အောက်တိုဘာလ ၃ ရက်၊ ၂၀၀၉ ခုနှစ်
မြန်မာနိုင်ငံအတွင်းရှိ တရားစွဲအဖွဲ့ အစည်းများအနက် ထင်ရှားသည့် အဖွဲ့အစည်း မှာ ဖမ်းဆီးမှုများ စဉ်ဆက်မပြတ် လုပ်ဆောင်နေသည့် မြန်မာနိုင်ငံ ရဲတပ်ဖွဲ့၊ အထူးသတင်းတပ်ဖွဲ့နှင့် သာမန်မြို့နယ်ရဲတပ်ဖွဲ့ စခန်းများဟူ၍ တွေ့ရှိနိုင်သည်။
တရားစွဲ အဖွဲ့အစည်းဖြစ်သည့် မြန်မာနိုင်ငံ ရဲတပ်ဖွဲ့သည် နိုင်ငံတော်ပြည်ထဲရေး ၀န်ကြီးဌာန၏ လက်အောက်ခံ အဖွဲ့အစည်းဖြစ်ပြီး နိုင်ငံတော် ကာကွယ်ရေးဆိုင်ရာ ကိစ္စရပ်များတွင် တပ်မတော်၏ ဒုတိယ အရံအင်အားဖြစ်ကြောင်း ဗိုလ်ချုပ်မှူးကြီး သန်းရွှေက အခွင့်သင့် တိုင်း ပြောဆိုမြှောက်ပင့် ပြောဆိုနေသည့် အဖွဲ့အစည်း လည်း ဖြစ်သည်။
နိုင်ငံတော်၏ ပြည်တွင်းလုံခြုံရေးကို ဆောင်ရွက်နေရသည့် မြန်မာနိုင်ငံ ရဲတပ်ဖွဲ့ သည် နိုင်ငံတော်၏ ပံ့ပိုးကူညီမှုကို အပြည့်အ၀ ရရှိပါသလား၊ လိုအပ်သည့် ဘဏ္ဍာငွေကြေးကို စဉ်ဆက်မပြတ် ထောက်ပံ့ကူညီ ပေးမှုများ ရှိသလား? ဆိုသည်မှာ စဉ်းစားရမည့် အချက်များ ဖြစ်လာသည်။
မိမိတို့နှင့် လက်လှမ်းမှီသည့် မြန်မာနိုင်ငံရဲတပ်ဖွဲ့က လူတဦးတယောက် ဖမ်းဆီး ချုပ်နှောင်ပြီးပါက မည်ကဲ့သို့များ နိုင်ငံတော် ဘဏ္ဍာကို ခွဲဝေသုံးစွဲပါသလဲ၊ အမှန်တကယ် ကျခံသုံးစွဲမှုများကော ရှိပါသလား……
သာမာန် လူတဦးတယောက်ကို ရဲကဖမ်းဆီးပြီးသည်နှင့် တပြိုင်နက်တည်း ဖမ်းဆီးခံရသူမှာ ဦးခေါင်းကို ဆင်နင်းသည်နှင့်မခြား ရှောင်လွှဲမရနိုင်သည့် အောက်ပါ ဒုက္ခများကို ရင်ဆိုင်ရ ပေတော့သည်။
ပထမဦးစွာ ရဲစခန်းတွင်းသို့ ၀င်ရောက်ပြီဆိုသည်နှင့် အများပြည်သူ မြင်သာအောင် ရေးဆွဲထားသည့် ပြစ်မှုဆိုင်ရာ ကျင့်ထုံးဥပဒေ နောက်ဆက်တွဲ စာတိုင် ၂ ပါ ရဲက အာမခံပေးနိုင်သည့် အမှုများ ဇယားတွင် မည်သို့ပင် ပါရှိစေကာမူ ရဲစခန်း အာမခံရဖို့အတွက် သက်ဆိုင်သည့် ရဲဝန်ထမ်းများကို အာမခံပေးရန်နှင့် မနှေး လျင်မြန်စွာ ဆောင်ရွက်ပေးရန်အတွက် လာဘ်ငွေပေးရသည်က ပထမဆုံး ရင်ဆိုင်ရမည်ဖြစ်သည်။ ထောင်ဒဏ် ၃ နှစ် အထက်ကျနိုင်သည့် အမှုဖြစ်ပြီး ရဲက အာမခံမပေးနိုင်သည့် အမှုဖြစ်သည်ဆိုပါက ဖမ်းဆီးခံရသူမှာ မလွဲမရှောင်သာ ရဲစခန်းရှိ အချုပ်ခန်းသို့ မြန်းရတော့မည်ဖြစ်သည်။
