ ခင်ဗျာ။ နိုင်ငံရေးအမှုတွေနဲ့ပက်သက်ရင်တော့ အလွန်မှ ကျဉ်းကျပ်တဲ့ ကျွန်တော်တို့ဒီ ပရ၀န်အတွင်းမှာရှိတဲ့ လူထုနားမထောင်နိုင်တဲ့၊ အထူးသဖြင့် မိသားစုတောင်လာရောက်နားမထောင်ခွင့်မရှိတဲ့ တရားစီရင်ရေးတွေနဲ့ ပြစ်ဒဏ်စီရင်သွားတာတွေအရ ဒီ၈၈ မျိုးဆက်ကျောင်းသားတွေ၊ နောက် Activist တွေ၊ နောက် ရဟန်ဿးံဃံတွေအများကြီး ဘဲဗျာ။ ကျွန်တော်ပြီးတော့  ကျွန်တော်ကိုယ် တိုင်ပင် လျှင် အမှုပေါင်း ၁၅၀ ကျော်လောက် အဲဒီလိုအမှုတွေကို ဖြတ်သန်းခဲ့ရ တဲ့ အခါမှာ တပုံစံထဲနည်းနည်းကို အဲဒီလိုမျိုးတွေတွေ့ရတယ်။ ဘာဖြစ်လို့လဲဆိုတော့ အဲဒီအမှုအခင်းတွေဟာ ၂၀၀၇ ခုနှစ်အရေးအခင်းတွေဖြစ်တဲ့အတွက် ၂၀၀၈ခုနှစ်မှာ ဖမ်းတဲ့သူတွေဖမ်းဆီး ပြီးတရားရုံးမှာ အစုလိုက်အပြုံလိုက် တခါတည်းဆွဲတင်ပြီးတော့ ပြစ်ဒဏ်စီရင်ဖို့ဘဲ လုံးပမ်းတယ်ပေါ့ခင်ဗျာ။

မေး ။ ။ ဆရာဦးအောင်သိန်း အခုတော့ နိုင်ငံရေးနဲနဲပြေလည်လာတဲ့ သဘောကို တွေ့ရတယ်။စစ်အစိုးရဘက်က အငြိုးအတေးအထားခဲ့ဆုံးဖြစ်တဲ့ အမျိုးသား ဒီမိုကရေစီအဖွဲ့ချုပ်နဲ့ ပူးပေါင်းဆောင်ရွက်လာတာတွေကိုတွေ့လာရတယ်ဆိုတော့ အငြိုးအတေးနဲ့ ပြစ်ဒဏ်နင်းကန်ချမှတ်တဲ့ ကိစ္စတွေပေါ့ သွားနိုင်သလား ရှေ့ကို လျှော့သွားနိုင်တယ်လို့ဆရာမြင်မလား။  
ဦးအောင်သိန်း ။    ။လောလောဆယ်တော့ ထင်သလောက်မမြင်သေးပါဘူးခင်ဗျာ။ ဒီလိုအမှုမျိုးတွေဟာနောက်ဆုံး ဖြိုးဝေအောင်ကို သေဒဏ်ချလိုက်တဲ့အမှုမျိုးတွေကို ကြည့်ရင်သူဟာလွတ်လပ်တဲ့ တရားစီရင်မှုမျိုးကိုခံယူ ခြင်းမရှိဘူးဆိုတာကို ကျွန်တော်တို့ကို သက်သေပြနေတာဘဲ။

