Wednesday, October 28, 2009

Filled Under:

တရားစီရင်ရေးစနစ်ကို လေ့လာရန် လွတ်လပ်တဲ့ တရားသူကြီးနဲ့ ရှေ့နေများအဖွဲ့ ကိုယ်စားလှယ် မြန်မာနိုင်ငံသို့ သွားရောက်မည်

VOA ----- 27/ 10/ 2009

မြန်မာနိုင်ငံအတွင်း တရားစီရင်ရေးစနစ်တွေ၊ ဥပဒေ၀န်ထမ်းတွေနဲ့ ရှေ့နေတွေရဲ့ လုပ်ငန်းဆောင်တာတွေဟာ လွတ်လပ်မှု ရှိ/ မရှိ လေ့လာနိုင်ဖို့ ဆွစ်ဇာလန်အခြေစိုက် Independence of Judge and Lawyer (လွတ်လပ်တဲ့ တရားသူကြီးများနဲ့ ရှေ့နေများအဖွဲ့)က ကိုယ်စားလှယ် Gabriela Carina Knaul de Albuquerque e Silva နိုဝင်လအတွင်းမှာ မြန်မာနိုင်ငံကို သွားရောက်မယ်လို့ ကုလသမဂ္ဂရဲ့ မြန်မာနိုင်ငံဆိုင်ရာ လူ့အခွင့်အရေး အထူးကိုယ်စားလှယ် မစ္စတာ တောမတ်အိုဟေး ကင်တားနားက ပြောဆိုလိုက်တာပါ။ အောက်တိုဘာ ၂၂ ရက်နေ့က ပြုလုပ်ခဲ့တဲ့ မစ္စတာ ကင်တားနားရဲ့ မြန်မာနိုင်ငံဆိုင်ရာ လူ့အခွင့်အရေး အခြေအနေနဲ့ ပတ်သက်တဲ့ သတင်းစာ ရှင်းလင်းပွဲအတွင်းမှာ သူက အခုလို ပြောလိုက်တာ ဖြစ်ပါတယ်။

မြန်မာနိုင်ငံ တရားသူကြီးချုပ် ဦးအောင်တိုးက လွတ်လပ်တဲ့ တရားသူကြီးများနဲ့ ရှေ့နေများဆိုင်ရာ အထူးကိုယ်စားလှယ် လာရောက်ခွင့်ကို လက်ခံလိုက်တယ် ဖြစ်တယ်လို့လည်း သတင်းထောက်တွေကို ပြောပါတယ်။ အခုလို ပြည်ပက တရားရေးဆိုင်ရာ အထူးကိုယ်စားလှယ် တဦးကို လာရောက် ခွင့်ပြုလိုက်တဲ့အတွက် ဟောင်ကောင် အခြေစိုက် AHRC လို့ခေါ်တဲ့ အာရှ လူ့အခွင့်အရေး ကော်မရှင်က ကြိုဆိုလိုက်ပါတယ်။

နှစ်ပေါင်းများစွာ ပြဿနာပေါင်းစုံနဲ့ ရင်ဆိုင်နေရတဲ့ မြန်မာ့ တရားစီရင်ရေး စနစ်ကို အခုသွားမဲ့ ဥပဒေ အထူးကိုယ်စားလှယ်က ကြိုတင်လေ့လာ သိရှိပြီး ဖြစ်တယ်လို့ AHRC အဖွဲ့မှ ရှေ့နေ ဦးမင်းလွင်ဦးက ပြောပါတယ်။

“ကျနော်တို့ သိရသလောက်က နိုဝင်ဘာ ဒုတိယအပါတ်နဲ့ တတိယပါတ်ထဲမှာ သွားနိုင်ဖို့ သူတုိ့စီစဉ်နေတယ်လို့ ကျနော်တို့ သိရပါတယ်။ အထူးကိုယ်စားလှယ် အနေနဲ့ သွားရောက်ပြီးတော့ လေ့လာတဲ့အခါမှာလည်း ကျနော်တို့ မြန်မာနိုင်ငံ တရားစီရင်ရေး စနစ်တွေ အထဲမှာ ဥပဒေနဲ့ မညီဘဲ လွဲမှားစွာ ဆုံးဖြတ်ထားတဲ့ ဆုံးဖြတ်ချက် တော်တော်များများကို သူ့အနေနဲ့ လေ့လာပြီးသား ဖြစ်တယ်။

ကျနော်တို့ မြန်မာနိုင်ငံအတွင်းမှာ ဖြစ်နေတဲ့ တရားစီရင်ရေးစနစ်က နှစ်ပေါင်း (၅၀) ကျော်လောက်အထိ ပြဿနာပေါင်းစုံနဲ့ ရင်ဆိုင်နေရတာ ဖြစ်တယ်။ မြန်မာနိုင်ငံက တရားစီရင်ရေးစနစ် ဗုံးဗုံးလဲသွားတယ်လို့တောင် ကျနော်တို့ ပြောလုို့ရပါတယ်။”