ရဲအချုပ်သို့ ရောက်ပြီဆိုသည်နှင့် ပထမဦးဆုံး ထိုသူရင်ဆိုင်ရမည့် ပြဿနာမှာ အချုပ်ခန်းအတွင်း မည်ကဲ့သို့ နေထိုင်ရမည်၊ မည်သည့် နေရာတွင် လှဲလျောင်း ရမည် ဆိုသည့်အချက်ပင် ဖြစ်သည်။ အချုပ်ခန်းအတွင်း မိမိနေလိုသည့် နေရာတွင် မိမိရွေးချယ်၍ စိတ်ညစ်ပိုင်ခွင့် မရှိသည်မှာလည်း မြန်မာနိုင်ငံအတွင်းရှိ ရဲစခန်းများ၏ ဓလေ့ထုံးတမ်း တခုဖြစ်သည်။
မြန်မာနိုင်ငံအတွင်းရှိ ရဲအချုပ်ခန်းများတွင် နှစ်ရှည်အမှု ရင်ဆိုင်နေရသည့်သူများ၊ သို့မဟုတ် ရဲစခန်းကို မိမိအိမ်ကဲ့သို့ သဘောထားပြီး ပြစ်မှုကျူးလွန်တတ်သည့် သူများကို ရဲများက စည်းရုံးပြီး အချုပ်ခန်းလူကြီးအဖြစ် ခန့်ထားကာ အချုပ်ခန်းကို စီမံခန့်ခွဲစေသည်။ အချုပ်ခန်း လူကြီး၏တာဝန်မှာ တနည်းအားဖြင့် ပြောရမည် ဆိုပါက ရဲစခန်းအတွက် နေ့စဉ် ကုန်ကျစရိပ်ကို ရှာဖွေပေး စီမံဆောင်ရွက် ပေးရသည်။ ထိုကြောင့်လည်း ရံဖန်ရံခါ အခန်းလူကြီးများ၏ အနိုင်ကျင့်မှုကို ခံရသည့် သူများက တာဝန်ကျ ရဲအရာရှိကို တိုင်တန်းသည့်အခါ အရေးမယူဘဲ လျစ်လျူရှုထားသည်ကိုလည်း တွေ့ရမည်ဖြစ်သည်။
အခန်းလူကြီးအဖြစ် ခန့်ထားတာဝန်ပေးခြင်း ခံရသူအနေဖြင့် လူသစ်များ ၀င်လာပါက အခန်းဝင်ကြေးအဖြစ် ဖမ်းဆီးခြင်း ခံရသည့် လူအပေါ်မူတည်ကာ ကောက်ခံသည်ကို တွေ့ရသည်။ ငွေများများ ပေးနိုင်ပါက အချုပ်ခန်းအတွင်း လဲလှောင်းရန် နေရာကောင်းကောင်း ရမည်ဖြစ်သည်။ ငွေမပေးနိုင်ပါက အချုပ်ခန်း သန့်ရှင်းရေးနှင့် လူအများ သုံးနေသည့်အိမ်သာ သန့်ရှင်းရေးတို့ကို လုပ်ဆောင် ရမည် ဖြစ်သည်။ အခန်းဝင်ကြေး အဖြစ် ပေးရသည့် ငွေများအနက်မှ နေ့စဉ် အချုပ်ခန်းအတွင်းရှိ လူများ မျက်နှာသစ်ရန်နှင့် အိမ်သာသန့်ရှင်းရေး ပြုလုပ်ရန် အတွက် လိုအပ်သည့် ရေပုံမှန်ရရှိစေရန် အခန်းလူကြီးက စီမံဆောင်ရွက်ရသည်။