မေး။  ။ ဟုတ်ကဲ့ခင်ဗျာ။ ကျွန်တော်နောက်ဆွေးနွေးမဲ့ သူကိုဖိတ်ခေါ်လိုပါတယ်။ သူကတော့ ဦးကောင်းထက်ဦး။ သူလည်းဘဲနေပြည်တော်က ရှေ့နေတဦးဖြစ်ပါတယ်။ ဆွေးနွေးပါခင်ဗျာ။
ဦးကောင်းထက်ဦး။ ။ ဒီနေ့အစိုးရသစ်လက်ထက်မှာ ကျွန်တော်တို့ ဥပဒေပြုမဏ္ဍိုင် ဖြစ်တဲ့ လွတ်တော်ရဲ့လုပ်ဆောင်ချက်က ပြီပြီပြင်ပြင်နဲ့ တိုးတက်မှုတွေရှိလာနေတာကို တွေ့နေရပါတယ်။ ပါလီမာန်စနစ်နဲ့နေသားမကျသေးလို့ ၊အတွေ့အကြုံနည်းသေးလို့ အားနည်းချက်တွေရှိတယ်ဆိုပေမယ့်မကြာခင်မှာ ဘဲ လမ်းကြောင်းမှန်ပေါ်မှာ အောင်အောင်မြင်မြင်ချီတက်နိုင်တော့မယ်လို့ ယုံကြည်ပါတယ်။ အုပ်ချုပ်ရေးမဏ္ဍိုင်ကတော့ အပေါ်ကနေ အောက်ခြေအထိ တဖြည်းဖြည်းပြောင်းလဲ အောင်ကြိုးစားနေတာကိုတွေ့ရတယ်။ ဒါပေမယ့်အောက်ခြေမှာတော့ အုပ်ချုပ်ရေးဌာန ဆိုင်ရာတွေရဲ့ ဒဏ်တွေကို ပြည်သူတွေအလှူးအလိမ့်ခံနေရတုန်းပါဘဲ။ အဆိုးဆုံးက တော့ တရားရေးမဏ္ဍိုင်ပါဘဲ။ အဓိကတာဝန်ရှိနေတဲ့ ရဲတွေဥပဒေတာဝန်ရှိတွေ၊ တရားသူကြီးတွေ ရှေ့နေတွေ လျှောက်စားလိမ်စား ပေါင်းစားလုပ်နေကြလို့ အမှုတခုဖြစ်လာရင်တရားခံရော၊တရားလို ရောဖွတ်ဖွတ်ကြေအောင် ဖြစ်ရပါတယ်။
အပြင်မျက်နှာတခုလုံးကို ကြည့်ပြီးတော့ မရှိတဲ့အမှုကို ရှိအောင်လုပ်တယ်၊ ရှိတဲ့အမှုကို ပျောက်အောင်လုပ်တယ်။သေးတဲ့အမှုကို ကြီးအောင်၊ ကြီးတဲ့အမှုကို ငယ်အောင်လုပ်တယ်။  တရားလိုကိုတရားခံ ဖြစ်အောင်၊ တရားခံကို တရားလို ဖြစ်အောင်လုပ်တယ်။ နည်းမျိုးစုံသုံးပြီးတော့ ကလားပိုင်းချိုးတယ်။ ငွေမရှိတဲ့လူကတော့ ဘယ်လောက်ဘဲမှန်မှန် ရှုံးနေရောဘဲ။ ဒါကြောင့်ထောင်ထဲကိုတန်းဝင်ရော။ အမှုတည်ဆောက်တဲ့နေရာမှာ ဒီရဲတွေက အရေးကြီးသက်သေတွေကိုဖျောက်တယ်။ ဒါမှမဟုတ် တရားခံနဲ့ ညှိပြီးတော့ လိုသလိုဖြေရှင်းတယ်။ တခါတခါ မဆိုင်သူတွေရော ဆိုင်သူတွေရော သိမ်းကြုံးဖမ်းပြီးတော့ ပြန်ပေးဆွဲသလိုမျိုး။ တယောက်ချင်း ပိုက်ဆံပေးမှ ပြန်လွတ်ပေးတယ်။ ငွေပေးတဲ့ဘက်ကနေပြီးတော့ လိုသလိုအမှုကို စိတ်ကြိုက်လုပ်ပေးတယ်။ အဲဒီကစပြီးတော့ အမှုက ကမောက်ကမ ပြောင်းပြန် တွေဖြစ်ကုန် ကော။ ဥပဒေအရာရှိတွေ တရားသူကြီးတွေကလည်းဘဲ ငွေပေးနိုင် တဲ့အမှုတွေအရ ပုဒ်မအကြီးအသေးကို လိုသလိုတပ်ပေးတယ်။ အမှုကိုင်တဲ့ရဲနဲ့ အချိန်အဆက်လုပ်ပြီးတော့ တရားခံတရားလို၊ နှစ်ဖက်စလုံးကို စစ်တုရင်ကစားသလို လိုက်ချက်တယ်။ အရုပ်တွေနဲ့တူတဲ့ ဆင်းရဲသားတွေကတော့ လက်ရှိတရားရေးမဏ္ဍိုင် ရဲ့ တံစားခံ၊ ချကျွေးခံ ၊ အကျိတ်အနင်းခံရတဲ့ ဘ၀တွေဖြစ်ပါတယ်။ ပိုက်ဆံမရှိရင်ထောင်ထဲရောက် လူဆိုးသူခိုးတွေ အဖြစ် ကဗျည်းတပ်ခံရပါတယ်။ တကယ့် လူဆိုးတွေကတော့ ဘယ်တော့မှထောင်ထဲမရောက်ကြပါဘူး။ အဲဒါတွေကို ဒီကြားက ဘယ်သူတွေကလုပ်ပေးနေသလဲဆိုတော့ တရားသူကြီးတွေရဲ့ စာရေးစာချီ တွေက အဲဒါတွေကို ပွဲစားအဖြစ်လုပ်ပေးနေပါတယ်။ ရှေ့နေတွေဆိုတာလည်း မှန်မှန် ကန်ကန်လုပ်ရင်အလုပ်မဖြစ်ဘူး။ သူတို့နဲ့ပေါင်းစားမှအလုပ်ဖြစ်တယ်။ ပေါင်းမစားရင်မှန်ပေမယ့်ရှံးတယ်။ ဥပဒေတွေကလည်း တရားသူကြီးနဲ့ …………..
ရှင်းရှင်းပြောရရင်တော့ တရားစီရင်ရေးမ
န်တစ်ခုလုံး ရစရာမရှိအောင် ပျက်စီး နေပါတယ်။ ဥပဒေစိုးမိုးမှုဆိုတာမရှိပါဘူး။ လူတိုင်းမလုံခြုံသလိုခံစားနေရပါတယ်။ စနစ်ဆိုးရဲ့အမွေဆိုးတွေကို တာဝန်ရှိသူတွေ  စွန့်လွတ်သင့်ပါပြီ။ ဒါဟာ ဒီမိုကရေ စီလမ်းကြောင်းကို ပိတ်ဆို့ထားတဲ့ အနှောက်အယုက် ပယောဂတွေဖြစ်တယ်လို့ နိုင်ငံကို မဖျက်ဆီးသင့်ပါ ဘူးလို့ ပြောလိုပါတယ်ခင်ဗျာ