ဒါပေမဲ့ မြန်မာနိုင်ငံကို ရောက်တဲ့အခါမှာ လွတ်လွတ်လပ်လပ်နဲ့ အကန့်အသတ်မရှိ စုံစမ်းလေ့လာနိုင်ခွင့် ရဖို့လိုတယ်လို့လည်း ဦးမင်းလွင်ဦးက ပြောပါတယ်။

“အမှားမှား အယွင်းယွင်း ဆုံးဖြတ်ထားတဲ့ ကိစ္စရပ်တွေရှိတယ်။ အဲတော့ ဥပနေနဲ့မညီတဲ့ ကိစ္စရပ်တွေမှာ အထူးကိုယ်စားလှယ် သွားရောက်ပြီးတဲ့ နောက်ပိုင်းတွေမှာ အချို့ကိစ္စရပ်တွေကို ပြန်လည်ပြင်ဆင်ပေးလိမ့်မယ်။ နောက်ပြီးတော့ ပြန်လည်သုံးသပ် ပေးလိမ့်မယ်လို့ ကျနော်တို့ ထင်မြင်ယူဆပါတယ်။ အစိုးရအနေနဲ့ နိုင်ငံတကာက ဖိအားပေးလာတဲ့ အခါတွေမှာ ဒီလိုမျိုး ရံဖန်ရံခါနဲ့ ဖိတ်ခေါ်တာတို့ ဟန်ပြအနေနဲ့ လုပ်ပြတတ်တာတွေ ရှိတဲ့အတွက် ကျနော်တို့ကတော့ သိပ်မမျှော်လင့်ထားဘူး။ သို့သော်လည်း ဘာမှ မဖြစ်တာနဲ့စာရင် ယခုလိုမျိုး ၀င်ရောက် လေ့လာခွင့်ပေးတာက တရားရုံးနဲ့ ပတ်သက်တဲ့သူတွေအတွက် ပထမဦးဆုံး ခြေလှမ်းဖြစ်လိမ့်မယ်လို့ ကျနော်တို့က မျှော်လင့်ထားပါတယ်။”

ဒါ့အပြင် နိုင်ငံရေး အမှုတွေကို စီရင်ဆုံးဖြတ်တဲ့ နေရာမှာ လွဲချော်နေတဲ့ အချက်တွေကိုလည်း ဥပဒေ အထူးကိုယ်စားလှယ် အနေနဲ့ အဓိက လေ့လာဖို့ကိုလည်း AHRC အဖွဲ့က တိုက်တွန်းတယ်လို့လည်း ဆိုပါတယ်။

“မြန်မာနိုင်ငံအတွင်းမှာ နိုင်ငံရေးသမားတွေနဲ့ ပတ်သက်တဲ့ မှုခင်းတွေကို စစ်ဆေးစီရင်တဲ့ အခါတွေမှာ ဥပဒေနဲ့ မညီဘဲနဲ့ စစ်ဆေးဆောင်ရွက်ထားတဲ့ ကိစ္စရပ်တွေ ရှိတယ်။ နောက်ပြီးတော့ တိုင်းရင်းသားခေါင်းဆောင်တွေ အပေါ်မှာ စစ်ဆေးစီရင်ထားတဲ့ ကိစ္စရပ်တွေက တော်တော် လွန်လွန်ကျူးကျူး ဖြစ်တယ်။ ဒီဥစ္စာတွေကို ထောက်ပြပြီးတော့ မေးမြန်းနိုင်လိမ့်မယ်။ ဒီအပေါ်မှာ ပြန်လည်ပြင်ဆင်ပေးဖို့ တောင်းဆိုလိမ့်မယ်လို့ ကျနော်တို့အနေနဲ့ ထင်မြင်ယူဆပါတယ် ခင်ဗျား။

ဒါကတော့ မြန်မာနိုင်ငံကို ရှေ့လာမဲ့ နိုဝင်ဘာလအတွင်း ဆွစ်ဇာလန် အခြေစိုက် လွတ်လပ်တဲ့ တရားသူကြီးများနဲ့ ရှေ့နေများဆိုင်ရာ ကိုယ်စားလှယ် သွားမဲ့ ခရီးစဉ်နဲ့ ပတ်သက်ပြီးတော့ AHRC အဖွဲ့မှ ရှေ့နေ ဦးမင်းလွင်ဦး ပြောပြခဲ့တာ ဖြစ်ပါတယ်ရှင်း။

0 comments:

Post a Comment