Sunday, June 07, 2009

Filled Under:

လေ့လာ အတုယူဖွယ် တောင်ကိုးရီးယား ဒီမိုကရေစီ လှုပ်ရှားမှု အရေးတော်ပုံ

မင်းချမ်းမွန်
ဂျွန်လ ၇ ရက်၊ ၂၀၀၉ ခုနှစ်

တောင်ကိုးရီးယား ပြည်သူတို့ အနေဖြင့် ၁၉၈၀ မေလ ဂွမ်ဂျူး (Gwangju) ဆန္ဒပြ မှုကို ၎င်းတို့နိုင်ငံ၏ ဒီမိုကရေစီ တည်ဆောက်မှု သင်္ကေတ အဖြစ် ဂုဏ်ပြု ခဲ့ကြသည်။ ဂွမ်ဂျူး ဆန္ဒပြမှု အစပိုင်းတွင် ပြည်တွင်း ပြည်ပ အာရုံစူးစိုက်မှု နည်းခဲ့သော်လည်း နောက်ပိုင်းတွင် အရေးတော်ပုံမှ အတုယူဖွယ် သင်ခန်းစာ နှစ်ရပ် ဖြစ်ပေါ်စေခဲ့သည်။ ပထမ အချက်မှာ ပြည်သူလူထုသည် ၎င်းတို့၏ ယုံကြည်ချက် အတိုင်း စစ်အာဏာရှင်ကို တော်လှန်ခြင်းဖြစ်ပြီး အခြားအချက်မှာ ညီညွတ်သော အင်အားဖြင့် လူ့အဖွဲ့အစည်း စိတ်ဓါတ်ကို ဖေါ်ဆောင် လိုက်ခြင်း ဖြစ်သည်။

တောင်ကိုးရီးယား ဒီမိုကရေစီ ဆန္ဒပြ တောင်းဆိုမှု၏ နောက်ခံ အကြောင်း အရင်းကို လေ့လာလျှင် ဗိုလ်ချုပ် ပတ်(ခ်)ချုံဟီး၏ ယူရှင်းYushin ခေါ် [Revitalizing Reform] စနစ်အောက်တွင် စီးပွားရေး မတည်မငြိမ်မှုအပေါ် ကျောင်းသားနှင့် ပြည်သူတို့၏ ဆန္ဒပြမှုဖြင့် ဖယ်ရှားနိုင်ပြီးနောက် သမတ Choi Kyu-ha ဦးဆောင်သော ကြားဖြတ်အစိုးရထံ ၁၉၇၉ ခုနှစ်တွင် ဗိုလ်ချုပ် ချွန်ဒူးဝမ်နှင့် နိုတေ၀ူးတို့ အာဏာသိမ်းခြင်းမှ စတင် ဖြစ်ပွားခဲ့သည် ဟု ဆိုရပေမည်။ ၎င်း အာဏာသိမ်းမှုကို မကျေမနပ်၍ ကျောင်းသားများ ဆန္ဒပြခဲ့သည်။ ဆန္ဒပြမှုကို ဟန့်တားရန် စစ်တပ်မှ ၁၉၈၀ မေလ ၁၇ ရက်နေ့တွင် စစ်အမိန့် ကြေငြာလိုက်ပြီး ဂွမ်ဂျူးနှင့် အခြားမြို့များသို့ စစ်တပ်များ စေလွှတ်ခဲ့သည်။