ရဲစခန်းအများစုသည် အချုပ်ခန်းအတွင်းသုံးစွဲရန် ရေပိုက်များ ရှိသော်လည်း ရေမလာပါ။ ထို့ကြောင့် ရဲစခန်းမှ ရေသယ်ပေးသည့် ရဲတပ်သားကို အကျဉ်းသား များက ငွေပေးရသည့် သဘောပင်ဖြစ်သည်။ ထိုကဲ့သို့ ပေးရသည့် အခန်း ၀င်ကြေးထဲမှ မီးမလာသည့်အခါ ရဲစခန်း တာဝန်ကျသူများ အလုပ်လုပ်ကိုင်နိုင်ရန် အတွက် ဖယောင်းတိုင် နှင့် ခြင်ဆေးခွေတို့ ၀ယ်ယူရန် အကျဉ်းသားများထံမှ ရရှိသည့် ငွေများအနက်မှ အကုန်အကျခံရသည်။ စုပေါင်းထုတ်ပေးရသေးသည်။
ရဲအချုပ်နှင့် ရှိနေစဉ်အတွင်း နေစရာအတွက် အဆင်ပြေသွားပြီဆိုက နေ့စဉ် စားသုံးရန်အတွက် ပြဿနာကို ထပ်မံဖြေရှင်းရမည် ဖြစ်သည်။ ရဲက ဖမ်းဆီး ထားသဖြင့် ရဲစခန်းက အချိန်တန်လျှင် ထမင်းကျွေး လိမ့်မည်ဟု ယူဆလျှင် မှားပေလိမ့်မည်။ အမေကမွေး၊ ထောင်ကကျွေးဟူသည့် ဆိုရိုးစကားမှာ ကိုလိုနီခေတ်က လက်သုံးစကား သာဖြစ်သည်။ ယနေ့ မျက်မှောက်ခေတ်နှင့် အံဝင်ဂွင်ကျ မဖြစ်တော့။
ရဲစခန်းတွင် ဖမ်းဆီးချုပ်နှောင် ခံနေရစဉ်အတွင်း နေ့စဉ် အသက်ရှင်နေထိုင်ရန် စားသောက်မှုအတွက် မိမိ အစီအစဉ်ဖြင့်သာ ဖန်တီး ဆောင်ရွက်ရသည်။ ရဲစခန်းတွင် ချုပ်နှောင်ခံရသူများအတွက် စားသောက်စရိပ်ကို နိုင်ငံတော်က ကျခံသည့်ငွေမှာ မြို့နယ်မှူး၊ စခန်းမှူး၊ အရာရှိ၊ အရာခံနှင့် အချုပ်ခန်း ထမင်းချက်ကျွေးရန် ကန်ထရိုက်ရထားသည့် သူများက ဝေခွဲရယူပြီး ဖြစ်သည့်အတွက် နေ့စဉ်ရရှိသည့် ထမင်းနှင့် ဟင်းလျာများက အချုပ်ခန်း အတွင်းရှိ သူများ၏ အရည်အတွက်နှင့် အညီ လောက်ငှပြည့်စုံမှု မရှိ။ ထို့ကြောင့် ဖမ်းဆီးခံရသူများ ၏ နေအိမ်များမှ နေ့စဉ် ထမင်းပို့ခြင်းဖြင့် ဖြေရှင်းရသည်။
