ရွှေပျောက်မှုမှာ အမှု မကျူးလွန်တဲ့ သူတွေကို ရဲကဖမ်းဆီးနှိ်ပ်စက်

RFA ----- 29 October 2009

မြန်မာနိုင်ငံဟာ လူ့အခွင့်အရေး ချိုးဖေါက်ရာမှာ၊ သတင်းလွတ်လပ်ခွင့် မရှိရာမှာ၊ အကတိလိုက်စားရာမှာ၊ တရားစီရင်ရေးမဏ္ဍိုင်စနစ် ပျက်ပြားရာမှာ၊ ဘာသာရေး အရ ဖိနှိပ်ချုပ်ခြယ်တဲ့အရာမှာ ရာဇ၀င်သွင် စာရင်းဝင်တဲ့ ထိပ်ဆုံးက နိုင်ငံတွေမှာ ဘက်က တနိုင်ငံ ဖြစ်နေပါတယ်။ လူ့အခွင့်အရေး အကျိုးဆောင်တွေကလည်း နိုင်ငံရေးနဲ့ ပတ်သက်ပြီး ဖမ်းဆီးထိန်းသိမ်း ခံရသူတွေ ညှဉ်းပန်းနှိပ်စက် ခံရတာကို မပြတ် စိုးရိမ်ကြောက်ကြနေရပြီး ဒီကိစ္စတွေကို အထူးဘဲရာရုံထား လေ့လာ၊ သုံးသပ် နေကြတာပါ။

ဒါပေမဲ့ နိုင်ငံရေးမှုတွေ မကဘဲ သာမန်ပြည်သူ အထူးသဖြင့် ဆင်းရဲသူဆင်းရဲသား တွေကိုလည်း သာမန်ပြစ်မှုကို အကြောင်းပြ ညှဉ်းပန်း နှိပ်စက်တာ ရှိတယ်လို့ AHRC လို့ခေါ်တဲ့ အာရှ လူ့အခွင့်အရေး ကော်မရှင်က ကြေငြာချက် ထုတ်ပြန်ုလိုက် ပါတယ်။

ရန်ကုန်တိုင်း တွံတေးမြို့နယ်က ရွှေဆိုင်တဆိုင် ရွှေပျောက်မှုနဲ့ ပတ်သက်ပြီ ဘာပြစ်မှုမှ မကျူးလွန်တဲ့ လူငယ် ၂ ဦး ညှဉ်းပန်းနှိပ်စက် ခံရတာကို AHRC က ခရေစေ့တွင်းကျ တင်ပြထားပြီး ဥပဒေရှုထောင့်ကိုပါ ဖေါ်ပြထားတာပါ။ AHRC ရှေ့နေ ဦးမင်းလွင်ဦး ထောက်ပြတာကတော့ ----

“ထုတ်ပြန်ကြေငြာချက်မှာ ဆိုလိုတာက ၂၀၀၈ ခုနှစ် ဖွဲ့စည်းပုံ အခြေခံ ဥပဒေ အထဲမှာလည်း နိုင်ငံသားတွေရဲ့ အခွင့်အရေးနဲ့ ပတ်သက်လို့ နှိပ်စက်ညှဉ်းပန်းခြင်း ခံရရင် ဘယ်လို အကာအကွယ်ပေးမယ် ဆိုတာကို ပြဌာန်းချက် မရှိဘူး ဖြစ်တယ်။ နောက်ပြီးတော့ ကုလသမဂ္ဂ နှိပ်စက်ညှဉ်းပန်းခြင်းဆိုင်ရာ ပဋိဥာဉ် စာတမ်းကို မြန်မာနိုင်ငံ အစိုးရက လက်မှတ်မထိုးထားဘူး။ အဲတော့ အနိမ့်ဆုံး စံသတ်မှတ် ချက်တွေကို နိုင်ငံသားတွေရဲ့ အခွင့်အရေးကို အကာအကွယ်ပေးတဲ့ ဖွဲ့စည်းပုံ အခြေခံဥပဒေထဲမှာ ထည့်ပေးဖို့လိုတယ်။ နောက်ပြီးတော့ တရားရုံးတွေကလည်း ဒီလိုအမှုတွေကို လာတိုင်တယ် ဆိုလို့ရှိရင် အရေးယူ စစ်ဆေးပေးဖို့ လိုတာဖြစ်တယ်။“

မြန်မာနိုင်ငံမှာ ရဲက မတရား နှိပ်စက်ရင် အကာအကွယ်ပေးတဲ့ အက်ဥပဒေရှိပေမဲ့ တိုင်တန်းတဲ့အခါ အရေးယူဆောင်ရွက်ပေးတာ မရှိဘူးလို့လည်း ဝေဖန်ပါတယ်။

