အောက်တိုဘာလ ၂၇ရက်၊ ၂၀၀၉ ခုနှစ်
ရဲစခန်းကတဆင့် ညွှန်ပြလို့ငှားတဲ့ရှေ့နေ၊ အမှုပွဲစားတွေက ငှားပေးတဲ့ရှေ့နေ၊ တရားခွင်စာရေးနဲ့ ဘီးလစ် စာရေးတို့က ညွှန်းတဲ့ရှေ့နေ၊ တရားသူကြီး ကိုယ်တိုင်က ငှားဖို့ပြောတဲ့ရှေ့နေ အစရှိသဖြင့် အမှုဖြစ်လာပြီ ဆိုမှတော့ ငွေကုန်ဖို့က နည်းလမ်းပေါင်းစုံနဲ့ ပေါ်လာတာပါပဲ….။ သေဒဏ်ထိုက်သင့်တဲ့ အမှုကို ကျူးလွန်ပြီး ငွေမတတ်နိုင်တဲ့ အမှုသည်တွေအတွက် နိုင်ငံတော်က အစိုးရစားရိတ်နဲ့ ရှေ့နေငှားပေးပါတယ်..။
တကယ်တန်းပြောရရင် အထက်တန်းရှေ့နေ၊ မှတ်ပုံတင်လက်မှတ်ရရှေ့နေ၊ တရားရုံးချုပ်ရှေ့နေ အစရှိသဖြင့် ရှေ့နေတွေထဲမှာလည်း အမျိုးမျိုးပါ၊ အထက်တန်းရှေ့နေ ဆိုတာကမြို့နယ်၊ခရိုင်၊ ပြည်နယ်နဲတိုင်း အထိဘဲလိုက်ပါ ဆောင်ရွက်လို့ရတယ်။ ရန်ကုန်တိုင်းမှာ လိုက်ပါဆောင်ရွက်ဖို့ စာရင်းတင်ထားတဲ့ ရှေ့နေက အခြားပြည်နယ်နဲ့တိုင်းမှာ အမှုသွားလိုက်ချင်ရင် လိုက်ပါဆောင်ရွက် ခွင့်ကို သက်ဆိုင်ရာ ပြည်နယ်နဲ့တိုင်းမှာ ထပ်မံတင်ပြခွင့်တောင်းရပြီး တရားရုံးချုပ် ရှေ့နေကတော့ မြန်မာနိုင်ငံ တနိုင်ငံလုံးကို လိုက်ပါ ဆောင်ရွက်နိုင်တယ်။
ဆရာဝန်မှားသွားရင် “လူနာကမြေကြီးအောက် ခြောက်ပေမှာ စန့်စန့်လေး နေရသလို၊ ရှေ့နေတချက်လျှာ ချော်သွားရင်လဲ အမှုသည်က လေထဲမှာ ခြောက်ပေတန်းလန်းနဲ့ ဂန့်ရတယ်” ဆိုတဲ့ ဆိုရိုးစကားရှိတယ်လေ။ ဒါကြောင့် ရှေ့နေငှားမယ်ဆိုရင်လည်း စိတ်ချရဖို့လိုတယ်။ ဥပဒေကို ပိုင်ပိုင်နိုင်နိုင် သိတဲ့ရှေ့နေဆိုပေမဲ့ တရားရုံးနဲ့မပိုင်ရင်လည်း မဖြစ်သေးဘူးလေ…။ ခေတ်နဲ့ စံနစ်ကိုက အဲဒီလိုဖြစ်နေတာကိုး..။ ဆရာဝန်တွေမှာ အထူးကု ဆိုတာတွေ ရှိသလို ရှေ့နေတွေမှာလည်း စပါယ်လစ် ရှေ့နေတွေရှိပါတယ်။ မူးယစ်ဆေးဝါးမှုဆိုရင် ဘယ်မြို့နယ်မှာ ဘယ်သူ့ကိုငှား၊ လူသတ်မှု ဓါးပြမှုဆိုရင် ဘယ်ရှေ့နေကိုငှား၊ စသုံးလုံး အမှုဆိုရင် သူတို့နဲ့ အမြဲတန်း ထိတွေ့နေတဲ့ ရှေ့နေကိုရှာ၊ မုဒိန်းမှုဆိုရင်တော့ဖြင့် ဘယ်သူက အတော်ဆုံး စသဖြင့် အထူးကျွမ်းကျင်တဲ့ သူတွေရှိပါတယ်။
