အာရှလူ့အခွင့်အရေး ကော်မရှင် မြန်မာဌာန
လက်နက်ကိုင် စစ်ပွဲ ပဋိပက္ခကြောင့် ၁၉၈၆ မှ ၁၉၉၆ နှစ် အတွင်း ကလေးသူငယ် ၂ သန်းကျော် သေဆုံးကာ ၄ သန်းမှ ၅သန်း အကြား မသန်မစွမ်း ဖြစ်ခဲ့ရပြီး ၁၂ သန်းခန့် အိုးမဲ့အိမ်မဲ့ ဘ၀သို့ ရောက်ခဲ့ရသည်ဟု ကုလသမဂ္ဂ ကလေးများဆိုင်ရာ အရေးပေါ် ရန်ပုံငွေအဖွဲ့ (UNICEF) မှ ဆိုခဲ့သည်။ ကုလသမဂ္ဂ လုံခြုံရေး ကောင်စီမှလည်း ၁၉၉၉ သြဂုတ်လ ၂၅ ရက်နေ့တွင် ကလေးသူငယ်များ ဆိုင်ရာ လက်နက်ကိုင် ပဋိပက္ခနှင့် စပ်လျဉ်းသော ဆုံးဖြတ်ချက် တရပ်ကို ချမှတ်ခဲ့သည်။ အဆိုပါ ဆုံးဖြတ်ချက် အမှတ် ၁၂၆၁ အရ “ကုလသမဂ္ဂ အဖွဲ့ဝင် နိုင်ငံများ အနေဖြင့် လက်နက်ကိုင် ပဋိပက္ခတွင် ကလေးငယ်များအား စစ်သားအဖြစ် စုဆောင်းမှုကို ရပ်တန့်ရန်” တောင်းဆို ထားသည်။ ထိုဆုံးဖြတ်ချက်အရ ကလေးငယ်များအား စစ်သားအဖြစ် အသုံးပြုမှုအပေါ်တွင် နိုင်ငံတကာ ပြစ်မှုဆိုင်ရာ တရားရုံး ICC အနေဖြင့် အရေးယူ နိုင်ကြောင်းကိုလည်း ဖေါ်ပြထားသည်။
အထက်ပါ အရေးယူမှုကို ရှောင်ရှားရန် “၎င်းတို့ စစ်တပ်အတွင်း ကလေးစစ်သား မရှိကြောင်းနှင့် ယင်းစွပ်စွဲချက်မှာ အနောက် နိုင်ငံကြီးများနှင့် နယ်စပ်အခြေစိုက် လူ့အခွင့်အရေး အဖွဲ့များ၏ လိမ်လည် ပြောဆိုမှုသာ ဖြစ်ကြောင်း” န အ ဖ မှ အစဉ်တစိုက် ငြင်းပယ်ခဲ့သည်။ သို့သော်လည်း န အ ဖ စစ်တပ်အတွင်း ကလေး စစ်သား (၇၀,၀၀၀) ခန့်ရှိသည်ဟူသော ၂၀၀၃ ခုနှစ် လူ့အခွင့်အရေး စောင့်ကြည့် ရေးအဖွဲ့ (Human Rights Watch) အစီရင်ခံစာမှ ပေါ်ထွက်လာပြီး သည့်နောက် မြန်မာနိုင်ငံတွင် ကလေးစစ်သား အဓမ္မခိုင်းစေမှု ရှိနေခဲ့ကြောင်းကို ကမ္ဘာမှ သိရှိလာခဲ့ရသည်။
လက်ရှိ မြန်မာနိုင်ငံ န အ ဖ စစ်တပ်သည် အမျိုးသား လွတ်မြောက်ရေး တပ်မတော်၊ အမျိုးသား ကာကယ်ရေး တပ်မတော် မဟုတ်တော့ဘဲ သာသနာကို ဆော်ကား၊ နိုင်ငံသား အခွင့်အရေးကို ချိုးဖေါက်၊ တိုင်းရင်းသား အင်အားစုများကို ဖိနှိပ်ခြင်းကြောင့် ပြည်သူလူထုမှ အယုံအကြည်မရှိ၍ စစ်တပ်သို့ ၀င်ရောက်သူ ရှားပါးလာသည်။ ဒါ့အပြင် “စစ်တပ်မှ ထွက်ပြေးသော စစ်သား အများအပြား ရှိလာနေခြင်းနှင့် ပြုန်းတီးသွားသော စစ်အင်အားကို ပြန်လည်ပြည့်မီရန် ဆောင်ရွက် လိုခြင်းကြောင့် အရွယ်မရောက်သော ကလေးသူငယ်များအား အဓမ္မ စစ်သားစုဆောင်းမှု ပိုမိုပြုလုပ်လာသည်” ဟု ရိုးမ ၃ သတင်းဌာန၏ ဇူလိုင်လ၊ ၂၂ ရက်နေ့ထုတ် ‘ မြန်မာ့ သားကောင်းများအတွက် ၀မ်းနည်းဖွယ်ရာ ကလေး စစ်သားများ’ အမည်ရှိ အစီရင်ခံစာမှ န အ ဖ စစ်အစိုးရ၏ ကလေး စစ်သား အသုံးပြု နေမှုများကို ကမ္ဘာ့နိုင်ငံများသို့ အသိပေး လိုက်ပြန်သည်။
န အ ဖ စစ်အစိုးရသည် ၂၀၀၈ ခုနှစ်တွင် စစ်အင်အား (၅) သိန်း ပြည့်မီရန် စီမံကိန်း တခုချမှတ်ခဲ့သည်။ အဆိုပါ စီမံကိန်းအတိုင်း အကောင်အထည် ဖေါ်နိုင်ရန် ၂၀၀၇ ခုနှစ် ဇူလိုင်လတွင် ပြုလုပ်သော စစ်ဆင်ရေး (လေးလပတ်) အထူး အစည်းအဝေးတွင် တနှစ်လျှင် စစ်သားဦးရေ ၅၉၄၄၂ ဦး စုဆောင်းရန် စုဆောင်းရေး တပ်များကို ဗိုလ်ချုပ်မှူးကြီး သန်းရွှေမှ ညွန်ကြားခဲ့သည်။ အကြောင်းမှာ တပ်ရင်းတရင်းတွင် တနှစ် စစ်သား (၃၀) ဦးခန့် ထွက်ပြေး နေကြောင်းကို ရိုးမ ၃ သတင်းဌာန အစီရင်ခံက ထောက်ပြထားသည်။
န အ ဖ စစ်အစိုးရသည် ကလေးစစ်သားများ စုဆောင်းရာတွင် စည်းရုံးယူ၍တမျိုး၊ ခြိမ်းခြောက် ပြောဆို၍တဖုံ၊ ညအမှောင်တွင် ဖမ်းယူ၍တဖွယ် နည်းလမ်း အသွယ်သွယ်ဖြင့် အတင်းအဓမ္မ စုဆောင်း နေကြောင်းကို လိမ်ညာ၍ မရအောင် ဓါတ်ပုံ အထောက်အထားများဖြင့် အစီရင်ခံစာက ဖေါ်ပြနိုင်ခဲ့သည်။ ဒါ့အပြင် မြန်မာနိုင်ငံတွင် စားဝတ်နေရေး အကြပ်အတည်း ကြောင့် စစ်တပ် အာဏာပိုင်များနှင့် ပေါင်းကာ ကလေးငယ်များအား ရောင်းကုန် တဖွယ် စစ်သားအဖြစ် အရောင်းအ၀ယ် ပြုမှုအထိ ရှိလာ နေကြောင်းလည်း အစီရင်ခံစာတွင် ပါရှိသည်။