ရဲစခန်း၏ လိုအပ်သည့်ဆောင်ရွက်ချက်ကို ကူညီ ဖြည့်ဆည်းပေးသဖြင့် ထမင်းပို့သည့်အခါ အလွယ်တကူ ဆောင်ရွက်၍ ရမည်ဟု ထင်ပါက မှားပေလိမ့်မည်။ အချုပ်ခန်းစောင့် တာဝန်ကျရဲကို သဒ္ဒါကြေး သို့မဟုတ် စေတနာကြေး ပေးမှသာ မိမိပို့ပေးသည့် စားစရာ ထမင်းနှင့် သောက်စရာ ရေတို့ အဟန့်အတားမရှိ လျောလျောလျူလျူ ရောက်မည်ဖြစ်သည်။ ထိုသို့ ပေးကမ်းခြင်း မပြုပါက မိမိပေးပို့သည့် စားစရာ ထမင်းကို စားလိုစိတ် မရှိသည့် အခြေအနေထိ ရောက်အောင် မွှေနှောက်ရှာဖွေခြင်း၊ အချိန်မတော်သည့် အချိန်မှ အချုပ်ခန်း အတွင်းသို့ ရောက်ခြင်း စသည့် ပြဿနာများကို ရင်ဆိုင်ရမည်ဖြစ်သည်။
ရဲစခန်း အုပ်ချုပ်သည့် နယ်မြေအတွင်း နေထိုင်သူဖြစ်ပါက အနည်းဆုံး တခေါက်လျှင်ငွေကျပ် ၅၀၀ စေတနာကြေး ပေးရမည်ဖြစ်ပြီး ရပ်ဝေးမှ တခါတရံ လာတွေ့သူများ ဖြစ်ပါက ငွေကျပ် ၁၀၀၀ အနည်းဆုံး ပေးမှသာ အဆိုပါ စားသောက်သည့် ကိစ္စပြီးမြောက် မည်ဖြစ်သည်။ ထို့ကြောင့် တနေ့လျှင် အနည်းဆုံး ထမင်း ၂ ကြိမ် ပို့ရမည် ဖြစ်သည့်အတွက် အချုပ်သားတဦး တကြိမ်လျင် ၅၀၀၊ တရက်လျှင် ၁၀၀၀ ကျပ် အနည်းဆုံး ကုန်ကျခံမှသာ စားသောက်သည့်ကိစ္စ ပြီးမြောက်မည် ဖြစ်သည်။ အချုပ်ခန်းအတွင်း လူ ၁၀ ယောက်ရှိပါက တရက်လျှင် အနည်းဆုံး ၁၀၀၀၀ ကျပ်ကို အချုပ်ခန်း စောင့်သည့် ရဲက ရရှိမည်ဖြစ်သည်။
ထိုရရှိသည့်ငွေကို တဦးတည်း ရသည်မဟုတ် ရာထူးကြီးစဉ်ငယ်လိုက် ခွဲဝေပေးရပြန်သည်။ ရဲတပ်သားများ အနေဖြင့် ရရှိသည့် လစာငွေ မလောက်ငှသည့်အတွက် လစဉ် စားဝတ်နေရေးကို လာဘ်စားမှုဖြင့် ဖြေရှင်းရန်မှတပါး အခြားနည်းလမ်းမရှိ၊ တနည်းအားဖြင့် ရွေးချယ်စရာမရှိပေ။
အမှုအခင်း ဖြစ်လာပြီဆိုပါက အလွယ်တကူနှင့် ပြီးသည်မဟုတ် အနည်းဆုံး၂ ပတ်မှ မခန့်မှန်းနိုင်သည့် ကာလအထိ ကြာမြင့်တတ်သည်။ အကျဉ်းထောင်ရှိသည့် မြို့နယ်များဖြစ်သည် ဆိုပါက အနည်းငယ်သက်သာ သည်မှာ ရဲစခန်းတွင် ၂၄ နာရီ ချုပ်နှောင် ခံရပြီးပါက တရားရုံးသို့ တင်ပို့၊ တရားရုံးက အာမခံ မပေးနိုင်သည့်အမှု ဖြစ်က ဆက်လက်ချုပ်နှောင်ထားရန် အကျဉ်းထောင်သို့ ပို့၍ ချုပ်နှောင် စေသည့်အတွက် ရဲစခန်းတွင် ကုန်ရမည့် ငွေသက်သာသည်ဟု ဆိုရမည်။
