Wednesday, May 27, 2009

Filled Under:

တောင်ကိုးရီးယား ပြည်သူလှုပ်ရှားမှု အောင်ပွဲနှင့် အောင်ပွဲသို့ ချီတက်ဆဲ မြန်မာပြည် ဒီမိုကရေစီခရီးစဉ်

ညီညီချမ်း
မေလ ၂၇ ရက်၊ ၂၀၀၉ ခုနှစ်

စစ်ဥပဒေ၊ စစ်သေနသတ်ဖြင့် အနိုင်ကျင့်လိုသူများက ပြည်သူတို့အား မည်သို့ ဖိနှိပ်၊ ရက်စက်၊ အကြမ်းဖက် စေကာမူ နိုင်ငံသား အခွင့်အရေး၊ ဒီမိုကရေစီ အခွင့်အရေး တောင်းဆိုသော အဖိနှိပ်ခံ ပြည်သူများမှ ၎င်းအခွင့်အရေးအား ပြန်လည်ရရှိရန် များသောအားဖြင့် အကြမ်းမဖက်၊ ငြိမ်းချမ်းသော နည်းဖြစ်သာ လှုပ်ရှား တိုက်ပွဲဝင်လေ့ရှိသည်။

အဖိနှိပ်ခံရသူများမှာ မလွှဲမရှောင်သာ ရရာလက်နက်ကို စွဲကိုင်ရာတွင်လည်း ဖိနှိပ်သူ အုပ်စုထက် အစပေါင်းများစွာ နောက်ကျပြီးမှ လက်နက်စွဲကိုင် တော်လှန်ရခြင်းကြောင့် ၎င်းတို့လျှောက်လှမ်းရာ လမ်းခရီးတွင် အတားအဆီးများ၊ ခြိမ်းခြောက်မှုများ၊ အကြမ်းဖက်မှုများကို ထိန့်လန့်တကြား ရင်ဆိုင်ကြရသည်မှာ အမှန်ပင်။ သို့သော် ဤခက်ထန်ကြမ်းတမ်းသော ခရီးကို ဖြတ်သန်းခဲ့ပြီးမှ ဒီမိုကရေစီ အသီးအပွင့် ရရှိ ခံစားနေရပြီ ဖြစ်သော တောင်ကိုးရီးယား နိုင်ငံနှင့် အောင်ပွဲသို့ မလျော့သောဇွဲဖြင့် ချီတက်နေဆဲ မြန်မာပြည် ဒီမိုကရေစီ ခရီးကြမ်းကို လေ့လာဆန်းစစ် ကြပါစို့။

တောင်းကိုးရီးယား နိုင်ငံသည် ၁၉၆၀ နှင့် ၁၉၇၀ ခုနှစ်အကြား အာရှနိုင်ငံများအတွင်း စီးပွားရေး အရှိန်အဟုန် တိုးတက် ကောင်းမွန်လာခဲ့သည်။ သို့သော် ကံမကောင်း အကြောင်းမလှဘဲ စီးပွားရေးအရ သွေးစုပ် အမြတ် ထုတ်သော အာဏာရှင်နှင့် ကြုံခဲ့ရသည်။ ၁၉၆၁ ခုနှစ်တွင် ဗိုလ်ချုပ်ပတ်(ခ်)ချုံဟီး (General Park Chunghee)က နိုင်ငံအာဏာကို သိမ်းလိုက်ပြီးနောက် ‘တဦးတည်း အာဏာရှင်စနစ်’ ဖြင့် ၁၈ နှစ်ကြာ အုပ်ချုပ်လာခဲ့ရာမှ နိုင်ငံရေး အမြင်သဘောထား မတူညီသော သူများအား နည်းမျိုးစုံဖြင့် ဖိနှိပ်လာခဲ့သည်။ ဖွံ့ဖြိုးရေး စီမံကိန်းတွင် အစိုးရ အာဏာပိုင်များသာ ဦးဆောင်ခွင့်ရှိသော Yushin [Revitalizing Reform] စနစ်ကို အကောင်အထည်ဖေါ် လာခဲ့သည်။ Yushin စနစ်အရ စီးပွားရေး မတည်ငြိမ်မှု ဖြစ်လာပြီး ပြည်သူများ ငြီးငြူ မကျေမနပ် ဖြစ်လာခဲ့ရာ ၁၉၇၉ တွင် ကျောင်းသားများ အပြင်းအထန် ဆန္ဒပြရာမှ နောက်ပိုင်းတွင် အလုပ်သမားများလည်း ပါဝင်လာတော့သည်။