ရှေ့နေတွေကလည်း ပေါမှပေါ။ တချို့ဆိုနာမည်တူတွေများလွန်းလို့ တရားရုံးချုပ်က နံပါတ်တပ် ပေးထားတယ်။ ဥပမာ--- မောင်မောင်ဆိုတဲ့အမည်က မြန်မာပြည်မှာ အလွန်အမှည့်များတဲ့ နာမည်ပေါ့။ တရားရုံးချုပ်ရှေ့နေတွေ ထဲမှာတင် ကျနော်တို့ခေတ်က ၆ ဦးလောက်ရှိတယ်။ အဲဒီတော့ ဦးမောင်မောင် (၁)(၂) (၃) စသဖြင့် အမှတ်စဉ် ထိုးပေးလိုက်တာ (၆) ကျတော့ သိပ် အဆင်မပြေဘူး။ နံပါတ် ၆ လား၊ လူကအခြောက်လား ဆိုတာကို အမှုသည်တွေက မသိဘူး… ။ အဲဒီလို မဖြစ်ရအောင် တချို့ကျတော့ ယူထားတဲ့ ဘွဲထူးတွေနဲ့ ကိုယ့်ဖါသာကိုယ် ခွဲလိုက်တယ်.. ။ ဒေါက်တာ မောင်မောင်ကျော်၊ ဦးအုန်းမောင် (စိတ်ပညာ) စသဖြင့်ပေါ့..။ တချို့ကျတော့လည်း မိမိရဲ့မွေး ရပ်မြေကို အမည် နောက်မှာ ထည့်လိုက်တာပါပဲ။ ဦးအေးမောင်(ပန်းတနော်)၊ စိန်ဝင်း(မြင်းခြံ)၊ မျိုးထွဋ်(ညောင်တုန်း) စသဖြင့်ပေါ့။ နွားထိုးကြီးတို့၊ ပြွန်တန်ဆာတို့က ရှေ့နေတွေတော့ မွေးရပ်ထည့်တာမတွေ့ပါဘူး…။ မွေးရပ်မြေကို မချစ်လို့တော့ မဟုတ်ဘူး ထင်ပါတယ်…။ ဒါက ရှေ့နေတွေကိုယ်တိုင် ရွေးချယ်ထားတဲ့နာမည်ပါ။
အမှုသည်တွေကလည်း လူအမျိုးမျိုးမဟုတ်လား။ ပေးထားတဲ့ အမည်တွေအတိုင်း ခေါ်ချင်မှခေါ်တာ နောက်ကွယ်ကျရင် ပြောချင်ရာပြောတာ.. ။ ငွေပေးပြီး ငှားထားရတော့ နောက်ကွယ်မှာ ပေးထားတာနဲ့ တန်အောင် ခေါ်လိုက်အုံးမယ် ဆိုပြီး ခေါ်ကြတာပါဘဲ…။ သူတို့လည်းသူတို့ နာကျည်းချက်တွေနဲ့ကိုး…။ ဘယ်တားလို့ ရပါ့မလဲ။ အဲဒီလိုခေါ်ကြတဲ့ အထဲမှာ အချို့ဂုဏ်ထူး ၀ိသေသတွေက မဆိုးဘူးခေတ်မှီတယ်လို့ ပြောရင်ရတယ်။ မူးယစ်ဆေးဝါးမှု၊ ဓါးပြမှုလိုက်တဲ့ ရှေ့နေတွေကို ပေးထားတာက အီတလီ မာဖီးယားဂိုဏ်းက ခေါင်းဆောင်တွေလို ဒွန် ဘယ်သူဘယ်ဝါပေါ့….။ အဲဒီရှေ့နေဆို မူးယစ်ဆေးဝါးမှုတွေမှာ စပါယ်ရှယ်လစ် လို့သာမှတ်။