အကျဉ်းထောင်နှင့် မနီးသည့် အရပ်ဒေသများ ဖြစ်ပါက အမှုပြီးဆုံးသည်အထိ အထက်ဖေါ်ပြပါ ရဲစခန်းနှင့်သာ နှစ်ပါးသွား စခန်းသိမ်း ရတော့မည် ဖြစ်သည့် အတွက် အထက်ဖေါ်ပြပါ ငွေကြေးများကို မရမက ရှာဖွေ အကုန်အကျ ခံရတော့မည် ဖြစ်သည်။ စားသောက်မှု ကိစ္စ ပြီးသွားသည်နှင့် စိတ်အေးရပြီဟု စိတ်နှလုံး ဒုံးဒုံးမချနိုင်သေးပါ။ အချုပ်ခန်းအတွင်း မိမိ တယောက်တည်း နေထိုင်ရသည်မဟုတ် အများနှင့် နေထိုင်ရသည် ဖြစ်၍ တကိုယ်ရေ သန့်ရှင်းရေးသည် အရေးကြီးသည့် နေရာမှ ပါဝင်လာသည်။
တကိုယ်ရေ သန့်ရှင်းမှု မရှိက အမှုပြီးပြတ်၍ ရဲစခန်းမှ ပြန်ထွက်လာသည့် အချိန်တွင် ယားနာ၊ ၀ဲနာတို့ဖြင့် ပြန်လည် ထွက်လာရမည်ဖြစ်သည်။ အနည်းဆုံး တပတ်(၇) ရက်တခါ ရေချိုး သန့်ရှင်းရေး လုပ်ရမည်ဖြစ်သည်။
အချုပ်ခန်းအတွင်း အချုပ်သားများ၏ ကျန်းမာရေး အတွက် နိုင်ငံတော်က ဆောင်ရွက် မပေးဟုဆိုပါက မှားပေလိမ့်မည်။ အချုပ်ခန်း အတွင်းရှိသူများ ရေချိုး သန့်စင်ရန်အတွက် နိုင်ငံတော် ၀န်ထမ်း ရဲတပ်ကြပ်၊ တပ်သားများက ငွေပေးပါက စွမ်းစွမ်းတမံ ချိုးရေအတွက် ရေထမ်းပေးမည် ဖြစ်သည်။ ရေတပုံးကို မည်မျှ ပေးရမည် ဆိုသည်က ရေရရှိနိုင်သည့် နေရာနှင့် ရဲစခန်းရှိ အချုပ်ခန်း၏ အကွာအဝေးပေါ်မူတည်ပါသည်။ ရေထမ်းပေးသည့် ရဲဝန်ထမ်းများကလည်း လူသားများ ဖြစ်သည့်အတွက် လိုအပ်သည့် ခွန်အား ရရှိရန်အတွက် အခကြေးငွေ တွက်ချက် ဆောင်ရွက်ပေးရခြင်း ဖြစ်သည်ဟု မေတ္တာပွားရုံမှတပါး အခြားရွေးစရာ လမ်းမရှိပေ။
ငွေကြေးမတတ်နိုင် သည့်သူများဖြစ်ပါက ရေမချိုးရုံသာ ရှိပေတော့သည်။ သို့မဟုတ်ပါက အချုပ်ခန်းအတွင်းရှိ လူအများ နေ့စဉ် သုံးစွဲ နေသည့် အိမ်သာ သန့်ရှင်းရေးနှင့် အခန်း သန့်ရှင်းရေးတို့ အတွက် လုပ်ကိုင် ဆောင်ရွက်ပေးမှသာ တကိုယ် ရေသန့်ရှင်းရေးအတွက် ရေချိုးခွင့် ရမည် ဖြစ်သည်။