တောင်ကိုးရီးယားနိုင်ငံနဲ့ အလားတူ မြန်မာနိုင်ငံသည်လည်း လွတ်လပ်ရေး ရပြီးနောက် အရှေ့တောင်အာရှတွင် အဖွံ့ဖြိုးဆုံး နိုင်ငံအဆင့်သို့ ရောက်ခဲ့သည်။ ကမ္ဘာသို့ ဆန်အမြောက်အများ တင်ပို့နိုင်ခဲ့ခြင်းကြောင့် မြန်နိုင်ငံအား ‘ကမ္ဘာ့စပါးကျီ’ ဟုပင် နိုင်ငံတကာမှ တင်စားခေါ်ဝေါ် ရသည်အထိ ကြီးပွား ချမ်းသာခဲ့သည်။ သို့သော် ၀မ်းနည်းဖွယ် ဖြစ်ရပ်မှာ ၁၉၆၂ နှစ်တွင် ဗိုလ်ချုပ်ကြီးနေ၀င်း အာဏာသိမ်းပြီးနောက် မြန်မာ့ဆိုရှယ်လစ် လမ်းစဉ်ပါတီ(မဆလ) ဟူ၍ ‘တပါတီ အာဏာရှင်စနစ်’ ဖြင့် ၂၈ နှစ်ကြာ အုပ်ချုပ်လာခဲ့ရာ မြန်မာနိုင်ငံသည် အဖက်ဖက်မှ ယိုယွင်းကျဆင်း ခဲ့ရသည်။ ထို့ကြောင့် ၁၉၈၈ ခုနှစ်တွင် ရဟန်းရှင်၊ ပြည်သူ၊ ကျောင်းသားများ နိုင်ငံနဲ့အ၀ှမ်း ဆန္ဒပြကြရာ ၈၈၈၈ (ရှစ်လေးလုံး) အရေးတော်ပုံကြီး ပေါ်ပေါက်လာရာ စစ်အာဏာရှင် ဗိုလ်နေ၀င်းမှ “စစ်တပ်ဆိုတာ မိုးပေါ်ထောင်မပစ်ဘူး၊ ပစ်ရင်မှန်အောင်ပစ်တယ်” ဆိုပြီး ငြိမ်းချမ်းစွာ ဆန္ဒပြသူများကို စစ်သေနတ်ဖြင့် ပစ်ခတ်ရာ အပြစ်မဲ့နိုင်ငံသား ပြည်သူများ သေကျေခဲ့ရသည်။