စည်းရုံးသိမ်းသွင်းရာတွင် န အ ဖ စစ်အစိုးရမှ ဆောင်ရန်၊ ရှောင်ရန် စည်းကမ်း သတ်မှတ်ပြီး (န လ စ)၊ (န လ က) အဖွဲ့များ တနိုင်ငံလုံး အတိုင်းအတာဖြင့် မြို့နယ်ပေါင်း ၃၇ ခုတွင် အခြေစိုက်ကာ ရပ်ကွက်၊ ကျေးရွာများသို့ ကွင်းဆင်း စည်းရုံး ဟောပြောသည်။ စည်းရုံးရေး နည်းလမ်းမှာ စစ်တပ် အာဏာပိုင်များမှ အရပ်ဝတ်ဖြင့် ဖြစ်စေ၊ စစ်ဝတ်ဖြင့် ဖြစ်စေ လူငယ်များ၏ အမြင်တွင် ဂုဏ်ယူအားကျဖွယ် ဖြစ်အောင် ၀တ်ဆင်ပြီး “နိုင်ငံတော်နှင့် ပြည်သူလူထုအတွက် ကိုယ်ကျိုးစွန့်၍ ၂၄ နာရီ တာဝန်ထမ်းဆောင် နေမှုကြောင့် နိုင်ငံတော်မှ ထိုက်သင့်သည့် အခွင့်အရေးများကို အရပ်သား ၀န်ထမ်းများရရှိသည့် လစာငွေထက် မိမိတပ်မတော်သားများ၏ လစာ အခွင့်အရေးများ ရှိကြောင်း” ပြောဆို စည်းရုံးလေ့ရှိသည်။
အလားတူ စည်းရုံးရေးနည်းကို သာမန် ပြည်သူများကို သာမက သံဃာတော်များ အားလည်း “တပည့်တော်တို့ နိုင်ငံတော် အစိုးရသည် နိုင်ငံရေး တာဝန်များ သာမက လူမှုရေး၊ ကျန်းမာရေး ပညာရေး အပါအ၀င် နိုင်ငံတော် ဖွံြု့ဖိုးတိုးတက်ရေး၊ ဘာသာ၊ သာသနာ တိုးတက် ထွန်းကားရေးကိုပါ အလေးထား ဆောင်ရွက်လျှက် ရှိပါသည် ဘုရား။ တပ်မတော် အင်အား တောင့်တင်းမှသာ နိုင်ငံတော် ကာကွယ်ရေးနဲ့ ဖွံ့ဖြိုး တိုးတက်ရေး လုပ်ငန်းများကို ဆောင်ရွက်နိုင်မှာ ဖြစ်သလို ဘာသာ၊ သာသနာ ထွန်းပြောင်ရေးကိုလည်း ယခုထက် ပိုမို ဆောင်ရွက်နိုင်မည် ဖြစ်ပါသည်ဘုရား။ တပည့်တော်တို့သည် ဗုဒ္ဒဘာသာဝင်များ ဖြစ်သည်နှင့်အညီ ရဟန်းသံဃာတော်များ၏ ဆုံးမသြ၀ါဒါများကို ရှေးရခင်ကပင် အလေးထား လိုက်နာကြသည့် အစဉ်အလာ ကောင်းများ ရှိပါသည်ဘုရား။ တပည့်တော်တို့ တပ်မတော်သား အနေဖြင့်လည်း ပြည်သူလူထုနှင့်အတူ သာသနာတော်ကို ယခုကဲ့သို့ ပိုမိုတိုးတက်အောင် ဆောင်ရွက်လိုပါသည် ဘုရား။ ဒါ့ကြောင့် အရှင်ဘုရားတို့ အနေဖြင့် ရပ်ရွာအတွင်းမှာ နေထိုင်ကြတဲ့ ဒါယိကာ ဒါယိကမများမှ တဆင့် သင့်တော်သူ လူငယ် လူရွယ်များအား တပ်မတော်တို့ ၀င်ရောက်ပြီး အမျိုး၊ ဘာသာ၊ သာသနာကို စောင့်ရှောက်နိုင်ရေးအတွက် ၀ိုင်းဝန်း စည်းရုံးပေးလိုပါသည် ဘုရား” ဟူဆို သံဃာတော်များအား စည်းရုံးမှုများလည်း ရှိသည်။