မေး ။ ။ ကျွန်တော်မေးချင်တာ “တရားခံရဲ့ရှေ့နေတွေဘက်ကကော” ဆိုတာကို ကျွန်တော်မေးချင်ပါတယ်ခင်ဗျာ။ ရဲတွေအမှုလိုက်အရာရှိတွေပျက်ဆီးတာ ဦးကောင်းထွတ်ပြောသလိုပါဘဲ။ ပြောတဲ့အထဲမှာပါသွားလို့ကျေးဇူးတင်ပါတယ်။ တရားခံရဲ့ရှေ့နေတွေကလည်း လဒ်ပေးလဒ်ယူ သံတရာ ထဲမှာပါဝင်ပတ် သက်နေကြတာပေါ့။ တရားခံဘက်က အကျိုးဆောင်ပေးတဲ့ရှေ့နေတွေကလည်းဘဲ။ အဲဒါတခုကို ကျွန်တော်ထည့်ပြောချင်ပါတယ်။

ဦးကောင်းထက်ဦး။ ။ စနစ်ကြောင့်လည်းသူတို့ကောင်းသလိုလုပ်နေရတာပေါ့ခင်ဗျာ။ မကောင်းရင်သူတို့ထမင်းငတ်မှာ။ တရားခံရှေ့နေမှာတွေကိုလည်း တရားသူကြီးတွေ ကိုလည်း အပေးအယူလုပ်စေချင်တယ်။ မဟုတ်ရင်လည်းတရားသူကြီးတွေကိုလည်း ဟိုရှေ့နေတွေကမကောင်းဘူး။ ဒီရှေ့နေတွေကကောင်းတယ်။ အဲဒီရှေ့နေဌားရင် ငါတို့တာဝန်မယူဘူး။ အဲဒါမျိုးဖိအားပေးကြတော့လည်း ခုနကပြောသလို ပုလင်းတူဘူးဆို့တွေဖြစ်ကုန်တာဘဲခင်ဗျာ။