၁၉၈၈ မတိုင်မှီက မူးယစ်ဆေးဝါးမှုက များမှများကိုး။ အဲဒီတော့ ကျွမ်းကျင်သူတွေ ပေါ်လာတာပေါ့….။ ဘယ်မြို့နယ်မှာဆို ဒွန် ဘယ်သူကို ငှားလိုက်ပေါ့၊ မုဒိန်းမှုတွေ လိုက်တဲ့ ရှေ့နေတွေကျတော့ သိပ်မသက်သာလှဘူး။ ကျနော်တို့ ခေတ်တုန်းက မုဒိန်းမှုတွေဆို ရဲကနေ အငြိမ်းစားယူပြီး ရှေ့နေလိုက်တဲ့ သူတွေက အဲဒီအမှုတွေကို ရတာများတယ်…။ စေ့စေ့ပေါက်ပေါက် မေးရတာ ရယ်..။ နောက်ပြီး စွပ်စွဲတဲ့သူ၊ ကျူးလွန်ခံရတဲ့ အမျိုးသမီးက အမှန်အကန်လား၊ အကြံအဖန်လား ဆိုတာတွေကို သူတို့က ရဲလုပ်သက်တွေအရ သိပြီးသားဆိုတော့ အဲဒီတချက်က သူတို့အတွက် တပန်းသာတာပေါ့ဗျာ…။ တခါက ရဲဝန်ထောက်ဟောင်း တရားရုံးချုပ် ရှေ့နေတဦးဆို မေးရင်းမေးရင်း အာတွေ့သွားလို့ တရားရုံးချုပ်ကလိုင်စင် ၂ နှစ် အနားပေးတာ ခံလိုက်ရတာတွေလည်း ရှိတယ်။
ပါးစပ်လိုင်စင် ရပြီဆိုပြီး ပြောချင်တာ ပြောလို့တော့ မရဘူး.. ။ ကန့်သတ်ချက် တွေကိုလည်း သတိထားမှ အဲဒီရှေ့နေတွေကိုတော့ အမှုသည်တွေက မုဒိန်းကိုရှေ့ကတပ်ရင်တပ်၊ ဒါမှမဟုတ်ရင် နောက်က တပ်ပေးလိုက်တာပဲ မုဒိန်း ဘယ်သူဘယ်ဝါပေါ့ဗျာ…။ အဲဒါကြောင့် သိပ်မကောင်းဘူး ပြောတာ။ တခါကပန်းပဲ တန်းမြို့နယ်မှာ နာမည်ကြီး အရိုးအကြောကု ဆရာကြီးနဲ့ နာမည်ကြီး ဗေဒင်ဆရာတို့ ၂ ဦးရဲ့ အမှုကို လိုက်ပေးတဲ့ သူဆို အမှုသည်တွေ အမှုက ဂွင်းလုံးကျွတ် လွတ်ကုန်လို့ အဲဒီဘွဲ့ကို မယူချင်ပဲနဲ့ အပ်နှင်းခံ လိုက်ရတယ်။
နောက်တခါ ခေတ်အခြေအနေက မကောင်းတော့ ငွေရလွယ်တဲ့ အလုပ်ကို လုပ်ကြရတဲ့ အမျိုးသမီး တွေလဲအမျိုးမျိုးပါဘဲ။ ဒါတောင် ခုခေတ်လိုမိုတယ်တွေ၊ နိုက်ကလပ်တွေမရှိလို့ ကျနော်တို့ခေတ်က စားသောက်ဆိုင်တွေနဲ့ လေအေးသာတို့ လောက်ပဲရှိတာ၊ ညဖက်ဆူးလေလမ်း၊ ကမ်းနားလမ်း၊ လမ်း ၃၀ ၊ ဦးဝိစာရလမ်းနဲ့ သင်္ဃင်္န်းကျွန်းဘိုမတို့လိုနေရာတွေလဲရှိတော့ အဲဒီအမှု တွေကလည်း အများသား၊ မြို့နယ်တွေအ လိုက်ရှိကြပေမဲ့၊ အများဆုံးလို့ ပြောလို့ရတာက ပန်းပဲတန်းနဲ့ ကျောက်တံတားမြို့နယ်တွေမှာပါ။