၈၈၈၈/ရှစ်လေးလုံး အရေးတော်ပုံဖြင့် (မဆလ) တပါတီ အာဏာရှင်စနစ်ကို ဖယ်ရှား နိုင်ခဲ့သော်လည်း ၎င်းထက် အစပေါင်းများစွာ ရက်စက်သော နိုင်ငံတော် ငြိမ်ဝပ်ပိပြားမှု တည်ဆောက်ရေးအဖွဲ့ အမည်ခံ (န ၀ တ) သည် ၁၉၈၈ စက်တင်ဘာလတွင် နိုင်ငံရဲ့အာဏာကို ထပ်မံ သိမ်းပိုက်လိုက်ပြန်သည်။ ဥာဏ်နီဥာဏ်နက်ဖြင့် ပိုမိုကောက်ကျစ် ယုတ်မာလိုသော ရည်ရွယ်ချက်ဖြင့် ၁၉၉၇ တွင် (န ၀ တ) သည် နိုင်ငံတော် အေးချမ်းသာယာရေးနှင့် ဖွံ့ဖြိုးကောင်စီ (န အ ဖ) ဟူ၍ အမည်ပြောင်းလိုက်သည်။ ၎င်းရည်ရွယ်ချက်အတိုင်း အကောင်အထည် ဖေါ်နိုင်ရန် မြန်မာနိုင်ငံအား နယ်ချဲ့လက်အောက်မှ ကယ်တင်ပေးခဲ့သော လွတ်လပ်ရေး ဗိသုကာကြီး ဗိုလ်ချုပ်အောင်ဆန်း၏သမီး ဒီမိုကရေစီခေါင်းဆောင် ဒေါ်အောင်ဆန်းစုကြည်ကို ၂၀၀၃ ခုနှစ် ဒီပဲရင်း အရေးအခင်းတွင် လုပ်ကြံသတ်ဖြတ် ခဲ့သေးသည်။ ကံကောင်းစွာပင် ဒေါ်အောင်ဆန်းစုကြည် အသက်ရှင်ခွင့် ရခဲ့သည်။ ဗုဒ္ဓဘာသာ ကို ရိုသေကိုင်းရှိုင်းပါတယ် ဆိုတဲ့ ဒါယကာ စစ်ဗိုလ်ချုပ်များမှာ ၂၀၀၇ ခုနှစ် စက်တင်ဘာ ‘ရွှေဝါရောင် တော်လှန်ရေး’ တွင် ရဟန်းသံဃာများအား သတ်ဖြတ်ရန်ကိုပင် ၀န်မလေးခဲ့။ မည်မျှ ကောက်ကျစ်၊ ယုတ်မာသည်ကို နိုင်ငံသား ပြည်သူများ ခံစားကြည့်နိုင်ပါသည်။
မြန်မာနိုင်ငံကဲ့သို့ပင် တောင်ကိုးရီးယားနိုင်ငံသည် ဗိုလ်ချုပ်ပတ်(ခ်)ချုံဟီး၏ Yushin စနစ်ကို ကျောင်းသားနှင့် အလုပ်သမားများ၏ ဆန္ဒပြမှုဖြင့် ဖျက်သိမ်းနိုင်သော်လည်း ၁၉၇၉ ခုနှစ်တွင် ဗိုလ်ချုပ် ချွန်ဒူးဝမ် Chun Doo-hwan နဲ့ နိုတေ၀ူး Roh Tae-woo တို့ အာဏာသိမ်းမှုကို ခံလိုက်ရပြန်သည်။ ထို့ကြောင့် ၁၉၈၀ မေလတွင် ကျောင်းသားများ နိုင်ငံနဲ့အ၀ှမ်း ဆန္ဒပြကြရာ ဒီမိုကရေစီ တောင်းဆိုမှု တိုက်ပွဲတွင် တောင်ကိုးရီးယား ပြည်သူတရပ်လုံး ပါဝင်လာခဲ့သည်မှာ ကမ္ဘာ့သမိုင်းတွင် စံထားလောက်ပေသည်။ ငြိမ်းချမ်းစွာ ဆန္ဒပြသော ကျောင်းသားနှင့် ပြည်သူများမှာ ညှဉ်းပမ်းမှု၊ ဥပဒေမဲ့ သတ်ဖြတ်မှုများနဲ့ ရင်ဆိုင်ခဲ့ရသည်။ မည်သို့ပင်ဆိုစေ ဆန္ဒပြ ကျောင်းသားလူငယ်များမှာ သေရမည်ကို သိသော်လည်း အနာဂတ် တောင်ကိုးရီးယား ဒီမိုကရေစီရေးအတွက် ဆက်လက် တိုက်ပွဲဝင်ခဲ့ရာ ၎င်းတို့ရဲ့ ဆန္ဒအတိုင်း ဒီမိုကရေစီ အသီးအပွင့်ကို ရရှိခံစား နေရပြီ ဖြစ်သည်။