ဟုတ်ကဲ့။ ကျွန်တော်နိဂုံးဆွဲချင်တာက ဆင်းရဲနွမ်းပါးမှုကလည်း တရားစီရင်ရေးမဏ္ဍိုင်ပျက်ပြားရခြင်းအကြောင်းအရင်း ဖြစ်တယ်။ သူတို့ကလည်း စားဝတ်နေရေးလုပ်စားမှုအတွက်ဖြစ်တယ်ပေါ့။ ထိုနည်းအတိုင်းဘဲ ဦးကောင်းထက်ဦးပြောခဲ့တဲ့အတိုင်းဘဲ ရဲတို့ အစိုးရအရာရှိတို့ ပြောသလို ကျွန်တော်တို့ကလည်း လခနဲ့ မလောက်လို့ စားရပါတယ်ဆိုရင် ဒါကိုကော ဘယ်လိုဖြေရှင်းရမလဲဆိုတာ။ အချိန်ရရင်နောက်ပိုင်းဆွေးနွေးကြပါစို.။
နောက်ဆွေးနွေးမဲ့အစီအစဉ် ကြီးတခုကျန်ပါသေးတယ်ခင်ဗျာ။ သူကတော့ ဦးမင်းသန့်ဇင်ဖြစ်ပါတယ်။ ကြားရပါသလား။ ဟုတ်ကဲ့ပြောပါ။ ဘယ်လိုများဆွေးနွေးလိုပါသလဲလို့။

ဦးမင်းသန့်ဇင် ။     ။ ဒီတရားစီရင်ရေးမဏ္ဍိုင်မှာ ပထမပိုင်းက ဆရာကြီးတယောက်ဆွေးနွေးသွားသလိုပါဘဲ ဒီပြည်သူတွေလဒ်ပေးတဲ့ ကိစ္စလည်းပါတယ်ခင်ဗျာ။ ဘာဖြစ်လို့ပါရတာလဲဆိုတော့ လဒ်ပေးလဒ်ယူကိစ္စမှာ လဒ်ပေးတဲ့လူရှိလို့သာ လဒ်ယူတဲ့လူဖြစ်လာတာလေ။ ဒီလဒ်ယူတဲ့လူက အပြစ်ရှိတယ်လို့နိုင်ငံတော်ကနေပြီးတော့ ဒီသက်ဆိုင်ရာ ဌာနဆိုင်ရာတွေက ဆုံစမ်းစစ်ဆေးမှုတွေကို လုပ်သလို ပြည်သူတွေရှေ့နေတွေ နဲ့ပေါင်းပြီး လဒ်ပေးတဲ့ကိစ္စတွေကို က ဖော်ထုတ်ပေးမယ်ဆိုရင် ဒီကိစ္စတွေကတရားစီရင် ရေး မဏ္ဍိုင်ကိုအထောက်အကူပြုပေးမယ်လို့ထင်ပါတယ်။ ဆိုလိုတဲ့သဘောက တရားခံဘက်ကလည်းသူ့အမှုကိုလွတ်အောင် ၊ တရားလိုဘက်ကလည်း တရားခံကို ရသင့်တဲ့သက်တာခွင့်တွေကို ရအောင်၊ ဆိုလိုတဲ့သဘောက အာမခံကိစ္စတွေကို ရအောင် သူ့အနေနဲ့ မရရှိအောင် တရားသူကြီးနဲ့ပေါင်းပြီးတော့ လုပ်တဲ့ ကိစ္စမျိုး တွေရှိတယ်။ အဲဒီအတွက် လဒ်ပေးလဒ်ယူကိစ္စက ယူတဲ့လူတယောက်တည်းမှာတင် အပြစ်ရှိတာမဟုတ်ဘူး။ ပေးတဲ့လူပေါ်မှာလည်းအပြစ်ရှိတယ်။ အဲဒီပေးတဲ့ လူပေါ်မှာလည်းနောက်မပေးရဲအောင် ပြစ်ဒဏ်စီရင်ရမယ်။ သူ့ကို ပြစ်ဒဏ်စီရင်တဲ့ အခါမှာလည်း ကျွန်တော်တို့သတင်းမီဒီယာတွေမှာလည်းဖော်ပြရမယ်။ နိုင်ငံပိုင် သတင်းစာတွေဖြစ်တဲ့ မြန်မာ့အလင်း၊ကြေးမှုန်၊ မြန်မာ့အသံ၊ မြ၀တီလိုမျိုးမှာတွေ ဖော်ပြပေးရင် ပြည်သူတွေဘက်ကလည်း လဒ်ပေးတာတွန့်သွားသလို လဒ်ယူတဲ့ အစိုးရ၀န်ထန်းတွေတရားစွဲတဲ့ကိစ္စကို ဖြစ်ရပ်မှန်နဲ့တကွ မီဒီယာတွေမှာချပြမယ်။ ဒီဘက်က လဒ်ယူတဲ့ပုဂိုလ်တွေလည်း လက်တွန့်သွားမယ်။