“မြန်မာနိုင်ငံအတွင်းမှာ ၁၉၉၅ ခုနှစ် ရဲစည်းမျဉ်း စည်းကမ်း ထိန်းသိမ်းရေး အက်ဥပဒေဆိုတာ ရှိတယ်။ အဲဒီမှာ တရားခံတယောက်ကို နှိပ်စက်ညှဉ်းပန်းပြီး ငွေတောင်းတယ် ဆိုလို့ရှိရင် ထောင်ဒဏ် (၃) အပြစ်ပေးနိုင်တယ်လို့ ဆိုတယ်။ သို့သော်လည်း အဲဒီလို တိုင်ကြားတဲ့ ကိစ္စရပ်တွေကို ဘယ်သူကမှ အရေးယူ ဆောင်ရွက်ပေးတာကို ကျနော်တို့ မတွေ့ရဘူး။”

အမြင့်ဆုံး အာဏာပိုင် အဖွဲ့အစည်းကို တိုင်တန်းတယ်ဆိုရင် ကြုံရနိုင်တဲ့ အခြေအနေတွေကိုလည်း ----

“မြန်မာနိုင်ငံ အတွင်းမှာရှိတဲ့ တရားရုံးကလည်း အားကိုးမရတဲ့ အခါကျတော့ အမြင့်ဆုံး အာဏာပိုင် အဖွဲ့အစည်းတွေကိုလည်း ကျူးလွန်ခြင်း ခံရတဲ့သူတွေက မေတ္တာရပ်ခံ တိုင်ကြားရမဲ့ သဘောမျိုး ဖြစ်တယ်။ အဲဒီအခါမှာ စာနာတဲ့သူ ရှိရင်တော့ အဲဒီအမှုကို အရေးယူဆောင်ရွက်တဲ့ အခြေအနေမျိုး ရောက်လာ နိုင်တယ်။ အဲဒီလိုမျိုး မဟုတ်ဘူး ဆိုလို့ရှိရင် တိုင်တန်းတဲ့ သူတွေရဲ့ လုံ့ခြုံရေးကို ရဲတွေကနေပြီး တဖက်တလမ်းကနေ အနှောင့်အယှက် ပေးမယ်၊ ခြိမ်းခြောက်လာမယ်။ ဒါတွေကို လက်ရှိမှာ ကျနော်တို့ ရင်ဆိုင်နေရတယ်။”

ဒီလို အကြောင်းတွေ၊ အခြေအနေတွေကို အခြေခံပြီး AHRC က အခုလို တိုက်တွန်းပါတယ်။

“မြန်မာနိုင်ငံက ကုလသမဂ္ဂက ပြဌာန်းထားတဲ့ နှိပ်စက် ညှဉ်းပန်းခြင်းဆိုင်ရာ ကိစ္စရပ်ကို ဆန့်ကျင်ပြီးတော့ ပဋိဥာဉ်စာတမ်းကို လက်မှတ်ထိုးဖို့ရယ်၊ နောက်ပြီး လူ့အခွင့်အရေး အဖွဲ့အစည်း အသီးသီးကလည်း မြန်မာနိုင်ငံ အတွင်းမှာ ရှိနေတဲ့ လက်ရှိ အခြေအနေတွေကို မှတ်တမ်းယူ တိုင်တမ်းကြဖို့ရယ်၊ ဒါတွေကို ဆောင်ရွက်ပေးဖို့ ကျနော်တို့ ဒီနေ့ ထုတ်ပြန်ရခြင်း ဖြစ်တယ်။”

အာဏာရှိသူနဲ့ အာဏာမဲ့သူ၊ လုပ်ပိုင်ခွင့်ရှိသူနဲ့ လုပ်ပိုင်ခွင့်မဲ့သူ၊ တရားမဲ့သူနဲ့ မတရားခံရသူ စတဲ့စတဲ့ ခံစားခွင့်ရှိသူနဲ့ ခံစားခွင့် မဲ့သူတို့ ဘက်နှစ်ဖက်ရှိနေချိန်မှာ မြန်မာနိုင်ငံက လက်ရှိအခြေအနေကိုလည်း ---

”အဲတော့ မြန်မာနိုင်ငံမှာ ရှိနေတဲ့ ရဲဟာ ဆင်းရဲနွမ်းပါးတဲ့ ပြည်သူတွေကို အကြောင်းအမျိုးမျိုးပြ ဖမ်းဆီးပြီးတော့ နှိပ်စက်ငွေယူနေတဲ့ အခြေအနေမျိုး ဖြစ်တယ်။

အာရှ လူ့အခွင့်အရေးကော်မရှင်မှ ရှေ့နေ ဦးမင်းလွင်ဦးက သုံးသပ်သွားတာပါရှင်း။