မည်သို့သော ရည်ရွယ်ချက်ကောင်းများဖြင့် ဆောင်ရန်၊ ရှောင်ရန် စည်းကမ်းများ သတ်မှတ်ထားသော်လည်း လက်တွေ့တွင်မူ ဤကဲ့သို့ မဟုတ်ပါ။ ဥပမာ မော်လမြိုင်တွင် အသက်မပြည့်သေးတဲ့ ကလေးတဦးကို ဆိုင်ကယ်တက္ကစီ သမားများက ပါးစပ်ပိတ် ခြိမ်းခြောက် ခေါ်ဆောင်သွားပြီး တပ်ရင်း ၁၀၄ သို့ ရောင်းချခဲ့သည်။ “ငွေ ၂ သောင်းခွဲကို ဗိုလ်မှူးဆီက လက်မှတ်ထိုးပြီး ယူသွားတယ်”ဟု အဆိုပါ ကလေးငယ်ကိစ္စကို လိုက်လံ ဆောင်ရွက်ပေးနေသူ တဦးကပြောသည်။ ဒါ့အပြင် ကလေးငယ်က “သူ့ကို အတင်း ပါးစပ်ပိတ်ပြီး ခေါ်သွားတယ်။ တပ်ကို ရောက်တော့ မင်းဟာမင်း ၀င်တာလို့ ပြောခိုင်းတယ်။ ပြန်ထွက်လာရင် ဓါးနဲ့ ထိုးသတ်မယ်” လို့ ခြိမ်းခြောက်ပြောဆိုကာ ပိုက်ဆံ ၂ သောင်းခွဲကို ဗိုလ်မှူးဆီက လက်မှတ်ထိုးပြီး ဆိုင်ကယ်တက္ကစီ သမားအား ပေးလိုက်သည်။
ထိုအခြင်းအရာကို ရပ်ကွက် သူကြီးကိုတိုင်ပြီး ရဲစခန်းတွင် အမှုဖွင့်ရာတွင်လည်း ရပ်ကွက်လူကြီးတွေက “တပ်ရဲ့ လက်အောက်မှာဆိုရင် လုပ်ပေးလို့ မနိုင်ဘူး” လို့ ပြောလိုက်ပါတယ်။ ကလေးမိသားစု ၀င်များက ၎င်းတပ်ရင်းသို့ လိုက်သွားပြီး တာဝန်ရှိ ဗိုလ်မှူးနှင့် တွေ့ဆုံကာ ကလေးကို ပြန်ခေါ်လိုကြောင်း ပြောသော်လည်း မရသည့်အပြင် မိသားစုဝင်များပါ ထမ်မံခြိမ်းခြောက် ခံခဲ့ရသည်။ “ကလေးဟာ အသက်မပြည့်သေးဘူး။ ဦးနှောက်ဥာဏ်ရည်လည်း သိပ်မပြည့်သေးဘူး”ဟု ကလေးမိဘများက ပြောရာတွင် “အသက် မပြည့်တာလည်း မလိုဘူး။ စစ်တပ်မှာ ရတယ်လို့ ပြောလိုက်တယ်။ စစ်တပ်ထဲ ရောက်ပြီရင် ပြန်ခေါ်လို့ မရဘူး။ တကယ်လို့ ကလေးကို ခေါ်သွားရင် မိသားစုတစုလုံး ထောင်ဝင်စာ တွေ့ရမယ်”လို့ ဗိုလ်မှူးက ပြောတယ်။