မေး ။ ။ ကျွန်တော်တခုမေးချင်တာက မြန်မာနိုင်ငံဥပဒေမှာကော လဒ်ပေးတဲ့ လူကိုရော အရေးယူပိုင်ခွင့်ရှိတယ်မလား။ ဥပဒေအရ ပေါ့။

ဦးမင်းသန့်ဇင် ။     ။ ဥပဒေအရတော့ရှိတယ်ဗျာ။ ကျွန်တော်တို့တကယ်တန်းဇောင်းပေးနေတာ လဒ်ယူတဲ့လူကိုဘဲဇောင်းပေးတယ်။ တကယ်တန်း လဒ်ပေးတဲ့ ဘက်ကို ဇောင်းပေးမှုတွေနဲပါးတယ်။ ဆိုတော့ ပြည်သူတွေ က လဒ်ပေးတာကို အပြစ်ကင်းတယ်ဆိုတာ ကို ခံယူနေတယ်။ သူတို့မှာအပြစ်ရှိတယ် လို့ကိုမထင်ဘူး။ ဆိုတော့ ပြည်သူတယောက်က လဒ်ပေးတယ်ဆိုရင်ကျွန်တော်တို့မှာ အရေးယူရမလို အလဒ်ယူမယ်ဆိုရင်လည်းကျွန်တော်တို့က အရေးယူရမယ်။ အဲဒီလို အရေးယူတာကို မြုံမထားသင့်ဘဲနဲ့ မီဒီယာမှာ ဖွင့်ချရမယ်။ ဒီလိုဆိုမှ တခြားသူတွေ လည်း လဒ်ပေးတာကို အပြစ်ရှိတယ်ဆိုတာ သူ့အနေနဲ့သိမှာ။ အခုက လဒ်ပေးတဲ့ကိစ္စ က ဥပဒေနဲ့မညီဘူး ဆိုတာပြည်သူတွေကမသိဘူး။ နောက်ဆုံးမှာ ရှေ့နေခတောင် မပေးရင်မပေးပါစေ။ တရားသူကြီးကိုဘယ်လောက်ကန်တော့ရမလဲဆိုတာ သိမှာ။

မေး ။ ။ ကောင်းပါပြီခင်ဗျာ။ အခုဆရာတို့ဆွေးနွေးခဲ့ကြတာ အင်မတန်ကောင်းပါတယ်ခင်ဗျာ။ ဆိုတော့ အခု ကျန်တဲ့ ၇မိနစ်အတွင်းလောက်မှာ ကျွန်တော်တို့ ခြုံငုံပြီးကြည့်ရအောင်။ ဘယ်လိုအကြောင်းအရင်းတွေကြောင့်ဖြစ်သလဲ။ ဘယ်လိုဖြေရှင်းကြမလဲ။ ကျွန်တော်စဉ်းစားမိတာက နိုင်ငံရေးစနစ်မပြောင်းသေးဘူး။ အာဏာရှိတဲ့အပိုင်းက ကြီးစိုးနေတယ်ဆိုတာ တခုပါပါတယ်။ နိုင်ငံရေးအငြိုးအတေးနဲ့လုပ်တယ်။ နိုင်ငံရေးအယူအဆကွဲပြားနေတာပါပါတယ်။ နောက်တခါ ဆင်းရဲနွမ်းပါးမှု လဒ်ပေးလဒ်ယူမှုစတဲ့ အကြောင်းအရာတွေကို တွေ့ရ တယ်ခင်ဗျာ။ ဆိုတော့ကျွန်တော်တို့ ဒီဟာကို ဘယ်လိုပြုပြင်ရမလဲဆိုတာ။ ဆရာဦးမင်းလွင်ဦးနဲ့စရအောင် ကျွန်တော်ထင်တယ် မစ္စတာကင်တားနားပြောထားတဲ့အထဲမှာ Awareness တို့ capacity building တို့ ကြားနေရစကားတွေအများကြီးပါပါတယ်ခင်ဗျာ။ အသိပညာပေးဖို့နဲ့သူတို့ လုပ်ပိုင်ခွင့်ရှိအောင်၊ လုပ်တတ်ကိုင်တတ်အောင်သင်ကြားပေးဖို့ဆိုတာ အဲဒါဘယ်လောက်ထိထိရောက်နိုင်ပါသလဲ မြန်မာနိုင်ငံအခြေအနေနဲ့။