ဂွမ်ဂျူးမြို့သို့ ရောက်ရှိနေပြီ ဖြစ်သော အဓိကရုဏ်း နှိမ်နင်းရေးရဲများနှင့် အထူးတပ်ဖွဲ့တို့သည် မေလ ၁၈ ရက် အာရုံဦးတွင် အစိုးရ ခရိုင်ရုံးများကို သိမ်းပိုက်ထား လိုက်ပြီ။ မေလ ၁၈ ရက် နံနက်ပိုင်းတွင် Chonnam တက္ကသိုလ် အ၀င်ပေါက်တွင် အသင့် စောင့်ကြပ်နေသော စစ်သားများက ကျောင်းသားများကို မညှာမတာ စတင်ရိုက်နှက်ပါတော့သည်။ အဓိကရုဏ်း နှိမ်နင်းရဲနှင့် စစ်သားများက ကျောင်းသား ခေါင်းဆောင်များ ဖမ်းဆီးသည့် အလား အခြားဆန္ဒပြ ကျောင်းသားများအား ရက်ရက်စက်စက် သတ်ဖြတ် တော့သည်။ ဆန္ဒပြ ကျောင်းသားများ စတင် အသတ်အဖြတ် ခံရသော မေ ၁၈ ရက်ကို 'သွေးစွန်းသော တနင်္ဂနွေနေ့' ဟု ၀မ်းနည်းဖွယ် အထိမ်းအမှတ် အဖြစ် ခေါ်ကြသည်လည်း ရှိသည်။ သို့်သော် ကျောင်းသားများသည် တစုတစည်းဖြင့် ငြိမ်းချမ်းစွာ ထိုင်ပြီး နောက်ပိုင်း ရက်များတွင်လည်း ဆက်လက် ဆန္ဒပြကြသည်။

ဆန္ဒပြကျောင်းသားများကို မျက်ရည်ဗုံးဖြင့် ရဲများက လူစုခွဲလိုက်ရာ ကျောင်းသားများ အုပ်စုကွဲသွားသည့်အခါ အဓိကရုဏ်း နှိမ်နင်းရဲနှင့် စစ်တပ်များက ၎င်းတို့ကို လမ်းမပေါ်ဆွဲချလာပြီး နံပါတ်ဒုတ်နဲ့ရိုက် စစ်ဖိနပ်နဲ့ ကန်ကြောက်သည်။ အမျိုးသမီးတွေကို ဆံပင်ဆွဲပြီး မြေပြင်ပေါ်သို့ လွင့်ပစ်။ ဤမျှမက နိုပျိုသော တက္ကသိုလ် ကျောင်းသူတွေရဲ့ အ၀တ်စားတွေကို ဆွဲချွတ်သည်အထိ ဖြစ်လာပြီး လူမဆန်သည့် နှိမ်နင်းမှုမှာ အမြင်မတော်၍ တားမြစ်သည့် အဖိုးအိုတယောက်နှင့် လက်ထပ်ပြီးခါစ ဇနီးမောင်နှံ စုံတွဲတတွဲလည်း အရိုက်ခံရသည်။ ရက်စက်သော သတ်ဖြတ်မှုကို တားမြစ်သည့် သတင်း ညွန်ကြားရေးမှူး တဦးမှာ အထိန်းအကွပ်မဲ့ အထူးတပ်ဖွဲ့တို့၏ ဘက်နက်ဖြင့် မသေ သေအောင် ထိုးသတ်ခြင်းခံရသည်။ ကမ်းကုန်အောင် ရက်စက်သည့်အပေါ် အရပ်သားတဦးမှ “ စစ်သားတွေဟာ ခွေးရူးအလား၊ သူ့သခင်ကို မှတ်မမိသကဲ့သို့ ကြမ်းကြုတ်ယုတ်မာတယ်။ ငါတစ်ဆို့သွားတယ်၊ ထိတ်လန့်အမောဆို့လို့ နှုတ်ခမ်းမှ အသံထွက်ပေမဲ့ ငါဘာမှပြောတတ်တော့။ ငါအရင်က စစ်သားအဖြစ် တာဝန်ထမ်းဆောင်ခဲ့ပေမဲ့ အခု စစ်သားတွေကို ထိတ်လန့်ရွံမုန်းတယ်” လို့ ရေရွတ်သွားခဲ့ရသည်။