အခြား အပြစ်အပျက်မှာ ရွာတရွာရောက်သွားလျှင် ဥက္ကဌကိုခေါ်ပြီး ဒီမှာ ဘယ်နှစ်ယောက် ပေးပါဆိုပြီး ခွဲတမ်းချပြီး တောင်းသည်။ မဖြစ်မနေ လုပ်ပေးရတော့ ကျေးရွာဥက္ကဌများက ထည့်ပေးလိုက်ရတာလည်း ရှိသည်။ အဲဒီလိုနဲ့ အသက်မပြည့်သည့် ကလေးများ စစ်သား ဖြစ်သွားသည်လည်း ရှိသည်။ အချို့ရွာတွင် ယရက၊ မီးသတ်တွေနဲ့ ချိတ်ဆက်ထားပြီး ပို့ပေးရတာလည်း ရှိသည်။ ညဘက် မှောင်တဲ့အချိန်မှာ ကလေးတွေကို အတင်းဖမ်းပြီး စစ်တပ်ထဲ သွင်းတာမျိုး ရှိနေခြင်းကြောင့် ကလေးတွေအနေနဲ့ မ၀င်ချင်လည်း “မင်းတို့ စစ်တပ်ထဲ မ၀င်ရင် ထောင်ချမယ်”လို့ စစ်တပ်အရာရှိများမှ ခြိမ်းခြောက်မှုမျိုး ရှိနေခြင်းတို့ကြောင့် အရည်အချင်း မပြည့်သည့် သူတွေ စစ်တပ်ထဲသို့ ရောက်လာခြင်းမျိုးလည်း ရှိလာနေသည်။
မည်သို့သော ဆောင်ရန် ရှောင်ရန် စည်းကမ်းများ သတ်မှတ်ပြီး စည်းရုံး နေသော်လည်း စစ်အင်အား ဖြည့်တင်းရေး ညွှန်ကြားချက်ကြောင့် အောက်ခြေအဆင့် တပ်သား စုဆောင်းရာတွင် မရ ရသည့် နည်းလမ်းများဖြင့် စုဆောင်းနေလျှက်ရှိကဲ့သို့ မြုိ့နယ် ဦးရေအလိုက် လူဦးရေ နှုန်းထား သတ်မှတ်၍ စစ်သားကောက်ခံခြင်း၊ မြို့ပေါ် ရပ်ကွက်များတွင် ကျောင်းသား အရွယ်များအား အခွင့်အရေးနှင့် အခြား ခြိမ်းခြောက်မှုများ ပြုလုပ်ကာ အဓမ္မ စုဆောင်းခြင်း၊ တပ်ရင်းတပ်ဖွဲ့အလိုက် သတ်မှတ်ဦးရေ ပြည့်မီရန် စုဆောင်းနေမှုများ၊ ဝေးလံသောအရပ်များသို့ သွားရောက် အလုပ်လုပ်ကိုင်သူများအား ခြိမ်းခြောက်၍ စုဆောင်းခြင်း၊ စစ်မှုသက်တမ်း ပြည့်ပြီးနောက် တပ်မှ ထွက်လိုသူများမှ တပ်သားသစ် (အနည်းဆုံး ၂ ဦး) ရှာဖွေရခြင်း စသည့် အခြေအနေများရှိနေသည်။ ထို့ကြောင့် လက်ရှိ န အ ဖ စစ်တပ်အတွင်း အဓမ္မ စုဆောင်းခံရသူ ၈၀ ရာနှုန်း၊ စီးပွားရေး အဆင်မပြေ၍ အခွင့်အရေး ရလိုသူ ၁၀ ရာနှုန်း၊ ပြစ်မှုမှ ရှောင်လွှဲလိုသူ ၈ ရာနှုန်း ဖြစ်လာပြီး ၎င်းတို့ ဆန္ဒဖြင့် ၀င်ရောက်သူ ၂ ရာနှုန်းသာ ဖြစ်ကြောင်း အဆိုပါ ‘ မြန်မာ့သားကောင်းများ အတွက် ၀မ်းနည်းဖွယ်ရာ ကလေးစစ်သားများ’ အစဉ်ရင်ခံစာတွင် ဖေါ်ပြထားသည်။