ဦးမင်းလွင်ဦး ။      ။ ကျွန်တော်တို့နိုင်ငံတကာကနေသတ်မှတ်ထားတဲ့ အတိုင်းလွတ်လပ်တဲ့တရားစီရင်ရေးစနစ်ပေါ်ပေါက်နိုင်ဖို့အတွက် သတ်မှတ်ထားတဲ့ အချက် ၂၀ ရှိပါတယ်။ အဲဒီတော့အချက်၂၀ထဲမှာစောနကပြောတဲ့ သင်တန်းတွေ ပေးမယ် ၊Capacity Building တွေလုပ်ပေးမယ်။ လစာလုံလောက်အောင်ပေးမယ်။ တရားရုံးရဲ့ စားရိပ်ကို အမှုသည်တွေက ခံရတာမဟုတ်ဘဲနဲ့ နိုင်ငံတော်က အလုံအလောက်ထောက်ပံ့ပေးမယ်။ လိုက်ပါဆောင်ရွက်ပေးတဲ့ရှေ့နေ၊ ၀န်ထမ်း တရားသူကြီးစတာတွေရဲ့စားဝတ်နေရေး တွေအတွက်ထိုက်သင့်တဲ့ဝင်ငွေတွေရအောင် အစိုးရက အာမခံပေးဖို့လိုပါတယ်။ ကျွန်တော်တို့တရားရုံးတွေမှာဖြစ်နေတာက ရုံးတွေနေ့စဉ်လည်ပတ်ဖို့အတွက်ကို ရှေ့ပတ်စာရေးကနေပြီးတော့ အမှုသည်တွေဆီက ပိုက်ဆံယူပြီးတော့ လျှောက်လွာစာရွက်ဝေရတဲ့အခြေအနေတွေဖြစ်နေတာတွေကို ရပ်ခိုင်းလိုက်ဖို့လိုတယ်။ အစိုးရတွေအနေနဲ့ ဒီလိုမျိုးကိစ္စရပ်တွေကအစ ဖြည့်ဆီးပေးဖို့လိုပါတယ်။ နောက်ပြီးတော့တခါ တရားရုံးတွေရဲ့ ဖွဲ့စည်းတည်ဆောက် ပုံစနစ်ကို ခန့်ခန့်ညားညားဖြစ်ဖို့လိုတယ်။ ဒါမှလည်းအများပြည်သူက ယုံကြည်လေးစား လာမှာဖြစ်တယ်။ နောက်တချက်က ကျွန်တော်တို့ဥပဒေပိုင်းဆိုင်ရာ တရားစီရင်ပေးပိုင်း ဆိုင်ရာ တွေမှာ ပြည်သူလူထုတွေအနေနဲ့ သံသဃရှင်းရှင်းနဲ့ လက်ခံယုံကြည်လာဖို့ လည်း အဓိကလိုတာဖြစ်တယ်။

မေး ။ ။ဟုတ်ကဲ့ ဦးမင်းလွင်ဦး ပေးတဲ့အကြံကောင်းပါတယ်။ နောက်ပြီးတော့ ရှေ့နေကြီး ၄ဦးကျန်ပါသေးတယ်။ တယောက်ကို ၁ မိနစ်လောက်ဘဲ ရမယ် ထင်ပါတယ်။ ဆရာဦးအောင်သိန်းရဲ့အကြံပေးချက်ကိုပြောပါအုန်းခင်ဗျာ။