အဲဒီအမှုတွေ မှာလဲ စပါယ်ရှယ်လစ်အထူးကျွမ်းကျင်တဲ့ရှေ့နေတွေရှိတယ်။ မှောင်ရိပ်ခိုတာမဟုတ်ဘူး တူတူပုန်းတမ်းကစား နေတာပါဆိုတာတွေပေါ့၊ အဲဒီရှေ့နေတွေကျတော့ပိုပြီးဆိုးတယ် ဘွဲ့ထူးကို အားမနာပါးမနာ အမှုသည် တွေကပေးလိုက်တာများ ဘယ်သူဘယ်ဝါပေါ့ဗျာ။ သူ့ခမျာလဲ နာမည်သာ ဆိုးတာပါ။ ရုံးလာရင် သူ့အနားမှာ အရွယ်စုံ၊ ဆိုက်စုံ ၀ိုင်းအုံနေလိုက်တာများ တခါတခါ မထင်ရတဲ့သူတွေပါ တွေ့ရသေးတယ်။
အထူးကျွမ်းကျင်တဲ့ ရှေ့နေတွေကိုလဲ သိရပြီဆိုမှတော့ ငှားရတော့မှာပေါ့..။ ရှေ့နေခလား ဒါလဲအမျိုးမျိုးဘဲ၊ နေ့တွက်နဲ့ လိုက်တဲ့ရှေ့နေ သူက ရုံးချိန်းရက်တွေမှာ ခရီးစရိတ် အပြီးအငြိမ်း တခေါက်ကို ဘယ်လောက်ပေး ဆိုတာမျိုးပေါ့။ အမှုသည်တွေက မတတ်နိုင်ရင် ရှေ့နေတချို့လည်း သနားပြီး အဲဒီလို လိုက်ပေးရတာပဲ။ ပေးတဲ့အခါပေး၊ မပေးတဲ့အခါလည်း မပေးတဲ့ အမှုသည်လည်း ရှိပါတယ်။ ပုတ်ပြတ်နဲ့ လိုက်တဲ့ရှေ့နေ သူကတော့ အမှုကို မြို့နယ်ရုံးမှာ အပြီးအထိ လိုက်ပါ ဆောင်ရွက်ပေးမယ်။ ဘယ်ရွေ့ဘယ်မျှပေါ့၊ ဒီနေရာမှာ တရားရုံးချုပ် ရှေ့နေတွေက အမြင့်ဆုံး တရားရုံးထိ လိုက်ပါဆောင်ရွက်ပေးမယ်။ ဘယ်လောက်ဆိုပြီး တောင်းတာလဲရှိတယ်။ တချို့ ရှေ့နေကတော့ ရှင်းတယ်။ တရားရုံးကို ပေးစရာရှိတဲ့ ကိစ္စခင်ဗျားတို့ ဖါသာလုပ် ရှေ့နေကတော့ ဥပဒေဘောင်ထဲက ကိစ္စတွေကို အကုန် ပြည့်စုံအောင် မေးမြန်း စစ်ဆေးပေးမယ်လို့ ပြောတာရှိတယ်။ တချို့ ရှေ့နေက အဲဒီလို မဟုတ်ဘူး။ တရားသူကြီးနဲ့ ရုံးကိစ္စ အားလုံးအတွက် ဘယ်လောက်ပေးရမယ်။ ရှေ့နေခက ဘယ်လောက် စသဖြင့်လည်း ပြောတတ်တယ်။
အမှုစစ်နေရင်းကနေ တရားရုံး ဆုံးဖြတ်ချက်တွေကို မကျေနပ်လို့ အယူခံ၊ ပြင်ဆင်တက်ရရင် ငွေထပ်ပေး ရပါတယ်။ အဲဒါကိုတော့ တသီးစား၊ နှစ်သီးစားစသဖြင့် တရားရုံး အဆင့်ဆင့်ပေါ်မှာ မူတည်ပြီး ထပ်မံငွေပေးရပါ သေးတယ်။ ဥပဒေပညာနဲ့ အသက်မွေးတဲ့ ရှေ့နေတွေကတော့ တရားရုံး အဆင့်ဆင့်အတွက် ခရီးစရိပ်ကလွဲလို့ ထပ်တောင်းတာ မရှိပါ။ အချို့အချို့သော ရှေ့နေများကတော့ မိုးပေါ်ထိ တက်လည်း ငွေထပ်တောင်း အုံးမှာပါဘဲလို့ ပြောလိုက်ပါရစေ…။
အဲဒါကြောင့် ပြောတာပေါ့ ဘယ်လောက်ချမ်းသာလို့လည်း အမှုတမှုရင်ဆိုင်ကြည့်ပါလား။
0 comments:
Post a Comment