မြန်မာနိုင်ငံတွင်လည်း ဒီမိုကရေစီ အရေးအတွက် ရဟန်းရှင်လူ၊ ကျောင်းသားပြည်သူများ အသက်၊ သွေး၊ ချွေး ပေးဆပ်ခဲ့ရသည်မှာ တောင်ကိုးရီးယားကဲ့သို့ပင် ဖြစ်ပါသည်။ သို့သော်လည်း စဉ်းလဲကောက်ကျစ် ယုတ်မာမှုတွင် သရဖူဆောင်းထားသော စစ်ခေါင်းဆောင် ဗိုလ်သန်းရွေ လက်အောက်တွင် ဖိနှိပ်မှုအမျိုးမျိုးကို အလူးအလဲ ခံနေရဆဲဖြစ်သည်။ နယ်ချက်လက်အောက် လွတ်လပ်ရေး ကြိုးပမ်းမှုတွင် ဆရာတော် ဦးဥတ္တမ၊ ဦးဝိစာရတို့မှာ သမိုင်းတွင်ခဲ့သည်။ ခြားနားချက်မှာ စစ်အစိုးရ လက်အောက် ဒီမိုကရေစီ ကြိုးပမ်းမှုကာလတွင် တခန်းတဏ္ဍမှ ပါဝင် ဦးဆောင်ခဲ့သူ အရှင်ဂမ္ဘီရမှာတော့ ထောင်နန်းစံ နေရသည်။

၁၉၉၀ ရွေးကော်ပွဲတွင် အမတ်နေရာ ဒုတိယ အများဆုံးရရှိခဲ့သော ရှမ်းတိုင်းရင်းသားများ ဒီမိုကရေစီအဖွဲ့ချုပ်မှ ဥက္ကဌ ခွန်ထွန်းနှင့် အပေါင်းအပါများ နိုင်ငံတော်ပုန်ကန်မှု၊ ပြစ်မှုဆိုင်ရာ ဥပဒေပုဒ်မ ၁၂၂ (၁) နဲ့ ထောင်ဒဏ်နှစ်ရှည် ချလိုက်သည်။ အလားတူ အမျိုးသားရေးကို ရိုးရိုးသားသား ကြိုးကြိုးစားစား ဆောင်ရွက်သူ မွန်ပြည်သစ်ပါတီမှ ခရိုင်ကော်မီတီဝင် နိုင်ယက္ခနှင့် မွန်အမျိုးသား လွတ်မြောက်ရေး တပ်မတော်မှ ဗိုလ်ကြီး မျိုးသွေး(ဆီဂကူ) တို့မှာ သက်သေခိုင်ခိုင်လုံလုံ မပြနိုင်ဘဲ ထောင်ဒဏ် တသက်တကျွန်း ချခဲ့သည်။ အနာဂတ်ပညာရေးနဲ့ လူငယ်ဘ၀ကို စတေးကာ ဒီမိုကရေစီ အခွင့်အရေးအတွက် ငြိမ်းချမ်းစွာ တောင်းဆိုသော ၈၈ မျိုးဆက်ကျောင်းသား ခေါင်းဆောင် မင်းကိုနိုင်နှင့် အပေါင်းအပါတို့ကို ထောင်ဒဏ် ၆၅ နှစ် ချမှတ်ကာ အပြစ်ပေးခဲ့သည်။ မြန်မာနိုင်ငံသားများ ယုံကြည်အားထားသည့်အပြင် ကမ္ဘာကပါ လေးစားတဲ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်အား နေအိမ်အကျယ်ချုပ်ဖြင့် ချုပ်ထားသည်ကို အားမရသေးဘဲ ပုဒ်မ အမျိုးမျိုးသတ် ထောင်သွင်း အကျဉ်းချရန် အကြံအဖန် လုပ်နေဆဲဖြစ်သည်။

အထက်ဖေါ်ပြပါ ပြစ်မှုများသာမက လယ်ယာမြေများ သိမ်းယူမှု၊ အဓမ္မ စေခိုင်းမှု၊ အမျိုးသမီးငယ်များအား အဓမ္မပြုကျင့်မှု၊ ညှင်းပန်း သတ်ဖြတ်မှုများမှာ စစ်အာဏာရှင်ရှင်တို့၏ စရိုက်လက္ခဏာ ဆိုးများပင်ဖြစ်သည်။ ဤစနစ်ဆိုးမှ လွတ်မြောက်ရန် အောင်ပွဲတို့ ချီတက်နေသော မြန်မာနိုင်ငံ ဒီမိုကရေစီ ခရီးစဉ်မှာ မည်သို့ခက်ထန် ကြမ်းတမ်းသည်ဖြစ်စေ ဆက်လက်ချီတက်ရမည်သာ ဖြစ်ပါသည်။

0 comments:

Post a Comment