ဆရာဦးအောင်သိန်း ။   ။ကျွန်တော်ဖြတ်သန်းခဲ့ရတဲ့ ရှေ့နေဘ၀အတွေ့အကြံနဲ့ပြောရရင်တော့ တရားဦးစီးရုံးမှာ ကျွန်တော့ကို ဆရာလုပ်ထုံးလုပ်နည်းတွေကိုမသိဘဲကို ဆိုပြီးကျွန်တော့ကိုပြောတယ်။ ကျွန်တော်က လုပ်ထုံးလုပ်နည်းအပိုင်းလေးဆိုတာဘာလဲလို့ အပေးလိုင်းကို ဆရာသဘော မပေါက် လို့ဖြစ်တာဆိုပြီး အဲဒီလိုကျွန်တော့ကိုပြောတယ်။ ဆိုတော့ ကျွန်တော်တို့တရားစီရင်ရေး ဟာ ကြည့်လို့ရှင်ရင် လေလံတင်တရားစီရင်ရေးလိုကျရောက်တယ်ခင်ဗျာ။ များတဲ့ လူပေးရင် နဲတဲ့ပိုက်ဆံပြန်ပေးပြီး များတဲ့ ပိုက်ဆံယူပြီး အနိုင်ပေးတာမျိုးလည်း ရှိပါတယ်။ ကျွန်တော်တို့ ဒီတရားစီရင်ရေးစနစ်ကြီးကို ပြုပြင်ဖို့ဆိုတာ ကျွန်တော်တို့ အချိန်လည်း အတော်ယူရအုန်းမယ်။ တရားရုံးတွေမှာလည်း ဆရာမွေး၊ တပည့်မွေးတဲ့ စနစ်တွေ စည်းမရှိကမ်းမရှိဘဲ၊ လုပ်တဲ့လူတွေကို ပို့ချင်တဲ့နေရာပို့တယ်။ တပည့်ရင်း တွေမဟုတ်တာလုပ်တာ လဒ်စားတာကို အတိုင်ခံရပြီဆိုရင် ရုံးချုပ်ကိုခေါ်ပြီးချိန်းထား လိုက်တယ်။ မေ့လောက်ဆိုရင် ရာထူးတိုးပေးလိုက်ပြီးတော့ တခြားကိုပြောင်းပေး လိုက်တယ်ဆိုတဲ့ တပည့်မွေးဆရာမွေး တရားသူကြီး၊ ဥပဒေအရာရှိ တွေဒီနေ့အထိ ရှိနေတုန်းဘဲဆိုတာ ကျွန်တော်ပြောလိုပါတယ်။

မေး။  ။ ရှေ့နေကြီး ဦးအောင်သူရိန်ထွန်း ၊ ဆရာ ဘယ်လိုပြုပြင်စေချင်လဲဆရာ ၊ ဘယ်လိုပြုပြင်ရမလဲ။
ဒီလိုကိစ္စမျိုးကို ပြုပြင်ဖို့အတွက်ကို ရှေ့နေရှေ့ရပ်တွေအားလုံးပါဝင်ရမယ်။ နောက်တခုက လွတ်လပ်တဲ့ ရှေ့နေအသင်းတွေရှိသင့်တယ်။ အဲဒီအသင်းတွေကနေပြီးတော့ ချပြသင့်တယ်။ နောက်တခုက နိုင်ငံတော်ရဲ့ တိုင်းပြည်ပြုပြင်ရေးလုပ်ငန်းတွေမှာ ရှေ့နေရှေ့ရပ်တွေကို ပစ်ထားဖို့မသင့်ဘူး။ နောက်တခုက ရှေ့နေကြီးတွေရဲ့အကျင့်ဆိုးကို ပြင်ဖို့လည်းလိုအပ်တယ်လို့ ကျွန်တော်ပြောချင်ပါတယ်။
ဦးကောင်ထက် ဆွေးနွေးပါ။