“ကျနော် အမှုထမ်းဆောင်တဲ့တပ်မှာ စစ်ကြောင်းအချို့တွင် အင်အား ၁၈၀ ခန့်ရှိရာမှ အသက်မပြည့်သည့် ကလေးငယ် ၅၀ ခန့် ပါဝင်ကြောင်း၊ တပ်ရင်း တရင်းမှာ အသက်မပြည့်တဲ့ ကလေးတွေ အနည်းဆုံး ၇၀/ ၈၀ လောက်ရှိတယ်။ တပ်ခွဲတခွဲမှာ ၇ ယောက်လောက်ရှိတယ်။ တပ်မတခုမှာ ၄၅၀/ ၅၀၀ လောက်ရှိတယ်။ ကလေးက ၀ါဒနာမပါဘဲ ရှေ့တမ်းရောက်တော့ ကိုယ့်ကိုယ်ကို သတ်သေတာတို့ ထွက်ပြေးတာတို့ အများကြီးရှိတယ်” လို့ စစ်မှုထမ်းဟောင်း တဦးက ပြောကြောင်း ရိုးမ ၃ သတင်းဌာနမှ ထုတ်ဝေသည့် အစီရင်ခံစာတွင် ဖေါ်ပြထားသည် ။
ကလေးများအား စစ်တပ်အဖြစ် သွပ်သွင်းခြင်းသည် ၎င်းတို့အတွက် ရုပ်ပိုင်းဆိုင်ရာ၊ စိတ်ပိုင်းဆိုင်ရာ ထိခိုက်စေသည့်အပြင် သူတို့၏ ကလေးဘ၀နဲ့ ပညာရေးကိုလည်း ဆုံးရှုံးစေသည်။ ကလေးများအား အကြပ်ကိုင် ဖိအားပေး၍ ဖြစ်စေ၊ ဆန္ဒအရ ၀င်ရောက်သည်ဖြစ်စေ ၎င်းတို့၏ ပုဂ္ဂိုလ်ရေး တိုးတက်ဖွံ့ဖြိုးမှုကို ရိုက်ချိုးလိုက်သလို ဖြစ်ပါသည်။
ကလေးစစ်သား အသုံးမပြုရေးနှင့် ပတ်သက်ပြီး န အ ဖ မှ ကုလသမဂ္ဂနှင့် ပူးပေါင်းပြီး၂၀၀၄ ခုနှစ် ဇန်န၀ါရီလ (၅) ရက်နေ့တွင် အရွယ်မရောက်သေးသူ ကလေးငယ်များအား စစ်မှုထမ်းဆောင်ခြင်းမှ ကာကွယ်တားဆီး ထိန်းသိမ်းရေး ကော်မတီကို ဖွဲ့စည်းခဲ့သည်။ အဆိုပါ ကော်မတီသည် လုပ်ငန်းများ ထိရောက်စွာ အကောင်အထည် ဖေါ်ခြင်း မရှိသောကြောင့် မြန်မာနိုင်ငံတွင် ယနေ့တိုင် အရွယ်မရောက် သေးသော ကလေး မြောက်များစွာ စစ်သားအဖြစ် အဓမ္မစုဆောင်း ခံနေရဆဲဖြစ်သည်။
နိုင်ငံတကာ ရာဇ၀တ် ခုံရုံးမှု ၁၉၉၈ အတည်ပြုခဲ့တဲ့ ဥပဒေအရ အသက် ၁၅ နှစ်အောက် ကလေးငယ်များအား ပြည်တွင်းစစ်နှင့် နိုင်ငံတကာ စစ်ပွဲအကြား အစိုးရကိုယ်စား အမှုထမ်းသည် ဖြစ်စေ ကလေးအခွင့်အရေးကို ချိုးဖေါက်သည် သတ်မှတ်သည်။ ဤသို့ ကလေးအခွင့်အရေး ချိုးဖေါက်ခံနေရမှုများ အကာအကွယ် ပေးနိုင်ရန် နိုင်ငံတကာနှင့် ကုလသမဂ္ဂ အနေဖြင့် မြန်မာစစ်အစိုးမှ ကလေးစစ်သား အသုံးပြုနေမှုအပေါ် ထိရောက်သော ကိုင်တွယ် ဖြေရှင်းမှုတခုခု ဆောင်ရွက်ရန် လိုကြောင်း တင်ပြလိုက်ရပါသည်။
0 comments:
Post a Comment