စစ်တပ်၏ ရက်စက် ယုတ်မာမှုကို ရွံမုန်းလာသည်နှင့်အတူ အခြားတဖက်တွင် အသေခံ ဆန္ဒပြ ကျောင်းသားများအား ဂရုဏာ သက်မိသော ပြည်သူများမှာ မေ ၁၈ ရက်နေ့မှ စပြီး ဆန္ဒပြ ကျောင်းသားများကို အစားအသောက်များ ပေးကမ်းခဲ့လေသည်။ အလားတူ ဆန္ဒပြမှုတွင် အနှိမ်နင်းခံရ၍ ဒဏ်ရာသူများကို အငှားယာဉ် (taxi) သမားများက သက်စွန့်ဆန်ဖျား ဆေးရုံ၊ ဆေးခန်းသို့ ပို့ပေးသည်။ ထိုသို့ ပို့ဆောင်ပေးသည့် အပေါ် အကျင်နာမဲ့ သေနတ်ကိုင် စစ်သားများက တိုက်ခိုက်၍ taxi သမား အမြောက်အများ ဒဏ်ရာရှိသည်။ သေဆုံးတာလည်း ရှိသည်။ ဤအချိန်တွင် taxi သမားများက စစ်တပ်ကို တော်လှန်ရန် ဆုံးဖြတ်လိုက်ကြသည်။ taxi မော်တော်ကား အစီး ၂၀၀ ခန့်သည် စီတန်း အစောင့်ချထားသော စစ်သားများရှိရာသို့ မောင်းနှင်လိုက်ရာ စစ်သားကလည်း မော်တော်ကားမှန် ပြတင်းပေါက်တွေကို နံပါတ်ဒုတ်၊ ဘက်နက်တွေနဲ့ ရိုက်နှက် ဖျက်ဆီးပစ်သည်။ သေနတ်ဖြင့် ပစ်ခတ်ရာ ပြည်သူတွေ ချက်ချင်းဆိုသလို အသတ်ခံရသည့် အခြေအနေ ဖြစ်လာသည်။
ဤဆိုးရွားလှသော အခြေအနေတွင် အမှီအခိုမဲ့ ပြည်သူတို့သည် အဆုံးအဖြတ် ပေးမည့် လှုပ်ရှားမှု ပြုလုပ်ရန် မြင်လာကြသည့်နည်းတူ ဂွမ်ဂျူးပြည်သူတွေ လက်နက်ကိုင် တိုက်ပွဲဝင်ရမည်ဟု ယူဆလာကြသည်။ တတ်နိုင်သမျှ လက်နက်သိမ်းပြီး ၎င်းတို့အခေါ်အရ ရှီမင်ကွန်း Shimingun (ပြည်သူ့တပ်မတော်)ကို မလွှဲမရှောင်သာ ဖွဲ့စည်းလိုက်သည်။ ရှီမင်ကွန်း Shimingun တပ်မတော်သည် ပြည်သူလူထု အကျိုးကို ကာကွယ်သည်သာမက မြို့ပြ အမိန့် အာဏာအချို့ကို ပြဌာန်းလာရာ ၎င်းတို့အချင်းချင်းလည်း အသိအမှတ်ပြု ကြသည်။ ပြတ်သားသော ဦးဆောင်မှု ပေးနိုင်ခြင်းကြောင့် ပြည်သူ့တပ်မတော်အား အစားအသောက်များ ပေးကမ်းလာသည့်အပြင် ပြည်သူလူထု၏ ထောက်ခံမှုလည်း ရလာသည်။ ဤလက္ခဏာသည် တောင်ကိုးရီးယား ဒီမိုကရေစီ တည်ဆောက်ရေး အောင်မြင်မှု အစဟု ဆိုရမည်အမှန်ပင်။

ဂွမ်ဂျူး အရေးတော်ပုံ အတွင်း သတ်ဖြတ်မှုများကို ပြည်သူများ မသိနိုင်ရန် အစိုးရဘက်မှ သတင်းဆင်ဆာများ ပိတ်ပစ်ခဲ့သည်။ ဒီအချင်းအရာကို တုန့်ပြန်သည့်အနေဖြင့် ဂွန်ဂျူးပြည်သူလူထုက သတင်းဌာနတခု ဖွင့်လိုက်ပြီး မြို့အတွင်း ဖြစ်ပွားနေသည့် အစိုးရ၏ နှိမ်နင်း သတ်ဖြတ်မှုများကို သတင်းလွှင့် ထုတ်ပြန်သည်။ ဒီမိုကရေစီ တောင်းဆိုပွဲတွင် ပြည်သူ့တပ်မတော်မှ အမျိုးသားများ သာမက အမျိုးသမီးတွေ ကိုယ်တိုင် မော်တော်ကားများဖြင့် လှည့်လည်ကာ ဆန္ဒပြပွဲတွင် ပါဝင်ကြရန် နှိုးဆော်တိုက်တွန်းသည်။ ထိုအတောအတွင်း ပြည်သူတို့အား အသိပေး လိုသော သတင်းစကားများ နေရာအနှံ့ ဖြန့်ကျဲ လိုက်သေးသည်။ ဤတွင် အမျိုးသမီးတွေရဲ့ ရဲစွမ်းသတ္တိ အစွမ်းပကားကို ပြလိုက်ခြင်း မဟုတ်ပါလော။