ကျွန်တော်တို့က လဒ်ပေးလဒ်ယူ မှုကို ပြင်းပြင်ထန်ထန်အရေးယူဖို့လိုပါတယ်။ တရားရုံးတွေဆိုးတဲ့အကြောင်းအပုတ်နံတွေထောင်းထောင်းထွက်နေတယ်။ နိုင်ငံတော်အကြီးအကဲတွေက သန့်ရှင်းကောင်းမွန်တဲ့အစိုးရ၊ ဥပဒေပေါ်မှာ ဘယ်သူ့မှမရှိရဘူး။ ဒါတွေကို ပြောနေပေမယ့် လက်တွေ့မှာ ဥပဒေရဲ့ ဂုတ်ပေါ်မှာ တရားသူကြီးတွေ ၊ ဥပဒေအရာရှိတွေ ခွထိုင်စားလို့ ဥပဒေစိုးမိုးမှုဆိုတာ ပျက်စီးနေပါပြီ။
ဘယ်လိုလို့သန့်ရှင်းကောင်းမွန်တဲ့ အစိုးရဖြစ်နိုင်ပါမလဲ။ ဒါတွေကို အပေါ်က ပြတ်ပြတ်သားသားနဲ့အရေးယူဖို့လိုပါတယ်။ လွတ်တော်ကိုယ်စားလုယ်ဆိုတဲ့ လူတွေက လည်း ငါနဲ့မဆိုင်သလို ထိုင်မကြည့်နေပါနဲ့။ ခင်ဗျားတို့တာဝန်တွေအများကြီးရှိပါတယ်။ ပြည်သူတွေမှာ ဒိအပြင်အားကိုးစရာမရှိပါဘူး။ ပြည်သူတွေရဲ့တိုင်ကြားချက်တွေကို အထောက်အထားယူပြီး အပေါ်ကို တင်ပြကြပါလို့ပြောချင်တယ်။ ချစားတဲ့ တရားသူကြီး တွေ ကို ဖျတ်ချ ဖို့လိုတယ်ဆိုတာ ပြောချင်ပါတယ်။

ရှေ့နေဦးမင်းသန့်ဇင်နောက်ဆုံးအကြံပြုပါ။
ကျွန်တော်အကြံပြုချင်တာကတော့ နောက်ဆုံးလွတ်လပ်တဲ့တရားစီရင်ရေး ဖြစ်ဖို့အတွက်ပြည်သူတွေရှေ့မှာတရားစီရင်ရမယ်။ လူတွေတတ်ရောက်နိုင်တဲ့ တရားခွင်ရှိဖို့ဆိုတာ အဓိကလိုအပ်တယ်။ ရှိနေတဲ့ တရားခွင်တောင်မှ ရောင်းစားပြီး တော့ မီးချစ်ဆံဗူးလောက် ရှိတဲ့တရားရုံးမှာ အမှုစီရင်နေရတာကတော့ လွတ်လပ်တဲ့ တရားစီရင်ရေးက ဘယ်တော့မှ ဖြစ်လာမှာမဟုတ်ပါဘူး။ ကျွန်တော်ဒီလိုပြောချင် ပါတယ်။

အခုသောတရှင်တဦးက သူရေးတဲ့စာထဲမှာ ကောင်းမြင်တဲ့သဘောနဲနဲပါတဲ့အတွက် ဒီစာကို ဇိမ်ခံပြီးတော့ ဖတ်ချင်လို့နဲနဲချန်ထားပါတယ်။ သူကတရားရေးမဏ္ဍိုင်က ဒီမိုကရေစီလမ်းကြောင်းနဲ့ မကိုက်ညီသေးဘူးလို့ပြောရမှာပါ။ နှစ်ပေါင်း ၅၀ လောက် ယို့ယွင်းခဲ့တဲ့ ပြဿနာထဲကတခုဆိုတော့ ပြင်ဖို့ကျိုးစားနေတာကိုတွေ့ရပါပြီ။ ပွင့်ပွင့်လင်းလင်း ပြောဆိုကိုင်တွယ်နေတာကိုတွေ့ရပါတယ်။ တခြားပြဿနာတွေထက် အရင်ဆုံးပြေလည်မယ့်ပြဿနာတွေ့ရပါတယ်။ ဒီဟာက ဥပဒေကို နားလည်သူတွေ ဖြစ်တဲ့ အတွက် ဘယ်လိုလုပ်ရင် ဘယ်လိုထိရောက်နိုင်သလဲဆိုတာ သိရှိကြ တာဖြစ်ပါတယ်။ ဒါကြောင့်မကြာခင်မှာ စိတ်ရှည်လက်ရှည်နဲ့ ၀ိုင်းဝန်းပြီးတော့ ထိန်းသိမ်းစောင့်ရှောက်ကြပါ၊ အောင်မြင်ပါလိမ့်မယ်လို့ပြောတဲ့ သူကတော့ နိုင်ငံရေးအကျဉ်း သား ဟောင်း ဦးပိုက်တင်ဖြစ်ပါတယ်ခင်ဗျာ။

0 comments:

Post a Comment