အချုပ်ခန်းအတွင်း အထက်ပါ ကိစ္စများအတွက် ငွေကြေးကုန်ကျ ခံပြီးပါက အေးအေးဆေးဆေး အနားယူ၍ မိမိအမှုအား ခုခံချေပရန် စဉ်းစားနိုင်ပြီဟု ထင်လျှင် မှားပေလိမ့်မည်။ ထူးဆန်းသည်ဟုဘဲ ထင်ထင်၊ လူအမျိုးမျိုး၊ အမှုအထွေထွေ ကျူးလွန်လာသည့် သူများ ဖြစ်သည့်အတွက် အချုပ်ခန်းအတွင်း လုံခြုံရေးအတွက် အလှည့်ကျ ကင်းစောင့်ရန် ကိစ္စကိုလည်း ရင်ဆိုင်ရဦးမည် ဖြစ်သည်။ ဖေါက်ထွင်းမှုကို ကျွမ်းကျင်သူများက အချုပ်ခန်း ဖေါက်ထွက်ပြေးပါက မခက်ပါလား၊ ညအိပ်ရေးပျက်မခံနိုင်၊ ကင်းမစောင့်နိုင်သူ ဖြစ်ပါက အငှား ကင်းစောင့်မည့်သူကို ထပ်မံငှားရမ်းဖို့ ငွေလိုပါသေးသည်။ ကင်းသမား၏ တာဝန်မှာ သိပ်ခက်ခဲလှသည်တော့ မဟုတ်၊ ၁၅ မိနစ်တကြိမ်၊ အချို့ရဲစခန်းများ တွင် မိနစ် ၃၀ တကြိမ်၊ အချက်ပေး သံချောင်းခေါက်ပါက အခန်းတွင်း အခြေအနေကို ကြည့်ပြီး အချုပ်သား ဘယ်နှစ်ဦး၊ အခြေအနေ အားလုံး ကောင်းပါသည် ခင်ဗျားဟု အော်ဟစ် သတင်းပို့ ရခြင်းသာ ဖြစ်သည်။ ကင်းစောင့် တာဝန်မှာ ၂ နာရီ ဖြစ်သည်။ အချုပ်ခန်းအတွင်းရှိ လူများပေါ် မူတည်၍ ကင်းတာဝန် ချထားသည့်အတွက် ရဲစခန်း တခုနှင့်တခု စီမံဆောင်ရွက်ပုံ မတူညီ။ သို့သော် ကင်းတာဝန် ၂ နာရီမှာ တူညီသည်ကိုလည်း တွေ့ရမည် ဖြစ်သည်။
ညတာဝန်ကျရဲများ တာဝန် ထမ်းဆောင်နိုင်စေရန် အတွက် မီးမလာပါက ဖယောင်းတိုင်၊ ညအချိန် ဖြစ်သည့်အတွက် အလုပ်လုပ်ရာတွင် အနှောင့်အယှက် မဖြစ်စေရန် အတွက်လည်း လိုအပ်သည့် ခြင်ဆေးခွေ စသည်တို့ကိုလည်း အချုပ်သားများ၏ ထောက်ပံ့မှုများဖြင့် ရဲဝန်ထမ်းများက တာဝန် ထမ်းဆောင် နေရသည်ကို တွေ့ရမည်ဖြစ်သည်။
နေ့စဉ် စားသောက်ရန်ကိစ္စ၊ တကိုယ်ရေသန့်ရှင်းရေးကိစ္စ နှင့် ကုန်ကျစရိတ် အ၀၀အတွက် ရဲစခန်းတွင် အချုပ်ခံ နေရစဉ်အတွင်း ငွေကြေးမတတ်နိုင်သူ ဖြစ်ပါက အနည်းဆုံး တဦးအတွက် တလလျင် ငွေ ၅၀၀၀၀ ကျပ် ကုန်ကျမည် ဖြစ်ပါသည်။ ငွေကြေး အသင့်အတင့် တတ်နိုင်သူဖြစ်ပါက ထို့ထက်ပို၍ ကုန်မည်ဖြစ်ပြီး၊ မြို့ပေါ် ရဲစခန်းများဖြစ်ပါက အထက်ပါ ငွေထက် ၂ ဆ ခန့် ကုန်ကျရမည် ဖြစ်ကြောင်း တင်ပြလိုက်ပါသည်။
အမှုအတွက် ကုန်ကျရမည့်ငွေများကို ဆက်လက် ဖေါ်ပြပါအုံးမည်။
0 comments:
Post a Comment