ဂွမ်ဂျူးမြို့ပေါ်တွင် နဖူးစီးစာတန်းများ၊ ပို့စတာများက ရဲရဲတောက် နီရဲနေသလို ဆေးရုံ ဆေးခန်းများတွင် ဒဏ်ရာရသူများ၏ သွေးရောင်ကလည်း နီရဲရဲ ၀မ်းနည်းဖွယ်။ ဒဏ်ရာရသူမှာ ဆေးရုံများတွင် နေရာမဆန့်။ ဆရာဝန်၊ သူနာပြု ဆရာမများက အတတ်နိုင်ဆုံး ကုသပေးသော်လည်း လက်လှမ်းမမီ၍့ သေဆုံးသွားရတာကလည်း အများအပြား။ မျက်မြင် သူနာပြု တဦး၏ ငြီးညူသံအရ “လူနာများမှာ ထိုးသတ်ခံရ၊ ပစ်သတ်ခံရသည့် ဒဏ်ရာများ၊ ဆရာဝန် သူနာပြုဆရာမများ ၇ ရက်လောက် မအိပ်စက်ရ။” ဤစကားအရ စစ်သားတွေ ဘယ်လောက် ကြမ်းကြုတ် ယုတ်မာပြီး ပြည်သူတွေ ဘယ်လောက် စုစည်း ညီညွတ်ပြီး အသက်ပေး အသေခံ သွားကြသည်ကို မြင်ယောင်နိုင်သည်။

သွေးမလုံလောက်၍ ဒဏ်ရာရသူအား ခွဲစိတ်ကုသမှု မပြုနိုင်။ ၎င်းသတင်းကို မော်တော်ကားဖြင့် မြို့ကို ပတ်ပြီး အကြောင်းကြားရာ လူငယ်လူရွယ် သက်ကြီးရွယ်အိုများ ဆေးရုံသို့ လာရောက် သွေးလှူဒါန်းကြသည်။ လိင်လုပ်သားများ ပါမကျန် ဆေးရုံသို့ စုရုံးရောက်ရှိလာပြီး သွေးလှူးဒါန်းကြသည်။ ပထမတွင် ၎င်းတို့ အသက်မွေးဝမ်းကြောင်းနဲ့ ပတ်သက်ပြီး ဆရာဝန်တွေက လက်မခံလိုကြပေ။ သို့သော်လည်း နောက်ပိုင်းတွင် လိင်လုပ်သားများကို လက်မြှောက်အရှုံးပေးပြီး လက်ခံလာရတော့သည်။ ဤသွေးလှူဒါန်းမှုကို ကြည့်ခြင်းအားဖြင့် တောင်ကိုးရီးယား ပြည်သူတွေ ဒီမိုကရေစီ အပြောင်းအလဲကို မည်မျှ လိုလားနေခဲ့သည်ကို ခန့်မှန်းနိုင်ပါသည်။

စစ်တပ်မှ မည်သို့ ရက်စက် အကြမ်းဖက် သတ်ဖြတ်သည်ဖြစ်စေ ကျောင်းသားများ၊ ပြည်သူ့တပ်မတော်နှင့် တောင်ကိုးရီးယား နိုင်ငံသားပြည်သူတို့က အရှုံးမပေး။ အဆုံးမှာတော့ စစ်အာဏာရှင်မှ မည်မျှ အင်အားကြီးမားပြီး၊ မည်သို့ လိမ်လည်ကောက်ကျစ် နှိပ်စက်နိုင်စေကားမူ ပြည်သူလူထု၏ ညီညွတ်သော လူ့အဖွဲ့အစည်း ခွန်အားကို မယှဉ်ပြိုင် နိုင်ကြောင်း တောင်ကိုးရီးယား ဒီမိုကရေစီ တောင်းဆိုမှု အရေးတော်ပုံမှ သက်သေပြလိုက်သည်။

0 comments:

Post a Comment